2 Amuleina 3
3
Joram mi tamula yam Israel-lâ
1Kur biza d’a dogo yam klavandi d’a Josafat amul ma Juda-na nga mi tamulid’a, Joram Ahap goroma mi kak amula yam Israel-lâ. Mi tamula avo Samari bizad’a dogo yam mbà.
2Mi lahle suma tchona avok Ma didina, wani mi le nga tcho d’a abum azi kasum a lata pet ti. Kayam mi to ahina d’a tchet ta abum mi tinit á kud’or alo ma a yum ala Bäl-lâ woyo. 3Wani mi wal nga ki tcho d’a Jerobowam Nebat goroma d’a mi lat mi zut ki Israel-lâ a le tchod’id’a woi d’i.
A i á dur ambas sa Mowap-pa
4Mesa amul ma Mowap-ma, mi nga ki tumiyôna. Bizad’a tu nga mi he gro tumiyôna 100.000 ki tumiyôna tazid’a 100.000 ki tumuzuzi mamul ma Israel-lâ tara. 5Wani kid’a amulâ Ahap mi mit da d’a, Mesa mi tchol huneîd’a ki Joram amul ma Israel ma vrak tamulina. 6Ata yi máma amulâ Joram mi nde woi avo Samari, mi ar azigar suma Israel-lâ pet a kal avorom á goloziya. 7Bugola, mi ge sunda, mi de mi Josafat amul ma Juda-na ala: Amul ma Mowap-ma mi tchol huneîd’a ki sed’enu. Ang min i ki sed’en á dur ambas sa Mowap-pa zu?
Josafat mi hulong dum ala: Ang ki an ei ni tu d’uo zu? Sum mangâ ki sum mana a ni tu, akulumei mangâ kakulumei mana a ni tu mi.
8Josafat mi dum kua ala: Ei mba hlei ni lovot ta lara ge?
Ata yi máma Joram mi hulong dum ala: Ei mba hlei ni lovot ta hur ful ma Edom-mid’a.
9Amul ma Israel-lâ kamul ma Juda-na kamul ma Edom-ma a i ki azigar mazina. A ngui tita gak burâ kid’iziya, wani ablaud’a hi azigarîd’a ki d’uwar ma nga mi zi ahle suma dur ayîna blogozina a nga fe mbiyo ma tched’a d’i. 10Ata yi máma amul ma Israel-lâ mi er ad’um akulo ala: Alë! Alë! Alë! Ma didina mi yï ei amulei suma hindina ka hî ná hei abo amul ma Mowap-ma!
11Wani Josafat mi djop ala: Na ni ma djok vuna hi Ma didinina mi nga ka hî tala ei i djobei Ma didina atamu d’a d’uo zu?
Azongâ hamul ma Israel-lîna tu, mi hulong dum ala: Elise Safat gorom ma mi le sunda adjeu abo Elie-na, mi nga.
12Josafat mi hulong dum ala: Djiviya! Sa máma ni ma zlad’a hi Ma didinid’a ti nga avunama. Ata yi máma amul ma Israel-lâ kamul ma Juda-na kamul ma Edom-ma a i fe Elise.
13Elise mi de mamul ma Israel-lâ ala: Vama ndolong ki sed’en ni me ge? Ang i djop suma djok vuna habungâ d’oze suma hasungâ.
Amul ma Israel-lâ mi hulong dum ala: Nga na d’i! Ni Ma didina ba, mi yami ami amulei suma hindina ka hî á hami abo amul ma Mowap-ma.
14Elise mi dum ala: Avok Alo ma bei matna ma ad’engêm kal pet ma an nga ni lum sundina, an nga ni dangû, ladjï Josafat amul ma Juda-na mi nga d’uo ni, an nga ni djib’er kang ang ngi, ni golong nguo ko! 15Wani mi de kua ala: Ki tchetchemba, agi yanï sama bu adingâ. Ata yima sama bu adingâ mi nde bu adingîna, ad’enga hi Ma didinid’a ti mba yam Elise.
16Mi dazi ala: Gola! Ma didina mi dala: Agi djugud’ogi zula ablaud’a kä kur hora. 17Ma didina mi de kua ala: Agi mba humugi simetna d’i, agi mba wagi alo ma sed’a d’uo mi, wani hor ra wanda mba d’i oî ki mbina. Agi mba tchagi mbiyo máma ki d’uwar magina mi.
18Wani Elise mi dazi kua ala: Ni vama akid’eina ir Ma didina. Mba mi hagi ambas sa Mowap-pa abogi mi. 19Agi mba togi azì ma nglo ma ad’eng ma ngunguna kä woi pet kazì ma nglo ma djif ma kalâ kä woi pet, agi mba kagi agu ma vuta kä woyo, agi mba tozogi ir mbiyo ma laud’a woyo, agi mba b’lagagi asine ma suma a nga zumuma woi kahinad’a pet mi.
20Tcha ndjivin ki ler ra a hahle suma ngat buzuna kuad’a, mbina mi tcholï djangâ kur ambas sa Edom-mba, mi oî yam andaga ndata pet. 21Kid’a suma Mowap-ma a hum ala amulei ndazina a mba nga á duruzi ayîna d’a, amul ma Mowap-ma mi tok suma bizazi ndak á yo ahle suma dur ayînina ki suma bizazi kalâ pet, a i tchol sä ir hagad’a. 22Kid’a azigar suma Mowap-ma a tchol akulo yorogod’a, afata ti nde wile yam mbina. Azi golom sä woi hina dei hleud’a d’igi buzuna na. 23A dala: Ni buzuna! Amulei ndazina a dur wa taziya, nge nge pî mi tchi wa wiyema! Ei i hurumi ahle mazina!
24Wani kid’a azi mba go ki kangâ hi Israel-lîd’a, azigar suma Israel-lâ a nde atazi durâ. Wani azigar suma Mowap-ma a wet ringâ, Israel-lâ a zirik kazi mi, gak a tchuk kur ambas sa Mowap-pa ki ringâ, a tchaziya. 25Azi b’lak azì ma nglona kä woyo, a dur ahuniyôna kur asine ma azi nga zumuma gak ahinad’a oî woi hur asinena, a tos ir mbiyo ma laud’a woi pet, a ka agu ma vuta woi pet mi. Wani azì ma Kir-Hares-sâ mi arî mam hol, wani azigar suma dur ahinad’a a mba nguyum a durumu. 26Ata yima amul ma Mowap-ma mi wala ayî máma kal kamu d’a, mi tok azigar suma a dur ki mbigeu d’a fiyakina kikis kid’iziya á ge lovota á famul ma Edom-ma, wani azi ndak ki. 27Ata yi máma amul ma Mowap-ma mi ve gorom ma ngol ma mba mi vrak tamula blangâma, mi hum vama ngat buzu ma ngala yam gulumuna hazinina. Kayam ndata, Israel-lâ huruzi zal ngola. Kayam ndata, a tchol a hulong avo hataziya.
Currently Selected:
2 Amuleina 3: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.
