MARKUS 15

Yésus a ne be Pilat

(Mt 27:1-2,11-26; Lk 23:1-5,13-25; Yoa 18:28–19:16)

1Alendé tyé é nga lendé, e nde Betuni Benen, Bemvendé, Beyeme-Bekalate a ngumba é koone bekobô mejô, be nga bo émoʼo, be mane kaʼa Yésus ngataʼa, be kelee nye, be ke ve nye Pilat. 2Ane Pilat a nga sili Yésus na: Ye wo foʼo ô ne njôô Beyude? Ane Yésus a nga yalane nye a jô na: E nde womiene wo jô le. 3Betuni Benen be mbe be boʼolôʼô nye abui mam. 4E nde Pilat a zu beta sili nye na: Ye wô teke yalane jam éziñ? Tame yen abim mam ese ba boʼolô wo di? 5Ve Yésus teke foʼo yalane jôm; ane Pilat a nga semé foʼo. 6Eyoñ ése abôk e né, Pilat a nga bo a suʼu be mone mimbôʼô wua, e nyô ba kômbô na a suu. 7Nde môt éziñe kik, jôé na Barabas, nye kʼa mbe e minkôm valé a bôte bevok baa be nye be nga kange, a tyaʼa ékukuma ya wosan éjôé nlam, ane be nga wôé môt ékukuma te été. 8Nkunda bôt ô taté ñhe na wo bet e mfaʼa ya yôp, be nga sili na Pilat a bo be aval a zu a bo. 9Ane Pilat a nga sili be na: Ye mia kômbô na me suu mia njôô Beyude? 10Amu a mbe a yeme na Betuni Benen be nga zu ve nye Yésus amu abé nlem. 11E nde Betuni Benen be nga tindi ékôane bôt na Barabas e nye be viane suu be. 12Ane Pilat a nga beta kobô a jô be na: E nde mia yi na me bo nyô mia loone na njôô Beyude aya? 13Bôte be nga yôtan a ngule na: Tyeleʼé nye e krôa ! 14Ane Pilat a nga jô be na: Za mbia jame foʼo a nga bo? Be nga dañedañe yôtan a ngul ése na: Tyeleʼé nye e krôa ! 15Mbôle Pilat a nga jeñe na a bo aval ane jama bôt a sili, ane a nga suu be Barabas, a ve ke be Yésus na be bibi nye minkasa a tyelé nye e krôa .

Ba jalé Yésus ékate biyo

(Mt 27:27-31; Yoa 19:2-3)

16Ane bezimbi be nga kee nye nseñe ya été, e nda Ngovina émien, be loone ngume nsamba bezimbi ôse. 17Be jalé nye évele ngômesan, be mane fe lôñ ékat biyo, a jalé nye je e nlô. 18Be taté ñhe na ba batane nye a jô na: Mbôlô, a njôô Beyude! 19Be bibiʼi nye nden e nlô, be tuʼii nye menden, be zaʼa nye ôsu be kute fe meboñe si a buti mesu e tyia. 20Eyoñe be maneya kpweʼele nye nalé, ane be nga vaa nye évele ngômesan, be jalé nye mengômesane mé. Be kuii nye atane na ba ke tyelé nye e krôa .

Ba tyelé Yésus e krôa

(Mt 27:32-44; Lk 23:33-43; Yoa 19:16-24)

