1 Pita 2
2
Bgwe linotjila ne itjaba tjakayengemala
1Ndizo, letjani bubi gose ne butjebeli ne bung'wa ne bugovu nenge kugongobola. 2Munge bana batjazwagwa, banoshaka nkaka muna bommeyabo, shakani nkaka wakwako we tjimeya, kuti ukudze meya yenyu mutjidziwe, 3#Njimbo 34:8nge kuti sangwenu makalabila bubuya gwa She.
4Izhani kunli, ilo bgwe linotjila, lakalambiwa nge bathu, koga mu mesho e Ndzimu lakashalugwa lili bgwe lina nshingo nkulu. 5Ngono se mabgwe anotjila namwibo mubumbiwa ng'umba ye tjimeya, kuti mube ne bupirisiti gwakayengemala, kuti muduse zwibhayilo zwe tjimeya zwinoamutjilika ku Ndzimu ndi Jesu Kirisiti. 6#Isaya 28:16Ngobe hwalo, dzikati
“Bonani, ndobiga bgwe mu Ziyoni
bgwe lakanaka lakashalugwa linotambunudza mbako.
Ndizo iye unoduma mulili aatowobhatisiwa shoni.”
7 #
Njimbo 118:22
Koga kumuli imwi munogalamoyo, lina nshingo wakanaka nkulu kwazo, koga kuna ibabo basingagalemoyo kwakakwagwa kukayi,
“Bgwe lakalambiwa nge babaki latjibe
ilo bgwe lakatambunudza ng'umba ku ndzibo.”
8 #
Isaya 8:14, 15 Ngono,
“Ndilo bgwe linowokutha bathu,
i shongwe inowobaliga.”
Nge kuti banokuthiwa nge kusahwa dama, itjo Ndzimu tjawakababalila.
9 #
Kufuluka 19:5, 6; Isaya 43:20;
Kufuluka 19:5; Matama 4:20; 7:6; 14:2; Tito 2:14;
Isaya 43:21;
Isaya 9:2
Koga imwi mu ludzi gwakashalugwa, gwe bupirisiti gwe bushe, itjaba tjakayengemala, bathu ba iwo Ndzimu, kuti musumikile mishingo inotjenamisa ye wakamudana emudusa mu zhalima, emulonga mu tjedza tjinokabaadza. 10#Hoseya 2:23Makatongobe musi bathu, koga ngwenu mu bathu be Ndzimu. Makatongobe musakahwigwa ngoni, koga ngwenu makahwigwa ngoni.
Balanda be Ndzimu
11Badiwa, ndomukumbila muli bataya kakale muli bapindi mu shango iyeyi, nditi muthubukane ne njemulo dze tjinyama, idzo dzinogwisana ne meya yenyu. 12Mudwilile nge mazwiibhato akalulwama muna basingagalemoyo, kuti ha beleba nge kwenyu beti mu batjinyi, bakumbule mishingo yenyu yakalulwama, koga banowokudza Ndzimu mu zhuba le kusumikilisiwa.
13Muzwiyise pasi kwe ndaulo imwe ne imwe ye bathu, muthamila She Jesu, kene ili ku nlauli nkulu, 14kene bayendisi be milayo, bakatumwa ne nlauli nkulu kuwohwisa zogwadza ibabo banotjinya nenge kukudza ibo banothama ndulamo. 15Nge kuti hwuda kwe Ndzimu, kuti mu kushinga zubuyanana kwenyu munyaladze zwilengwe zwinoleba ngoshaya luzibo. 16Mutjile se bathu bakasununguka, koga musingashingise sununguko yenyu kuzwimba mbipo, mutjile se balanda be Ndzimu. 17Tetani bathu bose. Mude zwikamu mubudumili. Mutje Ndzimu. Kudzani nlauli nkulu.
Tjilakidzilo tje kudziyidzika kwa Kirisiti
18Balanda muzwiyise pasi kwa botetshi benyu ne mazwiibhato wose, kusi kuna botetshi bakalulwama bana buthu koga, na ibo banomutshamba nge makumbo. 19Ngobe koamutjilika ha nthu ekumbula Ndzimu e dzikitadzila kudziyidziwa nge kusakafanila. 20Mungatetigwani wali, ha mungadzikitadzila kulobgwa matjinya kene? Koga ha mungadzikitadzila kudziyidzigwa mishingo yakalulwama, muamutjila ku Ndzimu. 21Nditjo tjamakadanigwa itjetji, nge kuti Kirisiti na iyebo wakadziyilila imwi, emusiyila tjilakidzilo, kuti mutobele nkwala uwe. 22#Isaya 53:9“Aana tjibi tjaakathama, akuna butjebeli gwakawang'wa mu kulebeleka kukwe.” 23#Isaya 53:7Wakati etukiwa, aazoshandula. Wakati ehwa zogwadza aazotukana koga wakagalabgwe muna iye unosumikilisa nge ndulamo. 24#Isaya 53:5, 6Iye nge kukwe wakasenga zwibi zwedu mu mbili uwe, mu tjilayanyo, kuti ndizo tife ku tjibi, koga titjile ku ndulamo. Makapodziwa nge mabanga awe. 25Makabe mamila se pkhwizi, koga ngwenu makabuya ku Nlisi kakale ali Ntjengeti we meya yenyu.
Currently Selected:
1 Pita 2: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
