Proverbios 19
19
1Va'a‑ka visi kúnda'vi kúkee o ma
te ndimaa sa'a o ja va'a ja ndaa ma,
sana ja kava ndee xeen ini o ma
te ko kuu o in ñayii tnu'u ja ndimaa xnda'vi o ñayii ma.
2Masu nde jiniñu'u nú ma kani va'a ini ñayii ma
te keja'a i sa'a i nawa ñu'u ini i ja sa'a i ma,
vaa nú ñama ñama‑ni sa'a o sukan ñu'u ini o ma
chi masu kee va'a ja sa'a o ma.
3Ñayii ndee xeen ini ma chi ja sukan kúu maa i ma,
te ñatuu kée va'a ndaka ja sa'a ja kúu i ma,
te ndákiti ini i te ndáxtekuechi i Su'si ma
ja kuechi ya kúu ja sukan ndó'o i ma.
4Ñayii ni'i tna'a ma
chi ûni kua'a xeen ñayii ka ketna'a ini ji'in i,
kovaa ñayii kúnda'vi kúkee ma
chi onde ñayii ka ketna'a ini ji'in i ma ka xndoo ña'a.
5Ñayii ka kukanu ini ñayii ja ndakani ndaa i nawa ni jini i ma
te ma ndaka'an ndaa i ma
chi ma kaku maa i chi ndo'o neni i ja sukan sa'a i ma.
Suni ñayii ká'an tnu'u ma
chi masu yanduu ja onde ndo'o neni maa i.
6Ñayii kúxiku ma te wa'a i nawa ka jiniñu'u ñayii ma
chi ûni ndaka ñayii ma ka kuni ja jin ketna'a ini i ji'in ñayii xiku ma.
7Nú ñayii kúnda'vi kúkee ma, te onde tna'a i ma ka saxiko ña'a,
kuiti ka'vi‑ka jin sa'a ña'a ñayii ka ketna'a ini ji'in i ma,
vaa visi na kakan‑ta'vi maa i nuu ñayii yukan ja jin chindee ña'a i,
kovaa su'va jin kujika‑ka i jin koo i.
8Ñayii ni jaku'ni ini tnu'u ndichi ma te sa'a i sukan ká'an ma
chi ja kútoo i maa i kúu ja ndí ini i ja koo va'a i ma.
9Ñayii ñatuu ndakani ndaa nawa ni jini i ma
chi ma kaku maa i chi onde ndo'o neni i ja sukan sa'a i ma,
te suni ñayii játna ini ja ka'an tnu'u i ma
chi masu yanduu ja onde ndo'o neni tna maa i ja sukan sa'a i ma.
10Masu va'a‑ni ja ñayii so'o xeen kaa ma,
te ko ni'i ko tna'a i kua'a ja vii ja va'a ma,
te ni masu va'a‑ni ja ko tatnuni i nuu sa'ya tee ka ndanuu ma.
11Ñayii ndichi te ndasa'a i kuenda ma
chi kutu'va i ja kava kuee ini i,
te jayiñu'u i kúu ja ni sakanu ini i
ja u'vi ni sa'a ña'a in‑ka ñayii ma.
12Sukan kúu yu'u ndika'a ma
sukan kúu rey ma nuna ndakiti ini de ma,
kovaa nuna kunda'vi ini de ñayii ma
chi sukan kúu ora núu yuyu xtnee ma,
sukan na'a ja nda'vi ini de ma.
13Tee neva'a sayii de ma te so'o xeen kaa i ma
chi sa'a i ja kendoo nda'vi kendoo kee ve'e de ma,
te tee neva'a ñasi'i de ja ndimaa kanaa ña'a ji'in yii ña ma
chi sukan kúu nuu jí'in ve'e ma te xtivi i ndatniñu ma,
sukan kúu ña.
14Xu'un ma ji'in ve'e ma
chi ja nduta'vi tee ma nuu yuva de, nuu si'i de ma kúu,
kovaa ja ñasi'i de ma te in ña'a ndichi kúu ña ma
chi maa Su'si ma ni skuta'vi ña'a.