21E nde be nga bi môt éziñ, Simon ya Siren na a beʼe nye krôa , a mbe ésaa Alékzandre baa Rufus, nye a lôtôk, a soʼo afup. 22Ane be nga kee nye e Gôlgôta, nalé a tinan na: Vôme ya ékôkoé nlô. 23E nde be nga ve nye woon mfulan a mira, ane a nga ben. 24Ane be nga kabane mengômesane mé, a zen ya ndoan abia na, be yem e jôme môt ase a ne nyoñ. 25E mewolo mela, e nde be nga tyelé nye e krôa . 26Ajô ya étom be nga boʼolô nye e mbe ntilane na: Njôô Beyude. 27Be nga tyelé fe befanga bebaé e krôa baa be nye, wua e mbo nnôm, nyô mboʼo mbo nga (28). 28Eyoñ éte jam e ne ntilan e nga tôéban na: Ane a nga lañeban e nsamba bebo mam abé . 29E bôte be mbe be lôtôk ve ke ba ta nye, be meʼeteʼe minlô be jôʼô na: Hééé! A wo wo tyame Nda Zambe, ô mane fe beta lôñe je ve melu melal étam, 30suse ñhe si, e vôm ô tyele e krôa valé, ô nyii womien. 31Avale te fe Betuni Benen baa Beyeme-Bekalate be mbe be kele ba kpweʼele nye e zañe jab, a jô na: A nga nyii bôte befe, ve a kate nyii émien. 32Ke Krist ate, njôô ya Israél, a tame ñhe suse si éyoñ ji e vôm a tyele e krôa , bi yene de a buni. E Bôt baa be nye be nga tyele e krôa be mbe fe be ta nye.

Awu Yésus

(Mt 27:45-54; Lk 23:44-49; Yoa 19:28-30)

33Eyoñ awolo samane e kpwaaneya, ane dibi e nga vin si ése akekui awolo ébulu.

34Awolo ébulu na,

e nde Yésus a nga bete tyiñ ngu

e yôb été, a jô na:

Eloi, Eloi, lama sabaktani!

Nalé a tinane na:

A Zambe wom, a Zambe wom,

amu jé ô liʼiya ma?

35Bôte bevoʼo ya ba be nga tele valé, awôʼô be nga wôʼô nalé, be nga ke ba jô na: Ye mia wôk, a loone Elie! 36Ane môt éziñ a nga ke mbil a dube ébubut kusa e sañe woon été, a tyele je ôlé, a same nye wô na a nyu a jôʼô na: Jôkaʼan, bi tame foʼo yen, nge Elie a ye zu suu nye e si. 37E nde Yésus a nga koñôlô beta nkoñôlan a tyiñ ngul e yôb été a suu mvebe. 38Ane afib éyé ya Nda Zambe e nga nyabé bifase bibaé, aso yôb akui e si. 39Evet ntete bezimbi é nga tele nye ôsu, ayene a nga yene na a suuya mvebe, e nde a nga jô na: Bebela foʼo, e môte nyuna a too Mone Zambe. 40Binga bʼéziñ be mbe fe be fombôʼô be tele ôyab a naléé, e binga bete été Marie ya Magdala, Marie nyia Yakob Etune Môtô baa Yôsé, a Salôma. 41Eyoñ Yésus a mbe e Galilé, e mbe be nga bo be tôñe nye a bo nye bisaé. A abui binga afe, e mbe fe baa be nye be nga so a bet a kui Yérusalém.

Ejame mbim Yésus

(Mt 26:55-61; Lk 23:50-56; Yoa 19:38-42)

42Eyoñe ngôʼé é nga bo, mbôle a mbe môse ngômesan, nalé a ne na Sabat a too ane akiti, 43ane Yôsep ya Arimaté a nga suan, a too éwôlô môt e nsamba betyiʼi mejô, nye fe a mbe a yangeʼe éjôé Zambe. E nde a nga bo ayoʼo ya ke be Pilat, a jaʼé mbime Yésus. 44Pilat a nga kame na, nde a wuya kik. Ane a nga loone évet ntet bezimbi, a mane sili nye nge a wuya ayap. 45Eyoñ a yemeya tyiñe njôô bezimbi, ane a nga ve Yôsep mbim. 46Eyoñ Yôsep a maneya kus ndombo éndelé, ane a nga ke suu mbim e si, a mane vute wô éyé été, a ke bôôé wô e soñ é too mfaʼan akôm été, e nde fe a nga tindi akok e mbé soñ. 47Marie ya Magdala baa Marie nyia Yôsé be nga tuʼa fombô e vôm a nga bôôé nye.

Currently Selected:

MARKUS 15: BULU09

Highlight

Copy