2 Amuleina 1
1
LEU D’A WAL MBÀD’A
(a) MA DJOK VUNA ELISE
(1.1—8.15)
Alona ka sariyad’a yam Ahaziya
1Bugol matna hi Ahap-ma, suma Mowap-ma a tchol huneîd’a ki Israel suma a te kazina.
2Bur tu amulâ Ahaziya mi nga avo Samari kur gong mam mba yam ndrata akulod’a, mi tchoï ir fenetred’a, mi nde kä, mi dak ngola. Ata yi máma mi sun suma kur azì ma Ekron-na, mi dazi ala: Agi i djobogi Bäl-Zebup alo ma Ekron-na ala na ni kur dak ndata, an mba ni tchol akulo, d’oze ni tchol luo zu?
3Wani malaikana hi Ma didinina mi mba mi de mi Elie ma Tisbe-na ala: Ang i ngaf vun suma sunda hamul ma Samari-nina, ang dazi ala: Na ni Alona mi nga avo Israel luo ba, agi i djobogi Bäl-Zebup alo ma Ekron-na zu? 4Ni kayam ndata ba, Ma didina mi dala: Amul ma Israel-lâ mba mi tchol akulo kur azang ma mam nga burâ kama d’i, wani gagazi, mam mba mid’a. Elie mi i de zla ndata mi suma sunda hamulîna.
5Ata yi máma suma sunda a hulong gen amulâ Ahaziya. Mi djobozi ala: Ni kayam me ba, agi hulongôgï ge?
6A dum ala: Sana tu mi ngavami glovot mi dami ala: Agi hulongôgi gen amul ma sunugïna, agi dum ala: Wana ni zla d’a Ma didina mi data: Mi dala: Na ni Alona mi nga avo Israel luo ba, ang sun á djop Bäl-Zebup alo ma Ekron-na zu? Mi dami kua ala ang mba tchol akulo woi yam azang ma ang nga burâ kama d’i, wani gagazi, ang mba mid’a!
7Amulâ mi dazi ala: Sama ngavagi ma mi dagi sun ndatina, mi ni nana ge?
8Azi hulong dum ala: Sa máma ni ki baru d’a ngol la tumusa atamu, d’ik ma ba’â djinda furum mi.
Amulâ mi dazi ala: Ni Elie ma Tisbe-na.
Ahaziya nga mi hal lovota á ve Elie
9Amulâ Ahaziya mi sun azigar ma ngol ma azigarâ abom dok vahlâ ala mi i ki azigar mama ata Elie. Azi mbaza, a djak akulo yam ahina d’a Elie mi nga kaka kuad’a. Ma ngol máma mi dum ala: Ma djok vun Alona, amulâ mi dala: Ang tchugï aseng kä.
10 Elie mi hulong de mi ma ngol máma ala: Le an ni ma djok vun Alona ni, ar akud’a ti tcholï akulo ti ngalagi woi ki mang suma dok vahlâ! Ata yi máma na wat, akud’a ti tcholï akulo, ti nde yam ma ngol máma ki mam suma dok vahlâ, ti ngalazi woyo.
11Amulâ Ahaziya mi sun ma ngol ma ding ma azigarâ abom dok vahlâ ki mam suma dok vahlâ ata Elie kua. Ma ngol máma mi de mi Elie ala: Ma djok vun Alona, amulâ mi dala: Ang tchugï aseng kä atogo zak.
12Elie mi hulong dum ala: Le an ni ma djok vun Alona ni, ar akud’a ti tcholï akulo, ti ngalagi woi ki mang suma dok vahlâ! Ata yi máma na wat, akud’a hAlonid’a ti tcholï akulo, ti nde yam ma ngol máma ki mam suma dok vahlâ, ti ngalazi woyo.
13Á hindid’a amulâ Ahaziya mi sun ma ngol ma ding ma azigarâ abom dok vahlâ ki mam suma dok vahlâ. A djak akulo yam ahinad’a. Ata yima a mbaza go ki Elie-na, ma ngol máma mi tchuk guguvam kä avok Elie, mi tchenem ki hud’a ala: Ma djok vun Alona, ang tchan ki man suma dok vahlâ d’i; ami ni d’igi azungeî mangâ na. 14An we akud’a ti tcholï akulo, ti ngal azigar suma nglo suma mbà suma a mba avo’â woi kades mazi ma dok vahl dok vahlâ mi. Kayam ndata, an nga ni tcheneng ki hud’a, ang tchan ndi.
15Malaikana hi Ma didinina mi de mi Elie ala: Ang lum mandaram mbi. Ang tchuk aseng kä, ang i ki sed’emu. Elie mi tchugï asem kä ki azigar ma ngol máma, mi i gen amulâ.
16Elie mi de mamulâ ala: Ang gola! Ma didina mi dang ala: Kayamba ang sun suma á djop Bäl-Zebup alo ma Ekron-na d’igi Alona mi nga navo Israel á djobom zlad’a d’uo na d’a, ang mba tchol akulo woi yam azang ma ang nga burâ kuana d’i, wani gagazi, ang mba mid’a.
17Ahaziya mi mit d’igi Ma didina mi de mi Elie na. Gorom nga d’i; ni wiyema Joram ba, mi vrak tamula blangâmu. Kur biza d’a mbàd’a hi Joram Josafat goroma amul ma Juda-nid’a, Joram mi tamula.
18Sunda hi Ahaziya d’a ara kahle suma mi lazina, a b’irizi nga kä kur Mbaktum mba de zlad’a yam Sunda hAmulei suma Israel-lîd’a.
Currently Selected:
2 Amuleina 1: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
