Proverbios 17
17
1Va'a‑ka kúu ja visi xita yichi‑ni na kaa o
te koo sii ini o ve'e o ma
sana ja koo kua'a ja kaa ja ko'o o
te ndimaa koo tnu'u jatu tnu'u ndi'vi.
2In ñayii ndichi ma, te visi suchi jinukuechi kúu i ma
chi kuu tatnuni‑ka i
sana sa'ya jito'o i ma ja so'o xeen kaa i nuu de ma,
te ora jin ni'i sa'ya jito'o i ma ta'vi i ma
chi suni ni'i tna suchi jinukuechi ma ja kuu ta'vi i.
3Oro ma ji'in plata ma chi nuu ñu'u ma ja'an i
sukan‑va'a kuni o nú iyo nanimaa i,
kovaa Su'si ma chi ora ndó'o néni o ma,
te jini ya naxe ka iyo ini anua o a.
4Ñayii sa'a ja u'vi ma ji'in ñayii tnu'u ma
chi játna ini i ja koniniso'o i
ja ka ka'an ñayii ka sa'a ja u'vi ma.
5Ñayii jákundee ñayii nda'vi ma
chi sa'a i ja ndákiti ini Su'si iya ni sa'a ña'a ma,
te ñayii kúsii ini ja jini i sukan ndó'o néni in‑ka ñayii ma
chi masu yanduu ja ndaxndo'o ndaxneni ña'a Su'si ma.
6Jayiñu'u ñayii nija'nu ma ka kuu sañani i ma,
vaa ka sa'a suchi kuechi ma ja ka iyo sii ini ta'nu i ma.
Te suchi kuechi ma chi ka iyo sii ini i ja ka iyo yuva i ma
te ka sa'a de ja va'a ma.
7Ñayii masu ndása'a kuenda ma
te vivii ká'an i te ndúku i ja xnda'vi i in‑ka ñayii ma,
chi ma kee va'a i.
Te ni a tee tátnuni ma te ma ka'an ndaa de te xnda'vi de ñayii ma,
masu kee va'a tna de.
8Ñayii ni kaan ja ndimaa wa'a i xu'un in‑ka ñayii ma
te ní'i i nawa kúni i ma,
chi jani ini i ja iyo xeen tnu'u ndatnu i,
vaa ndimaa kúndee i ní'i i ndaka nawa kúni i ma.
9Ñayii sákanu ini ñayii ni sa'a ndeva'a ña'a ma
chi ja ndúku i kúu ja koo mani i ji'in ñayii yukan,
vaa kútoo i ñayii ma,
kovaa ñayii nuu‑ni nuu‑ni ndákune'e i ja ni sa'a ña'a in‑ka ñayii ma
chi masu kua'a‑ni, sani te masu na in ketna'a‑ka ini ji'in i.
10Ñayii ndása'a kuenda ma
chi ja ka ndaka'an‑so'o ñayii ma nuu i ma,
sani te jáku'ni ini i,
kovaa ñayii ndee ini ma
chi visi cientu jichi na jin kua'a ña'a i yutnu xii
chi masu jaku'ni ini i.
11Ñayii kívi nduu kívi ni'ni ma
chi ndimaa ndúku i na in kanaa ji'in i,
te ja sukan sa'a sukan kúu i ma
chi kenda in ñayii kene'e ta'vi ña'a.
12Va'a‑ka ja nukun‑tna'a o ji'in in kiti yuku kiti xeen ma
sana ndatna'a o ji'in in ñayii ñatuu nini nawa ka'an o ma
te ûni sa'a maa i ja u'vi ñu'u ini i ma.
13Ñayii ndasa'a ja u'vi ja kuu ñayii sa'a ña'a ja va'a ma,
nanimaa ja u'vi koo ve'e i ma.
14Ñayii skeja'a ja kanaa i ma
chi kuenda tnu'u ja ni ndakune i in nuu ñu'u ndute kua'a xeen ma
te kua'a ja xnaa de ma, sukan kúu i,
kovaa yo'o chi va'a‑ka ja kakayata o nuu ñayii yukan
sana ja kuka'nu‑ka te kanaa o ji'in i.
