Proverbios 16
16
Tnu'u ndichi Su'si ma chi chindee ña'a i ja ko kuu o in ñayii sa'a ja va'a ja ndaa
1Ñayii ma chi kua'a xeen ja jani ini i
ja kuu sa'a i,
kovaa maa Su'si ma kúu Iya ka'an nú ko kuu
sukan jani ini i ma xi ña'a.
2Ndaka ja sa'a ja kúu ñayii ma
chi jani ini maa i ja ja va'a‑ka kúu nuu Su'si ma,
kovaa maa ya
chi jini ndaa ya nú ja va'a kúu xi ña'a.
3Va'a‑ka sonee o nuu nda'a Su'si ma
nde a jani ini o ja sa'a o ma
te maa ya sa'a ja ko kuu sukan jani ini o ma.
4Ndaka ja ni sa'a ya ñuu ñayivi a
chi jâ ni jani ini ya naxe jin ko kuu i te ni sa'a ya ma,
nawa kúu ja onde ñayii sa'a ja u'vi ma
chi jâ ndetu ña'a kivi ndachunaa i ja u'vi sa'a i ma.
5Su'si ma chi saxiko ya ñayii inuvixi xeen ka ndaa i ma
te ka jani ini i ja maa i ka kuu‑ka ma,
te ja sukan ka sa'a i ma
chi masu yanduu ja ndaxndo'o ndaxneni ña'a Su'si ma,
vaa iya sa'a ndaa kúu ya.
6Ñayii ûni kútoo ndija Su'si ma te sa'a i ja va'a ja ndaa ma
chi ñatuu na kuechi kondiso i nuu Su'si ma.
Ñayii yu'u Su'si ma ja iya ndákan kuenda kúu ya ma
chi xndoo i ichi u'vi ma.
7Vaa Su'si Iya Tátnuni ma,
nuna játna ini ya ja sukan sa'a sukan kúu ñayii ma
chi sa'a ya ja onde ñayii kúni u'vi nuu i ma ndumani ji'in i.
8Va'a‑ka ja visi vala‑ni na ni'i o nú sa'a ndaa sa'a ndija o ma
sana ja ni'i kua'a o ma te sakui'na o ma.
9Ñayii ma, jani ini i nawa sa'a nawa kuu i ñuu ñayivi a,
kovaa maa Su'si ma kúu iya ndaskaka va'a ña'a ichi ndaa ma.
10Rey tee netniñu ma chi maa Su'si ma ni jani ña'a,
te iyo de ja ka'nde ndaa de tniñu ñayii ma.
11Ja játna ini Su'si ma kúu ja chikua'a ndaa ñayii nawa xiko i ma,
vaa maa ya ni sa'a sukan chikua'a o ma.
12Rey tee ka netniñu ma, masu ka jatna ini de ja u'vi ka sa'a ñayii ma,
vaa nuu ka nukoo ka nukuiñi de ma
chi ndimaa ja va'a ja ndaa iyo ja jin sa'a de,
vaa sukan, te jin koo va'a de ñuu de ma.
13Rey tee ka netniñu ma
chi ka jatna ini de ja jin ka'an ndaa ñayii ma,
te ûni ka kutoo de ñayii ñatuu ká'an tnu'u ma.
14Rey tee netniñu ma chi nuna ndakiti ini de
chi kuu tatnuni de ja jin ka'ni i ñayii ma,
kovaa in ñayii ndichi ma chi kuu sa'a i ja ndukuee ini de.
15Nú iyo sii ini rey tee tátnuni ma
chi iyo tnu'u kanu ini ja jin koo va'a ñayii ñuu de ma,
te ja sukan kúu de ma
chi kuenda tnu'u ja in viko sa'a ja vivii kúun savi ma
te vivii ndukuii ma,
sukan kuu de.
16Va'a‑ka kúu ja ko ndi ini o ja ko kuu o in ñayii ndichi ma
sana ja ni'i o kua'a oro ma,
te va'a‑ka kúu ja jáku'ni ini o sukan kúni Su'si ma
sukan‑va'a ni'i ini o naxe ko sa'a ko kuu o
sana ja ni'i kua'a o plata ma.