15Ñayii kuxi ma chi játna ini i ja kusu xeen i,
te ja sukan kúu i ma chi ko kokon ko yichi i.
16Ñayii kandija te sa'a i sukan ni tatnuni Su'si ma
chi kaku i nuu ja u'vi ma te koteku i,
kovaa ñayii saxiko tnu'u ni tatnuni Su'si ma
chi kûu i te skenaa i maa i.
17Ja chíndee o ñayii nda'vi ma
chi kuenda tnu'u ja in ja wanuu o nuu Su'si ma kúu,
te maa ya ja kúu ya Iya Tátnuni ma
ndataa nuu o ja va'a ni sa'a o ma.
18Ndaka'an‑so'o ni'i ni nuu sa'ya ni ma
vitna ja iyo‑ka i ja koniniso'o i tnu'u kuña'a ni ma,
te máko ko kasiyu'u ni ja u'vi sa'a i ma,
te ko kuu kuechi tna ni ja kûu i ma te skenaa i maa i ma.
19Ñayii yachi‑ni ndákiti ini i ma chi ndo'o neni maa i,
te nuna chindee o i ja na ya'a i nuu tnundo'o yukan ma,
masu va'a‑ni ja sa'a o sukan ma
chi ja chindee o i ja na ndasa'a‑ka tuku i
in‑ka jichi ja u'vi ma kúu.
20Ñayii kuan‑ta'vi ja ka ndaka'an‑so'o i nuu i ma
te ma ndakone'e xiko i ja sukan ni ka jiña'a ñayii ma
chi kutu'va i ja ko kuu i in ñayii ndichi.
21Kua'a xeen ja jani ka'vi ini ñayii ma ja sa'a i,
kovaa yika‑ni ja ja kúu ini maa Su'si ma kúu ja ko kuu.
22Ja játna ini ñayii ma kúu ja ndaka o,
te kava va'a kava nda'vi ini o,
te va'a‑ka ja ko kunda'vi ko kukee o
sana ja kava tnu'u o ma.
23Ja koyu'u o Su'si ma te ma ko sa'a o ja u'vi ma
chi chindee ña'a i ja koteku o ni‑kani ni‑jika,
te maa ya sa'a ja kusu sii ini o te ndatatu o,
te ni‑in tnundo'o ma kenda nuu iyo o ma.
24Ñayii kuxi ma chi chúnee‑nka tna i nda'a i nuu ko'o ma,
kovaa ni masu ndí ini i nawa ni ni'i i ma.
25Suchi ñatuu ka jandetu nuu yuva i ma te kani de i ma
chi jin kuni jaku‑ka i ma, te jin koyu'u i,
te ma jin sa'a‑ka i ja u'vi ma,
vaa suchi ndichi ma chi ndaka ja na ndaka'an‑so'o o nuu i ma,
sani te jaku'ni ini i ja sa'a i ja va'a ma.
26Suchi sakui'na yuva i te chúnee i si'i i ma ichi ma
chi ja kan‑nuu xeen kúu ja sukan sa'a i ma,
vaa masu nde jiniñu'u ja sa'a ja kúu i ma.
27Sa'ya maa ri, nuna saxiko ro tnu'u va'a ka ka'an‑so'o i nuu ro a
chi ma ni'i ini ro naxe ko kuu ro kivi ki'in o a.
28Ñayii masu ndákani ndaa sukan ni jini i ja ni kuu ma,
ja sukan sa'a i ma chi ja jakundendee‑ni i tee ka ja'nde tniñu ma kúu,
te ja sukan sa'a i ma chi chisa'vi i ñayii ka sa'a ja u'vi ma,
te ka sa'a‑ka maa ñayii ma ja u'vi ma.
29Jâ iyo tu'va ja jin ndo'o jin neni ñayii ka jatna ini
ja ma jin ka'an ndaa i ma,
te suni jâ iyo tu'va yutnu xii
ja jin ndo'o jin neni ñayii inundee ini ma.
Currently Selected:
Proverbios 19: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
