MARKUS 14

Ba bu émoʼo ya bi Yésus

(Mt 26:1-5; Lk 22:1-2; Yoa 11:47,49-53)

1Eyoñe te Pak baa abôʼô fembé é ne teke mvusan bi liʼiya melu mebaé, ane Betuni a Beyeme-Bekalate be nga ke ba jeñ aval ane be ne bi Yésus a mefek a wôé nye. 2E nde be mbe be jôʼô na: Sake e môs abôk, bôte be nlam be za bo éngôngôm.

Ba woʼo Yésus mbon e Bétani

(Mt 26:6-13; Yoa 12:1-8; Lk 7:36-38)

3Valé Yésus a to e Bétani, e nda be Simon nzezam, a to e si a jaʼak, e nde minga a nga ke soo ndeʼe albata, njalan a étua abeñ mbon ôlobinda, nkôman a éloʼo naléda, ô to dia abui. Ane a nga bôé ndeʼe albata, a nga sôé Yésus mbon e nlô. 4Bôte bevoʼo bʼéziñ be nga wôʼô ôlun a jô na: Abim éndaman ôlobinda di da boban amu jé? 5Amu na ba to ve kuan ôlobinda nyuna tañ mintete mi moné mila, be nga kab nye bingôngole bi bôt! Be nga wôʼô ñhe minga te ôlun. 6Ve Yésus a nga jô na: Jôkaʼane nye! Mia tyaʼa nye nlem amu jé? A te bo mbamba jam asu dam. 7Amu na mia minzôzoé mi bôt mi too kom ése, a éyoñ ése mia kômbô, mi ne toñe mie; ve mfaʼa wom, mi nji tabe a ma kom ése. 8A boya jam a te yiane bo. A maneya sôé ma ôlobinda e nyôl asu ngômesan éjamembime jam, te yene jame te e za boʼok. 9Ma bele foʼo ane ma jô mia na, e vôm ase ba ye kañete Mbamba Foé e si ése nyuna, e jam minga nyô a te bo di, ba ye fe kañete de, be simesaʼane nye.

Yudas a koñe Yésus

(Mt 26:14-16; Lk 22:3-6)

10Ane Yudas Iskariôt, wua ya beyéʼé awôm a bebaé, a nga ke yene Betuni Benen na a kuane nye e be be. 11Eyoñ be nga wôʼô nalé, be nga vaʼa foʼo, a kaʼa nye na ba ye ve nye moné. Yudas a nga jeñe ñhe ve mbamba éyoñ a ne kee be nye.

Ngômesan ndiane Pak

(Mt 26:17-19; Lk 22:7-13)

12E môs ôsu ya abôʼô fembé é ne teke mvusan, éyoñe ba tyiʼi biyeme bi Pak, e nde beyéʼé be Yésus ba sili nye na: Za vômô wo kômbô na bi ke kômesane ndiane Pak? 13Ane a nga lôme beyéʼé bé bebaé a jôʼô be na: Kelane e tison, mia ye tôbane môt a beʼe kobe mendim. Tôñane nye. 14E vôm a ye ke nyiin, mi kate miendaa na: Ñyeʼele a lôme wo mbañete na: E nda ma zu di Pak bia beyéʼé bam é ne vé? 15Môt ate a ye liti mia beta étune nda mfaʼa ya yôp, é bili mam mese nkôman. Vôm ate e nye mi bo bia ngômesan. 16Ane beyéʼé be nga téé dulu, ve ke kui e tison, be yene fe vʼaval ane a nga mane kate be, be mane ñhe kômesane Pak.

Wua ya be mia a ye koñe ma

(Mt 26:20-25; Lk 22:1-5; Yoa 13:21-31)

17Eyoñe ngôʼé é nga bo, ane Yésus a nga ke, baa beyéʼé awôm a bebaé. 18Valé be nto e si be jaʼak, e nde Yésus a zu jô na: Bebela foʼo, ma kate mia na: Môte wua ya be mia a ye koñe ma, e nyô a di fufulu a ma. 19Be tate ñhe na ba wôʼô ôlun, be nga ke fe ba sili nye wua wua na: Za, ye ma? 20Ane a nga jô be na: Wua ya beyéʼé awôm a bebaé, e nyô a ye futi wo éso bia nye éyoñe jia. 21Mfaʼa Mone Môt, nye a ke aval e ne ntilan ajô dé, ve ngoʼé môte ate, e nyô a kuane Mone Môt. E nga ye bo mvaé mfaʼa wé, nge môte ate a nga ye bo te bialé.

