2 Amuleina 2
2
Alona mi hle Elie, Elise mi vrak blangâmu
1Ata yima Ma didina mi min á hle Elie akulo ki mbirlimbina, wana nahle suma a lena: Elie azi ki Elise a tcholï Gilgal ad’u tazi djak. 2Elie mi de mi Elise ala: An nga ni tchenengû, ang kak ka hî. Ma didina mi sunun Betel.
Wani Elise mi hulong dum ala: An nga ni gunung tan avok Ma didin ma bei matna ba na, avorong ang mi, an nga ni arang ngi. Azi i Betel zla tazi djak.
3Adesâ hi suma djok vun suma a nga kaka Betel-lâ, a mba, a de mi Elise ala: Ang wala Ma didina mba mi hle ini salangâ akulo zu?
Elise mi hulong dazi ala: Â, an we ko. Agi bagiya!
4Elie mi de mi Elise kua ala: An nga ni tchenengû, ang kak ka hî. Ma didina mi sunun Jeriko.
Wani Elise mi hulong dum ala: An nga ni gunung tan avok Ma didin ma bei matna ba na, avorong ang mi, an nga ni arang ngi. Azi i Jeriko zla tazi djak.
5Wani adesâ hi suma djok vun suma a nga kaka Jeriko-na, a hut gen Elise, a dum ala: Ang wala Ma didina mba mi hle ini salangâ akulo zu?
Elise mi hulong dazi ala: Â, an we ko. Agi bagiya!
6Elie mi de mi Elise kua ala: An nga ni tchenengû, ang kak ka hî. Ma didina mi sunun avun alum ma Jurdê-na.
Wani Elise mi hulong dum ala: An nga ni gunung tan avok Ma didin ma bei matna ba na, avorong ang mi, an nga ni arang ngi. Azi tchuk tazi tita asem tazi djak.
7Suma djok vuna dok vahl a mba, wani a tchol sä woi hina dei ki Elie azi ki Elise suma a nga tchola avun alum ma Jurdê-nina. 8Elie mi yo baru mam mba ngola, mi d’ud’ud’u, mi wat ki mbiyo aluma. Aluma mi wal lei aduk mbà, azi djak a djak sä woi abo hî kasezi sod’a.
9Kid’a azi djak sä woi abo hî d’a, Elie mi de mi Elise ala: Ang tchenen vama ang min an langzina avok ka bei Ma didina mi walan ki sed’enga.
Elise mi hulong dum ala: An min ala ang han ni muzuk mang ma djok vuna yang mbà.
10Elie mi dum ala: Ang tchen ni vama ad’enga á fed’ina. Wani ata yima Ma didina mi hlan akulona, le ang wanu ni, vama ang tchenema ang fumî fe. Le ang wan nga d’uo ni, vama ang tchenema ang fumî fe d’uo mi.
11Kid’a azi nga kur tita a nga yo seretnid’a, gol wani, pus ma akud’a kakulumei suma akud’a a mba a walazi adigaziya. Va máma mi hle tam d’igi pusâ na, akulumeina a nga tanamu. Ata yi máma na wat, a hle Elie sä akulo aduk mbirlimba. 12Ata yima Elise mi we hina na, mi er ad’um akulo ala: Iba! Iba! Pusâ hi Israel-lîna ki suma djangâma! Bugola, mi we Elie d’uo d’a. Kayam ndata, mi ve baru mamba, mi hawât tei aduk mbà. 13Bugola, mi yo baru d’a ngola hi Elie d’a tchuk kä d’a, mi hulong avun alum ma Jurdê-na. 14Mi yo baru d’a ngol ndata, mi wat ki mbiyo aluma, mi er ad’um akulo ala: Ma didina Alona hi Elie-na, mi nga ni lara ge? Ata yi máma mi wat mbiyo aluma. Aluma mi wal lei aduk mbà, mam djak abo hî.
15Adesâ hi suma djok vun suma a nga kaka Jeriko-na, a nga tchola sä woi hina dei, a nga gol vama Elise mi luma, a nga dala: Muzuk ma kak yam Elie-na, ki tchetchemba, mi djok wa yam Elise. A mba d’ugulomu, a grif kä avoromu, 16a dum ala: Ang gola! Ami azungeî mangâ nga ki suma ad’engâ dok vahl. Ami min sunuzi á hal salangâ. Dam ata yima Muzu’â hi Ma didinina mi hluma, mi gumza ni yam ahinad’a akulo, d’oze kä kur hora kla!
Wani Elise mi dazi ala: Agi sunuzi d’i!
17Wani azi tezem ped’et. Elise mi dazi ala: Le na ni, agi sunugiziya! Azi sun mazi suma dok vahl ndazina. Azi i hal Elie gak burâ hindi, a fum nga d’i.
18Kid’a azi hulongîd’a, a fe Elise avo Jeriko. Mam dazi ala: An dagi ala agi igi d’uo d’uo zu?
Elise mi mbut mbiyo ma Jeriko-na d’igila hirwiling
19Wani suma avo Jeriko-na a de mi Elise ala: Salamina, ang we aziyami kak djivid’a d’igi ang wum na, wani mbina nga djivi d’i, andagad’a nga d’i wul ahlena d’uo mi.
20Elise mi dazi ala: Agi hlanï taza ma awilina, agi tchugugï ndjuvuna kur mi. Azi hlumzï mi.
21Elise mi i ata yima mbina lawï kuana, mi tchuk ndjuvuna aduk mbina, mi dala: Gola! Ma didina mi dala: An mbut wa mbiyo máma d’igila hirwiling, nga mi tchi sa d’uo d’a, andagad’a nga d’i ba bei wul ahlena d’uo mi. 22Kayam ndata, mbina mi mbut d’igila hirwiling gak ini d’igi Elise mi de na.
Alona mi ngop gro andjof suma a san ad’u Elise-na
23Kid’a Elise mi tchol Jeriko á i Betel-la, kid’a mam nga glovot tua d’a, gro andjofâ a tcholï hur azì ma ngolâ, a nga san ad’um ala: Ang iza, ang ma yang yod’ina! Ang iza, ang ma yang yod’ina!
24Mi mbut iram mi goloziya, mi gazi vuna ki simiyê Ma didina. Ata yi máma amburei suma arop suma a yazi ala ursâ-na mbà, a buzugï aduk agud’a, a mba vik gugureina dok fid’i yam mbà adigaziya, a kizagazi woi mbambak. 25Bugola, Elise mi i yam ahina d’a Karmel-la, mi tchol kua, mi hulong avo Samari.
Currently Selected:
2 Amuleina 2: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