17Ñayii sa'a ja va'a ja ndaa ma
chi ûni ndí ini i ja kakayata i nuu ja u'vi ma,
vaa ñayii jito va'a maa i ja ñatuu na ja u'vi‑ka sa'a i ma
chi kaku i te ma skenaa i maa i.
18Ñayii jani ini ja maa i kúu‑ka ma
chi ja ndetu ña'a kúu ja skenaa i maa i ma,
te ñayii kúvixi xeen ma
chi ni masu kee va'a ja jani ini i ja sa'a i ma.
19Va'a‑ka ja na kani ini o ja masu nawa kúu o
te koo o ne'un ñayii nda'vi ma,
sana ja ko ni'i ko tna'a o ma
te koo o ne'un ñayii ka jani ini ja maa i ka kuu‑ka ma.
20Ñayii niniso'o ñukuun i tnu'u Su'si a
chi ja jani ini i ja sa'a i ma chi kee va'a te koo va'a‑ka i.
¡Naka vii naka va'a kúu ñayii kúkanu ini Su'si o Iya Tátnuni a!
21Ñayii ndichi ma chi ñayii jáku'ni ini kúu i,
vaa tnu'u vii tnu'u va'a ká'an i ma,
te sa'a i ja ka ndundichi‑ka ñayii ka niniso'o ja ká'an i ma.
22Ñayii ndichi ma chi ja ndetu ña'a ja ni'i i kúu
ja koteku kani i,
kovaa ja ni'i maa ñayii so'o xeen kaa ma kúu
ja ndando'o ndaneni i ja u'vi sa'a i ma.
23Ñayii ndichi ma chi kaji kaji‑ni i tnu'u va'a ká'an i,
te tnu'u ká'an i ma káxtnu'u ja ñayii jini nawa sa'a i ma kúu i,
24vaa kuenda tnu'u ja sukan asi jaa nduxi ñuñu ma,
sukan ka kuu tnu'u vii tnu'u mani ká'an ñayii ma,
vaa sa'a i ja ndusii ini yikikuñu o.
25Ka iyo jaku ñayii chi ka jani ini i
ja ichi va'a ma kuan koo i,
kovaa masu nde ka ndasa'a maa i kuenda
ja ndita ndita ichi nuu jin skenaa i maa i ma kuan koo i.
26Ñayii kokon ma chi ja kokon i ma sa'a ja satniñu xeen‑ka i,
sukan‑va'a ni'i i ja kaa i ma.
27Ñayii nanimaa ja u'vi ñu'u ini anua i ma
chi ndimaa jani ini i naxe sa'a‑ka i ja u'vi ma,
te sukan sa'a ñu'u káyu kóko ma
ja xnaa ndi'i i nawa iyo nuu káyu ma,
sukan ka kuu tnu'u ká'an i ma,
28vaa ñayii sa'a nanimaa ja u'vi ma
chi sa'a i ja ka kanaa ñayii ma,
te ñayii tnu'u ma
chi sa'a i ja ka ndakiti ini nuu tna'a ñayii ka ketna'a ini ma.
29Ñayii nde'e xeen kaa ini ma
chi xnda'vi i in‑ka ñayii ma
te skaka i ñayii ma ichi u'vi ma,
30te ndákueni kutu kutu i te jani ini i ja u'vi‑ka sa'a‑ka i,
te nú jâ ni sa'a i ja u'vi ma
chi ndákayi'i vava'a i ñii yu'u i ma‑ni.
31Ñayii jâ ni kuu nija'nu te jâ ni vixi xini i ma
chi jayiñu'u kúu nú ni yo sa'a i ja vii ja ndaa ma.
32Ja va'a kúu ja kava kuee ini o ma
sana ja ko kuyachi ini o te ndimaa ko kanaa o ma,
te ja va'a‑ka kúu nú kúndee o kánda o te kaa kuee ini o ma
sana ja kundee o tatnuni o nuu ñayii kua'a iyo in ñuu ma.
33Ñayii ma chi ja ñu ini maa i‑ni te jani ini i naxe sa'a i ma,
kovaa masu nde ndása'a i kuenda
ja Su'si ma kúu iya ka'an nú saa xi ña'a.
Currently Selected:
Proverbios 16: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