Nyoñan, mi di a nyu

(Mt 26:26-29; Lk 22:15-20; 1 Ko 11:23-26)

22Be ngenan be jaʼa nalé, e nde a nga nyoñe fembé a botane je, a nga bek a ve be je, a jôʼô na: Nyoñan, nyôle jam nyô. 23Ane fe a nga nyoñe élaé a mane ve akéva a ve be, ane be nga nyu je bese. 24E nde a nga jô be na: Metyi mame ya élat e me ma, metyi ma sôé e si asu jama bôt. 25Ma bele foʼo ane ma jô mia na, teke fe na ma ye beta nyu ébuma ya ndiʼi woon ji, akekui e môse ma ye nyu je mfefé nyuan Ejôé Zambe été. 26Eyoñ be nga mane yia jia, ane be nga kôlô valé a ke e nkôle beôlivié.

Yésus a liti na Pierre a ye kate nye

(Mt 26:36-45; Lk 22:39-46)

27Ane Yésus a nga jô be na:

Mia bese, mia ye kolé ôbak,

amu e ne ntilane na:

Ma ye bibi mbaʼale mintômba,

a mintômba mia ye mane tyamelan,

a bo ne miala-mialan.

28Ve da éyoñ me wômôya, ma ye taté ke mia ôsu e Galilé. 29Ane Pierre a nga jô na: Jaʼa na ôbaʼa té wo mane kolé bôte bese, ve mfaʼa wom, teke foʼo. 30E nde Yésus a nga jô nye na: Ma bele foʼo ane ma jô wo na, e wo nyô, alu ebien ya den di, nnôm kub a ngenane teke loñ biyoñ bibaé, wo ye kate ma biyoñ bilaa. 31Ane Pierre a nga beta dañe kobô na: Jaʼa na bia wo bia ke wu awu da, teke foʼo na ma ye kate wo! Beyéʼé bevoʼo bese be nga jô fe vʼavale da.

Yésus a yeʼelan e Getsémané

(Mt 26:47-56; Lk 22:47-53; Yoa 18:2-11)

32E nde ba zu ke afôla e ne jôé na Getsémané. Nyee beyéʼé bé na: Likaʼane mi too vana, nté ma ke yeʼelan. 33Ane a nga nyoñ Pierre, Yakob a Yôanes a kelee be. E nde metyi me nga ke nye fé, woñ ô mbili nye. 34Ane a nga jô be na: Olun ô bili ma, awu bebé. Likaʼane vana, mi mombôʼô. 35Ane a nga subu ôsu mone nté, a suʼulane si, a yeʼelaʼane na, nge nalé a ne boban, awolo te e lôte nye ôyap. 36E nde a nga jô na: Abba, a Tat, ô ne ngule ya bo mam mese, boʼo na e kob nyuna é saʼale ma ôyap. Ve da sake ane ma kômbô, ve ane womiene wo kômbô. 37Ane a nga zu, a koone be ôyo. E nde a jô Pierre na: A Simon, wo bele ke ôyo? Ye ô nji bi abime ngule ya bo évé jaʼane ve awolo dada? 38Mombaʼan, mi yeʼelan, mi za ku meveʼele été. Nsisim ô ne ôsesa; ve minsôn mi ne atek. 39Ane a nga beta ke yeʼelan a kobôʼô ve avale nkobô dada. 40E nde a nga so, a zu koone be be to ôyo, amu mis me mbe be étua adit, be teke yem e jôm be yalane nye. 41Ane a nga zu éyoñe lale a jô be na: Eyoñe ji e nje kelane ôyo, mi woʼon! Abime te da yian. Awolo e kpwaaneya, ba zu ve Mone Môt e mo bebo abé . 42Kôlaʼane si, bi ke, mi lôô e môt a zu koñe ma a ntoo bebé.

Ba bi Yésus

(Mt 26:47-56; Lk 22:47-53; Yoa 18:2-11)

43A ngenan a kobôʼô nalé, a teme na, Yudas, wua ya beyéʼé awôm a bebaé, a vamé a nsamba bôt, be bili minkpwaté mekôn a mimbeñ. Betuni Benen, Beyeme-Bekalate, a Bemvendé e mbe be nga lôme be. 44Môt a nga koñe nye a nga mane ve be e ndeme nyuna na: E môte ma ye wubane nye a latane nye anyu, e nye ate le! Biane nye, mi kee nye, mi tukaʼa baʼale nye! 45Akui a nga zu kui, e nde fe a nga subu Yésus bebé été été, a jô na: A Rabbi! Ve wubane nye a latane nye anyu. 46Ane be nga futi nye mo nyôl, a bi nye. 47E nde môte wua ya ba be nga to valé a nga té nkpwaté mekôn a baʼé mbo ésaé Ntuni Nnen, ane a nga tyiʼi nye alo. 48Ane Yésus a nga kobô a jô be na: Ye mia zu bi fanga, ane mia ke soo minkpwaté mekôn a mimbeñ na mia zu bi ma? 49E môs ôse ya yôp, me mbe e Nda Zambe été va, bia be mia, me yeʼeleʼe bôt, ve mi nji bi ma. Ve da mintilan mia yiane tôéban. 50E nde beyéʼé bese be nga liʼi nye, be mane tup. 51Mone ndôman éziñ a nga zu a tôñe nye valé, a beʼe foʼo sandé éyé komaʼane. E nde be nga bi nye. 52Ane a nga wua sandé éyé a tub nsoé nalé ne keñelé.

