Proverbios 14
14
1Ña'a ndichi ma
chi sa'a ña ja vivii jin ketna'a ini ndaka ñayii ve'e ña ma,
kovaa ña'a so'o xeen kaa ma te kúnee kú‑uun ña ma
chi maa ña sa'a ja ñatuu ka ketna'a ini ñayii ve'e ña ma.
2Ñayii ndí ini ja sa'a i ja va'a ma
chi yu'u i Su'si ma vaa jini i ja ndakan ya kuenda,
kovaa ñayii ndimaa ja u'vi sa'a i ma
chi saxiko i Su'si ma.
3Ñayii so'o xeen kaa ma
chi ndimaa tnu'u ja savixi i maa i ká'an i,
kovaa ñayii ndichi ma
chi ndaka tnu'u ká'an i ma chi ja va'a kúu,
te kaku i nuu ja u'vi ma.
4Ñayii ñatuu na xndiki neva'a i ma
chi ñatuu nawa ndaxtutu i itu i ma, te konune nda'a yaka i ma,
vaa ka jini o ja tnu'u ndee tnu'u ndatnu xndiki ma
ja satniñu ti ma sana koo kua'a ja kaa o ma.
5Ñayii kúkanu ini o ja ndakani ndaa i nawa ni jini i ma
chi nú ñayii sa'a ja va'a ja ndaa kúu i
chi masu nawa xnda'vi ña'a i,
kovaa ñayii ñatuu ká'an ndaa ká'an ndija ma
chi ndimaa xnda'vi ña'a i.
6Ñayii ká'an ndeva'a ja kuu in‑ka ñayii ma
chi visi na ndanduku i tnu'u ndichi ma, kovaa masu ndani'i i,
kovaa ñayii jáku'ni ini te ndása'a i kuenda ma
chi masu yii ja ndani'i i tnu'u ndichi ma.
7Máko jin tna'a ro ñayii so'o xeen kaa ma,
vaa ndaka tnu'u ká'an i ma
chi masu nawa chíndee ña'a i ja jaku'ni ini ro.
8Ñayii ndichi ma chi maa tnu'u ndichi ma sa'a
ja ni'i ini i naxe ko sa'a ko kuu i ma,
kovaa ñayii so'o xeen kaa ma
chi jani ini i ja va'a‑ni sa'a i,
kovaa xnda'vi i maa i.
9Ñayii so'o xeen ka ndaa ma chi ka sa'a i ja u'vi ma,
te ûni ka kusisi maa i ja ka sa'a i tna'a ja masu játna ini Su'si ma,
kovaa ñayii ka sa'a ja va'a ja ndaa ma
chi maa i ka kuni ja jin sa'a i ja vii ja va'a ma.
10Maa maa o jini naxe ndo'o ini anua o ma ora kúxii xeen ini o ma,
te suni sukan kúu ora iyo sii ini xeen o ma,
vaa masu na in kuu jaku'ni ini sukan kúu ini anua in‑ka ñayii ma.
11Ve'e ke'e ñayii sa'a ja u'vi ma
chi kendoo nda'vi kendoo kee,
kovaa ve'e ke'e ñayii ka sa'a ja va'a ja ndaa ma
chi vivii jin ko kuu i.
12Ka iyo jaku ñayii ja ka jani ini i ja sukan ka sa'a ka kuu i ma
te kuan koo i ichi va'a,
kovaa masu nde ka ndasa'a i kuenda
ja ichi nuu jin skenaa i maa i kuan koo i ma,
13vaa nawa kúu ja onde ja kusii xeen o ma
chi masu kua'a‑ni sani te tna‑u'vi ini anua o a,
vaa ora iyo sii ini xeen o ma
sani te kénda in tnundo'o te sa'a i ja kúxii xeen ini o.
14Ñayii so'o xeen kaa ma chi ndaka ja u'vi sa'a kuu maa i ma
chi ndani'i ndi'i ndani'i tu'u maa i,
kovaa ñayii sa'a ja va'a ja vii ma
chi ndimaa ja va'a ndani'i i te koo sii ini i.
15Ñayii kánee janitnuni i ma
chi kándija i ndaka nawa ka jiña'a i nuu i ma,
kovaa ñayii jâ ni teku ini ma
chi jakin i cuidado nú ja va'a kúu ja ka ka'an ñayii ma xi ña'a.
16Ñayii ndichi ma chi xndoo i ja u'vi ma te ñatuu nde sa'a‑ka i,
vaa yu'u i Su'si ma ja ndakan ya kuenda nuu i ma,
kovaa ñayii so'o xeen kaa i ma
chi masu ndí ini kuiti i nawa sa'a i ma,
te ndito ndito‑ni na'a ja vixi xeen kaa i kúu ma.
17Ñayii yachi‑ni ndákiti ini i ma
chi ni masu kunitnuni maa i te sa'a i ja u'vi ma,
te ñayii sukan kúu i ma
chi masu na in kúnimani nuu i ma,
18vaa ñayii ñatuu ni'i ini‑ka naxe ko sa'a ko kuu i ja va'a ma
te ñatuu ndí ini i ma,
chi ja ndetu ña'a kúu ja u'vi ma,
kovaa ñayii ndichi ma te ndí ini i naxe koo va'a i nuu Su'si ma
chi ja ndetu ña'a kúu ja jakun‑tnuni ini i
naxe ko sa'a ko kuu i ja va'a ma.