15Saxiko Su'si ma ñayii kúji'in ji'in ñayii sa'a ja u'vi ma
xi ñayii xtekuechi ñayii ñatuu na kuechi ma
ja na chunaa i in ja masu ni sa'a i ma.
16Ñayii ndee xeen ini ma
chi masu nde jiniñu'u ja neva'a kua'a xeen i xu'un i ma,
vaa ni masu kuu kuaan i tnu'u ndichi Su'si a ji'in xu'un i ma,
vaa ni masu jaku'ni ini i ma.
17Ñayii kétna'a ndija ini ji'in in‑ka ñayii ma
chi ni‑kani ni‑jika kútoo i ñayii yukan,
te kivi kénda tnu'u xii ini ma
chi ka chindee tna'a i kuenda tnu'u ja ndi-tna'a ñani i.
18Ñayii kúu yunuu in‑ka ñayii jikan yika nawa kúni i ma
chi in ñayii ñatuu jáku'ni ini kúu i ja sa'a i sukan,
vaa nú ma ndachunaa ñayii ma chi maa i kuiso.
19Ñayii játna ini ja kanaa i ma
te su'va su'va ndúku i ñayii xtna'a i ma,
te ja sukan kúu maa i ma
chi masu ndóñu'u na in kene'e ta'vi ña'a.
20Ñayii nde'e xeen kaa ini ma
chi masu kee nawa ñu'u ini i ja sa'a i ma,
te ja sukan ká'an tnu'u i ma,
te jákun‑nee i nuu ja u'vi ma.
21Ñayii kúu yuva suchi so'o xeen kaa ma
chi ndimaa tnu'u xii ini koo i sa'a sa'ya i ma,
te ñatuu na tnu'u sii ini koo nuu i
ja sukan ndee ini sa'ya i ma.
22Ja koo sii ini ini anua o ma
chi kuenda tnu'u ja in jatatna kúu i nuu yikikuñu o ma,
kovaa nú nanimaa tnu'u xii ini koo ini anua o a
chi onde yiki o ma xsichi i.
23Ñayii sa'a ja u'vi ma
chi játna ini i ja yuyu'u‑ni tnii i xu'un ma,
te masu ka'nde ndaa i tniñu
ñayii ni sa'a ja u'vi ma.
24Ñayii jáku'ni ini ma
chi ndí ini i naxe ni'i‑ka i tnu'u ndichi Su'si ma
te ni'i ini i naxe koo i ñuu ñayivi a,
kovaa ñayii sa'a so'o nuu Su'si ma
chi jani ya'a jani yukan‑ni ini i,
te masu ñu'u ini i ja koo va'a i nuu Su'si ma.
25Tee neva'a sa'ya de suchi so'o xeen kaa ma
chi sa'a i ja ndákiti ini yuva i ma
te kúkan‑nuu de ja sukan kúu i ma,
te sa'a i ja kúxii xeen ini si'i i ma.
26Masu va'a ja xndo'o o ñayii masu na kuechi ma
te sa'a o ja chunaa i in ja masu nawa ni sa'a i ma,
ni a sa'a ndeva'a o ñayii kanuu ma te sa'a i ja va'a ma.
27Ñayii ndichi ma
chi kánda i te masu ká'an yachi i
te kaa kuee xeen ini i,
vaa ñayii ndichi kúu i.
28Nawa kúu ja onde ñayii so'o xeen kaa i
te ñatuu jáku'ni ini i ma
te iyo ora nawa ndáku ma te ñatuu ká'an kuiti i ma,
chi ka ka'an ñayii ma ja in ñayii ndichi kúu tna i.
Chukan kúu ja ñayii kánda‑ka ma te jasiyu'u‑ka i ma
chi ñayii ndichi kúu i.
Currently Selected:
Proverbios 17: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
