Proverbios 18
18
1Ñayii ndiyo ini ma
chi ñu'u ini i ja koo va'a maa i ma‑ni,
te ni ñatuu jan‑ta'vi i ja ka ka'an‑so'o ñayii ma nuu i ma.
2Ñayii so'o xeen kaa ma
chi ñatuu nde ndí ini i naxe jakun‑tnuni‑ka ini i
te ko kuu i in ñayii ndichi ma,
yika‑ni ja nde a jini i ma te kúvixi i.
3Ñayii sa'a ja u'vi ma chi ka saxiko ña'a ñayii ma,
te ndátna'a maa i ja kan‑nuu ja sukan vixi kaa i ma.
4Tnu'u ká'an ñayii ndichi ma,
sukan kúu nuu ñu'u kua'a ndute ma
xi sukan kúu nuu tóo kua'a de ma,
sukan ka kuu tnu'u ká'an i ma.
5Masu va'a‑ni ja tee ja'nde tniñu ñayii ma,
te kuji'in de ji'in ñayii iyo kuechi ma,
te xtekuechi de ñayii ñatuu na kuechi ma.
6Ñayii so'o xeen kaa ma chi tnu'u ká'an i ma‑ni,
te sa'a i ja skiti tna'a ini i ji'in ñayii ma,
te maa tnu'u ká'an i ma sa'a ja jin sa'a ndeva'a ña'a ñayii ma.
7Ja ká'an ñayii so'o xeen kaa ma
chi nukun‑tuu maa i ndaka ja u'vi ká'an i ma,
te ndando'o ndaneni maa i.
8Ñayii tnu'u ma, ñayii ndúku cuentu ma
chi ûni vivii ká'an i ja ndákani i nuu in‑ka ñayii ma,
te sa'a i ja kénda onde ini anua ñayii ma ja jiña'a i ma.
9Ñayii kuxi te ñatuu satniñu va'a i ma
chi inuu kuiti kúu i ji'in ñayii ndákana in ja iyo va'a ma.
10Su'si ma chi sukan kúu in ve'e núkuiñi vava'a kúu ya
nuu ñayii sa'a ja va'a ja ndaa ma,
vaa nuu maa ya ma jinu i kua'an i,
ja na kaku i nuu ja u'vi ma te koo va'a i nuu ya.
11Ñayii xiku ma chi kúkanu ini xeen i ja neva'a i ma,
te jani ini i ja sukan kúu in ñuu
nuu ndesi vava'a ni‑ka'nu yu'u ñuu ma
ja ñatuu na in kuu kivi ma,
sukan jani ini i ja kúu ja kúxiku i ma.
12Ñayii kúvixi xeen ma
chi ja ndetu ña'a kúu ja skenaa ndi'i i ja neva'a i ma,
kovaa ñayii jani ini ja masu ñayii kanuu kúu i ma
chi ja ndani'i i ma kúu jayiñu'u i.
13In ja kan‑yu'u ja kan‑nuu kúu
ja ndákone'e yachi ñayii ma
te ñatuu ndetu i ja koniniso'o i te jinu ka'an in‑ka ñayii ma.
14Ñayii ndimaa iyo sii ini i ma
te ñatuu nde ndaa ndivi ini i visi ku'u i ma
chi ñatuu xtaya i,
kovaa ñayii ja'nde ini ja ma kuu‑ka i ma
chi masu na‑in kuu chindee ña'a ja ndani'i i tnu'u kanu ini.
15Ñayii jáku'ni ini ma chi ndí ini i ja kutu'va‑ka i,
te ñukuun‑ka niniso'o i tnu'u ndichi ka ka'an ñayii ndichi ma.
16Ñayii yinda'a yija'a ja kua'a i ñayii jito ye'e ma
chi chindee ña'a ñayii yukan ja kenda i
onde nuu ka iyo ñayii ka ndanuu ndánduku i ma.
17Ñayii kénda xinañu'u nuu tee ja'nde tniñu ma
te jiña'a i ja masu na kuechi i ma
chi kuenda tnu'u ja ndija i ja ká'an i ma,
kovaa nuna kenda in‑ka ñayii ma
te ndaka'an i ja masu ndija ñayii ni kenda xinañu'u ma,
sani te ndatuu ndaa maa i ja masu ndija i.
18Nú uu tee ka ndanuu te ka skiti tna'a ini de
ja ndunduu de ka jani ini ja va'a‑ni ka ñu'u ini de ja jin sa'a de ma,
kovaa nuna jin chu'un de suerte kóto nde de kundee ma,
sani te jin kendoo va'a ini nduu de.
19Suchi ndákiti xeen ini ja ni skiti ña'a ini ñani i ma
chi masu ndakune i anua i ma ja jin ndumani i,
su'va sa'a ndee‑ka i ini anua i ma sukan ndesi va'a in ñuu ma,
te ja sukan ka kuu i ma chi su'va jin kujika nuu tna'a‑ka i.
20Ndeva'a‑ni na tnu'u ká'an maa ñayii ma te sukan ndani'i i,
nú ká'an i tnu'u va'a te ndani'i i ja vii ja va'a,
te nú ká'an i ja u'vi te ndani'i i ja u'vi.
21Vaa nuna ka'an maa ñayii ja va'a ma te koteku kani i,
kovaa nú ma ko koto va'a maa i tnu'u ká'an i ma
chi maa tnu'u ká'an i ma sa'a ja kûu‑ni i.
22Suchi jaa ní'i ñasi'i ma
chi in ja vii ja va'a ni kuta'vi i,
vaa ni kunda'vi ini Su'si ma i,
te ni skuta'vi ya i ñasi'i i ma.
23Ñayii kúnda'vi kúkee ma
chi ká'an vii ká'an va'a ká'an kuee i,
kovaa ñayii kúxiku ma
chi ndákone'e jatu ndákone'e kini i nuu ñayii ma.
24Ñayii iyo in ñayii kétna'a ini ji'in i ma
chi vivii ka chindee tna'a i,
te iyo nuu kúu chi va'a‑ka ka iyo i ji'in suchi ka ketna'a ini ji'in i ma
sana in ñani maa i.
Currently Selected:
Proverbios 18: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
