Proverbios 15
15
1Nú tnu'u vii tnu'u kuee kúu
tnu'u ndákone'e o nuu ñayii ndákiti ini ma
chi ndiko ini i,
kovaa nú tnu'u xiko tnu'u ndi'vi ma na ndakone'e o
chi su'va ndakiti‑ka ini i.
2Ñayii ndichi ma chi ndimaa tnu'u vii tnu'u va'a,
tnu'u kuatniñu o ká'an i,
kovaa ñayii so'o xeen kaa ma
chi ndimaa tnu'u ndeva'a tnu'u kini ma, tnu'u masu nde kuatniñu o
kúu tnu'u ká'an i ma.
3Su'si Iya Tátnuni ma chi nde'ya nde'ya‑ni ya ni‑ka'nu ñuu ñayivi a,
te jini ya nawa ka sa'a ñayii ka sa'a ja va'a ma
ji'in nawa ka sa'a ñayii ka sa'a ja u'vi ma.
4Ñayii ká'an vii ká'an va'a ma
chi wa'a i tnu'u kanu ini in‑ka ñayii ma, te ndusii ini ñayii yukan,
kovaa ñayii ká'an tnu'u ndeva'a ma nuu in‑ka ñayii ma
chi sa'a i ja kúxii ini ñayii yukan.
5Suchi so'o xeen kaa ma
chi saxiko i tnu'u ndáka'an‑so'o yuva i ma nuu i ma,
kovaa suchi jan‑ta'vi ma
chi káxtnu'u i ja suchi jáku'ni ini kúu i te ko kuu i in ñayii ndichi.
6Ñayii sa'a ja va'a ja ndaa ma
chi ko ni'i ko tna'a i ja koneva'a i ve'e i ma,
kovaa ñayii sa'a ja u'vi ma
chi visi na ni'i i ja koneva'a i ma,
kovaa ndimaa koo tnundo'o tnuneni nuu i ma.
7Ñayii ndichi ma
chi ndimaa tnu'u ndichi ka ka'an i
te ka sa'a i ja kua'a‑ka ñayii ka jaku'ni ini,
kovaa ñayii so'o xeen ka ndaa ma
chi ndimaa ja u'vi ka ñu'u ini i ja jin sa'a i ma.
8Ñayii ka sa'a ja u'vi ma
chi saxiko Su'si ma ja ka ndakua'a i nuu ya ma,
kovaa ñayii ka sa'a ja va'a ja ndaa ma
chi játna ini Su'si ma ja ka jikan‑ta'vi i nuu ya ma.
9Su'si Iya Tátnuni ma
chi saxiko ya ja ka sa'a ka kuu ñayii ka sa'a ja u'vi ma,
kovaa kútoo ya ñayii ka sa'a ja va'a ja ndaa ma.
10Ñayii ñatuu jika ndaa ichi Su'si a
chi ndaka'an ni'i ya nuu i,
te ñayii saxiko ja ndáka'an‑so'o ya nuu i ma
chi skenaa i maa i.
11Su'si ma chi jini ya na kivi kûu ñayii ma
te ndenu ki'in i ma,
te suni sukan jini tna ya ja jani ini o ma.
12Ñayii so'o xeen kaa ma
chi ñatuu játna ini i ñayii ndáka'an‑so'o nuu i ma,
te ká'an yichi‑ni i ñayii yukan,
te ni ñatuu kúni i ja ndatna'a i ji'in ñayii ndichi ma.
13Ñayii iyo sii ini anua i ma
chi ndijin ndaa na'a nuu i ma ja iyo sii ini i ma,
kovaa ñayii kúxii ini ma
chi ñatuu na tnu'u sii ini iyo ini anua i ma te ndijin‑ni na'a i.
14Ñayii jáku'ni ini ma
chi su'va ndánduku‑ka i tnu'u ndichi Su'si ma,
kovaa ñayii so'o xeen kaa ma
chi kua'a‑ka ja u'vi ndúku i ja sa'a i.
15Ñayii wa'a tnu'u ja kúxii ini i nawa ndo'o neni i ma
chi ndaka kivi ma kúu i sukan,
kovaa ñayii iyo sii ini ma
chi ndaka kivi chi kuenda tnu'u ja viko iyo i jini i,
vaa iyo sii ini i ma.
16Sa'a te jini o ja va'a‑ka kúu ja visi jaku‑ni neva'a o ma,
te iyo sii ini o vaa iyo o ji'in Su'si ma
iya ndakan kuenda nawa sa'a nawa kúu o ma,
sana ja ko ni'i ko tna'a o ma
te ñatuu na tnu'u sii ini iyo ini anua o ma
ja ndaka ja ndí ini xeen o ma.