Yésus a ne aba mejô

(Mt 26:57-68; Lk 22:66-71; Yoa 18:12-24)

53Ane be nga kee Yésus e be Ntuni Nnen. E nde Betuni Benen, a Bemvendé a Beyeme-Bekalate, be bese be nga mane sulan. 54Pierre a nga zu a tôñe nye ôyab mvus akekui nseñe be Ntuni Nnen, a nto si valé baa bebo bisaé, be wobaʼane nduan. 55Betuni Benen a nsamba bekobô mejô ôse be nga ke ba jeñe mam ya boʼolô Yésus na be wôé nye, ve be teke yene jam éziñ. 56Abui bôt e nga zu foʼo boʼolô nye a bibôta mejô, ve viane ke kui na be nto metyiñe metyiñ. 57E nde bôte bʼéziñ be nga tebe, a bo bengaa ba ke ba laane minsos, be jôʼô na: 58Ke bi nga wôʼô nye a jôʼô na: E ma nyô, ma ye tyame Nda Zambe é ne nlôñan a mo me bôte nyô, a mvuse melu mela, ma ye beta mane lôñe Nda fe, teke é to ésaé ya mo me bôt. 59Ve beboʼolô bebiene fe teke kui tyiñe jia. 60E nde Ntuni Nnen a kôlô si a tebe e zañe bôt, a sili Yésus na: Ye wô teke yalane jam éziñ e mame bôte bana ba boʼolô wo? 61Nye va, a to vʼévô, teke yalan toʼo jam éziñ. Eyoñe baa, Ntuni Nnen a sili nye na: Ye wo ô ne Mesie, Mone Zambe? 62Ane Yésus a nga jô na: Ma foʼo me ne nye: A mia ye yene Mone Môt a too si e mbo nnôme be Nyô a dañ ngu, a zaʼak a minkute ya yôp. 63Ane Ntuni Nnen a nga mane nyab mengômesane mé a jôʼô na: Jé éfe foʼo bia beta jeñe beboʼolô? 64Ke mi wôʼôya ane a ta Zambe. Mi lôô aya? E nde bese be nga yalane na: A yiane wu. 65Bôte bevok be taté ñhe na ba tuii nye menden, a ba ba buti nye mis, be bibiʼi nye minkasa a jô na: Kobôʼô ñhe, a nkulu mejô! Bebo bisaé be nga bibi fe nye mebaé.

Pierre a kate Yésus

(Mt 26:69-75; Lk 22:56-62; Yoa 18:17,25-27)

66Mbôle Pierre a nga to e si mfaʼa ya nseñ, e nde mbo ésaé minga wua ya be Ntuni Nnen a nga suan. 67Eyoñ a yeneya Pierre a wobaʼane nduan, ane a nga fombô nye ne tooññ a jô na: Ke wo fe ô mbe a môte ya Nazarét a ne Yésus! 68E nde Pierre a nga kat, nye na: Me ne teke yem nge wôʼô ki e jôm ébien wo jô! Ane a nga kôlô valé a ke nseñ mfaʼa yʼatan. E nde nnôme kub a nga loñ. 69Ane mbo ésaé minga a nga yene nye, a nga beta fe kat e bôte be nga too valé na: E môte nyô a ne wua ya été. 70E nde Pierre a nga baʼalane kat. Mon étun a lôté, ane bôte be nga tele valé be fe ba zu jô Pierre na: Bebela émien, ô ne môte wua ya été, amu ô ne fe môt ya Galilé. 71Ane a nga taté na a kane ngana a kalane minkale na: Me nji yeme môte mia jôô nye le! 72Eté été, ane nnôme kub a nga loñ, éyoñe baa. E nde Pierre a zu simesan ajô Yésus a nga jô nye na: Valé nnôme kub a ngenan teke loñ biyoñe bibaé, wo ye kate ma biyoñe bilaa. Ane a nga taté na a yi du.

Currently Selected:

MARKUS 14: BULU09

Highlight

Copy