MARKUS 13

Yésus a kuli ajô ntyaman Nda Zambe ya Yérusalém

(Mt 24:1-3; Lk 21:5-10)

1Akôlô Yésus a nga kôlô e Nda Zambe, e nde ñyeʼé wé wua a jô nye na: A ñyeʼele, tame yen avale mekoʼo di, a akaʼa melôñ di! 2Ane Yésus a nga yalane nye na: E beta melôñ bese ô lôô vana ba, teke akoʼo éziñ da ye liʼi e bete akoʼo avok e yôp, be teke de sôʼôlô e si. 3Eyoñe Yésus a tabeya e si e nkôle beôlivié, e zia Nda Zambe, e nde Pierre, Yakob, Yôanes a André, ba ke sili nye e fefele na: 4Kate bia, mame mete ma ye boban éyoñ évé? A ndeme fé ja ye liti na biôm bite bise bi nga zu man?

Atataʼa minjuk

(Mt 10:16-24; 24:4-14; Lk 12:11-12; 21:7-19)

5E nde Yésus a nga nyoñe nkobô a jô be na: Mi tabeʼe ntye môt éziñ a za yalee mia e feñ. 6Amu bôt abui ba ye so, be beʼe jôé dam, be jôʼô na: Mamiene nyuna! Nalé ba ye duʼu bôt abui. 7Eyoñe mia ye wôʼôtan bita, nge ki bifoofooé ya bita, te koone woñ. Nalé a yiane boban, ve da sake asuʼulane le. 8Amu na ayoñe bôt da ye kôlô si e nga wosane di avok, éjôé é nga wosane ji évok. Mimfôʼôsan mi si mia ye bo mevôm mevôm, a bemfumbale zaé. Mame mete me ne aval ane atataʼa mintaé mi abiaé. 9E nde ñhe mi baʼaleʼe miabebien. Amu na ba ye kee mia e meba mejô, a meba me Zambe, ba ye bôme mia a minkasa, ba ye kee mia e mise me beta bengovina a bejô bôt, amu ajô dam, nalé a ye boʼolô ngum jam e mise map. 10Amu na Mbamba Foé a yiane taté mane kateban e be meyoñ mese. 11Eyoñ ba ye kee mia nalé, te tyelane minleme yôb asu jôm mia ye jô, ve jam da ye veban be mia awolo te ebien, kobaʼane de. Amu sake mia mia ye kobô, ve Mfufub Nsisim. 12Amu na monyañ a ye ke koñ monyañ na a wu, ésaa fe a ye ve mon; bone ki ba ye kôlô si a wosane bebiaé, a bo na be wu. 13E nde ñhe mia ye bi ziñ e be bôte bese amu jôé dam. Ve da, e môt a ye yem ne zeñ akekui asuʼulan e nye a ye yen ényiñ.

Njuk ve nenenen

(Mt 24:15-25; Lk 21:20-24; 17:23; 21:8)

14Eyoñ mia ye yen ébubua ja dañ angôndô, é ntoo e vôm a nji yian - e môt a lañ a tukaʼa wôk - éyoñe éte e bôte be ne e Yudé be tubuk a ke e minkôle yôp. 15E môt a ne nseñ nda ya yôp, a boʼo te sus e si a ke nyiine nda jé na a nyoñe jôm éziñ été. 16E môt a nee afup, a boʼo te bulan a mvus na a nyoñe alôʼô dé. 17Ngoʼo binga ba ye beʼe mebum, nge nyia bon melu mete. 18Mi yeʼelaʼane foʼo na jame te e bo te kui a ôyôn. 19Amu na, melu mete, avale njuk da ye kui e ngenan teke tame bo nalé, ataté ane Zambe a nga té biôm, azukui éyoñ ji, a teke na da ye beta bobane nalé. 20A nge Nti a nga ye bo teke seʼé melu mete tañ, teke môt éziñ a nga ye liʼi a vee. Ve da a nga seʼé melu mete tañ amu bôt a nga top. 21Ajô te nge môt a ye kate mia na: Ke Mesie nye a ne vana nyô! Tame yenan, e nye nyuli, te yebane de. 22Amu na, bekrist meduʼan a bekulu mejô meduʼan ba ye vam, ba ke ba bo mesimba a bitua bi mam na be yale mintoban mi bôt mezen mefe, nge nalé a ne boban. 23Ve mfaʼa wônan, mi tabeʼe ntye. Me maneya kate mia mam mese.

Nsoone Mone Môt

(Mt 24:26-35; Lk 21:25-28)

24E nde, melu mete,

e mvuse beta njuʼu nyuna,

jôb da ye dim,

ngon teke fe faé.

25Ateté da ye ke da koo e yôp

e kpwaʼa si,

a ngule biôme ya yôp

é kôlôʼô bité biap.

26Eyoñe te ñhe ba ye yene Mone Môt a zaʼa e minkut été a beta ngu a étôtoʼo nnen. 27Eyoñe te a ye lôme béngele bé a tôkan mintoban mié e mekuʼu mimfaʼa minyin, ataté susuʼa akuʼu si akekui susuʼa akuʼu yôp.

Nkana élé fiig

Mt 24:32-36; Lk 21:29-33

28E nde, nyoñane ñyeʼelan ya tuʼa wôʼô nkana élé fiig. Eyoñ é mbeʼe bisôsoñe mintyaé a bileleʼe mekaé, mi yeme na éseb é nto bebé. 29Avale te fe mfaʼa wônan, ane mi yene mam mete me bobaʼan, mi yeme na Mone Môt a ntele mia e mbé yôp. 30Ma kate mia bebela na, e miaé bôte wu wo ye bo teke man, te na mam mete mese me tame mane boban. 31Yôb a si bia ye lôt, ve mejô mam teke lôt. 32Môse ôte, nge kʼawolo te, teke môt a yem, jaʼane béngele ya yôp, jaʼa ki Mone Môt, foʼo ve Esaa étam.

Mi tabeʼe bevevee a mombô

(Mt 24:42; 25:13-30; Lk 12:35-40; 19:12-13)

33Mi tabeʼe ntye, mi tabeʼe évevé. Amu mi nji yem éyoñ biyoñ bia ye kpwaan. 34Aval ane môt a ke e dulu, a liʼi nda jé a mane ve bebo bisaé éjôé jé, môt ase ésaé jé, a ve fe mbaʼale mbé ya jal atiñ na a mombô. 35E nde ñhe mombaʼan, amu mi nji yem éyoñe miejale a ye bulan, nge mamengôʼé, nge e zañ alu, nge éyoñ beyôm be kub ba loñ, nge ndib-tyé. 36Mi za ke tem a soya, a koone mia ôyo. 37Ajô ma kate mia di, ma jô de mia bese ve na: Mombaʼan!

Currently Selected:

MARKUS 13: BULU09

Highlight

Copy