17Va'a‑ka kúu ja kaa o in ko'o yuva xi in ko'o ndeyu vi'nde
nú vivii ka kutoo tna'a o,
sana ja jin kaa o in xndiki ka'nu
te ndimaa tnu'u kiti ini ka iyo o ma.
18Ñayii yachi xeen ndákiti ini ma
chi ja sa'a i kúu ja skanaa tna'a i,
kovaa ñayii kuee ini ma
chi sa'a i ja ka iyo mani ñayii ma.
19Ñayii kuxi ma
chi jani ini i ja nanimaa iñu kaa ichi ki'in i ma
te va'a‑ka ma ki'in i‑ni,
kovaa ñayii sa'a ja va'a ja ndaa ma
chi nune nda'a nuu i ichi kua'an i ma jini i.
20Suchi ndichi ma
chi sa'a i ja ka iyo sii ini yuva i ma,
kovaa suchi so'o xeen kaa ma
chi saxiko i yuva i si'i i ma.
21Suchi so'o xeen kaa ma
chi vii xeen na'a jini i ja ñatuu jaku'ni ini i ja sa'a i ja va'a ma,
kovaa suchi jáku'ni ini ma
chi ndása'a i kuenda te ndákaka ndaa i nuu Su'si ma.
22Nú ñatuu na in ndichi ja ndaka'an‑so'o i naxe ko kuu ma
chi masu kee ja ka ñu'u ini i ja jin sa'a i ma,
kovaa nuu ka iyo kua'a ñayii ndichi‑ka
te ka ndatnu'u tna'a i naxe ko kuu ma
chi vivii kendoo.
23Vivii kúu ora kénda ñayii ká'an naxe sa'a o
ora ñatuu ní'i ini o naxe ko kuu ma,
kovaa vii xeen‑ka kúu ja maa ora jiniñu'u o ma
te kénda kunu tnu'u jiniñu'u o ma.
24Ichi ki'in o ja koteku o ni‑kani ni‑jika ma
kuenda tnu'u ja ndichi xeen, vaa ndó'o o jaku;
kovaa chindee ña'a i
ja ma kêe o andeya ma te skenaa o maa o ma.
25Su'si Iya Tátnuni ma
chi xnaa ya ve'e ñayii jani ini ja maa i kúu‑ka ma,
kovaa sa'a ya ja ña'a ni ji'i yii ma
chi koo va'a ndaka ja neva'a ña ve'e ña ma.
26Su'si Iya Tátnuni ma
chi saxiko ya ja jani ini ñayii sa'a ja u'vi ma ja sa'a i ma,
kovaa játna ini ya ja vii ja va'a
ká'an ñayii iyo vii nuu ya ma.
27Ñayii ndiyo ini ma
chi sa'a nda'vi sa'a kee i ñayii ve'e i ma,
kovaa ñayii ñatuu játna ini ja sa'a i sukan ma
chi jin koo va'a‑ka i ve'e i ma.
28Ñayii sa'a ja va'a ja ndaa ma
chi ndása'a i kuenda naxe ndakone'e i nuu in‑ka ñayii ma,
kovaa ñayii sa'a ja u'vi ma
chi kée koo kée ni'ni‑ni ja ká'an i ma.
29Su'si ma chi iyo jika ya nuu iyo ñayii sa'a ja u'vi ma,
kovaa niniso'o ya te jatanuu ya
ja jikan‑ta'vi ñayii sa'a ja va'a ja ndaa ma.
30Ñayii nde'ya vii nde'ya va'a ña'a ma
chi sa'a i ja kúsii ini ini anua o ma,
te ora ka ndakani i tnu'u vii tnu'u va'a ma
chi ndátaa i tnu'u ndee tnu'u ndatnu.
31Ñayii niniso'o te sa'a i
sukan ka ndaka'an‑so'o ñayii ma nuu i ma
chi ko kuu i in ñayii ndichi.
32Ñayii ñatuu jan‑ta'vi ja ka ndaka'an‑so'o i nuu i ma
chi ñatuu kútoo i maa i ja sukan sa'a i ma,
kovaa ñayii jan‑ta'vi ma
chi su'va kútu'va‑ka i naxe ko sa'a ko kuu i ma.
33Nú jan‑ta'vi o ja ka ndaka'an‑so'o i nuu o ma
chi jayiñu'u Su'si ma kúu,
vaa jandetu o nuu ya ma,
vaa nuna kava kuee ini o te kani ini o
ja maa Su'si ma sana kuu nawa sa'a o ma
chi koo jayiñu'u o.
Currently Selected:
Proverbios 15: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