19Ñayii ka sa'a ja u'vi ma
chi kenda kivi ja jin koo i ve'e ñayii ka sa'a ja va'a ja ndaa ma,
te jin ka'an nda'vi jin ka'an kee i nuu ñayii yukan
ja na jin chindee ña'a i.
20Ñayii kúnda'vi kúkee ma
chi onde ñayii ka ka'an ja ka ketna'a ini ji'in i ma ka saxiko ña'a,
kovaa ñayii kúxiku ma
chi kua'a xeen ñayii ka ka'an ja ka ketna'a xeen ini i ji'in i,
21te vitna ja ká'an Su'si ma ja ñayii saxiko in‑ka ñayii ma
chi jiso kuechi i nuu Su'si ma,
kovaa ñayii kúnda'vi ini ñayii kúnda'vi kúkee ma
chi ja vava'a ko kuu i nuu Su'si ma.
22Ñayii ka nduku ja nanimaa ja u'vi ma jin sa'a i ma
chi jin ski'in i maa i te ma jin ndani'i i ichi ndaa ma,
kovaa ñayii ñu'u ini ja sa'a i ja va'a ja ndaa ma
chi kunda'vi ini ña'a Su'si ma te jin ndani'i i ichi ndaa ma.
23Ndaka ja ndó'o néni o ja satniñu o ma
chi ñatuu jan naa, vaa ko ni'i ko tna'a o,
kovaa ñayii yika‑ni ja ká'an ká'an‑ni i nawa jani ini i ja sa'a i ma
te ñatuu sa'a i ma
chi ko kunda'vi ko kukee i.
24Jayiñu'u ñayii ndichi ma kúu ja jáku'ni ini i te sa'a i ma,
kovaa ñayii so'o xeen kaa ma
chi ja yoxtnuu kua'an yoxtnuu vee nuu i ma kúu
ja masu ndí ini i ja sa'a i ja va'a ja ndaa ma.
25Ñayii ndáka'an ndaa nawa ni jini i ma
chi sa'a i ja ka kaku ñayii ma nuu tnundo'o ma,
vaa ndáka'an ndaa ndaa i ma,
kovaa ñayii játna ini ja xnda'vi i ñayii ma
chi masu ndáka'an ndaa kuiti i nawa ni jini i ma.
26Ja koyu'u o Su'si ma te ma ko sa'a‑ka o ja u'vi ma
vaa iya ndakan kuenda kúu ya ma
chi sa'a i ja kukanu ini xeen o ya ja ko koto ña'a ya
te ko koto ya sa'ya tata o ma.
27Sukan kúu nuu tóo kua'a ndute ma,
sukan kúu ja koyu'u o Su'si ma te ma ko sa'a‑ka o ja u'vi ma,
vaa sa'a ya ja koteku o,
sukan‑va'a ma jin tu'va o nuu kûu o te skenaa o maa o ma.
28Jayiñu'u tee kúu rey ma kúu
nú kua'a xeen ñayii ma kúu ñuu nuu tátnuni de ma,
kovaa nú lule‑ni ñuu ma te jaku‑ni ñayii ma kúu
chi ñatuu nawa kúu sa'a de te nda'vi‑ni kúu de.
29Ñayii kuee ndákiti ini ma
chi ja ni jaku'ni xeen ini i kúu,
kovaa ñayii yachi‑ni ndákiti ini ma
chi káxtnu'u i ja in ñayii so'o kúu i.
30Ñayii kuee ini ma
chi koo sii ini yikikuñu i ma, te koteku vii koteku va'a i,
kovaa ñayii kueñu ini ma
chi onde yiki i ma xtnakue'e maa i, ja sukan kúu i ma.
31Ñayii xnda'vi te sa'a ndeva'a i ñayii kúnda'vi ma
chi sa'a i ja kúxii ini Su'si iya ni sa'a ña'a ndaka o ma,
kovaa ñayii kúnda'vi ini ñayii nda'vi ma
chi ndáchiñu'u i Su'si ma ja sukan sa'a i ma.
32Ñayii sa'a ja u'vi ma
chi kenda kivi ja onde andeya ma skana ya i ja sukan ni yo sa'a i ma,
kovaa ñayii sa'a ja va'a ja ndaa ma
chi visi na kûu i ma chi iyo ja va'a ndetu ña'a.
33Ñayii ndasa'a kuenda naxe sa'a naxe kúu i ma
chi nanimaa tnu'u ndichi ñu'u ini anua i ma ja sukan sa'a i ma,
kovaa ñayii inuso'o xeen ka ndaa ma
chi masu ka jini maa i nawa kúu tnu'u ndichi ma.
34Ñuu nuu iyo tnu'u ndaa tnu'u ndija ma
chi koo‑ka jayiñu'u i,
kovaa ñuu nuu nanimaa ja u'vi ka sa'a ñayii ma
chi ja kan‑nuu ndatna'a ñuu yukan.
35Ja vii ja va'a ko sa'a tee kúu rey ma
ja kuu suchi jinukuechi nuu de ma
ja ndása'a i kuenda naxe sa'a kúu i ma,
kovaa ndakiti ini de nuu ñayii sa'a ja ni'i de ja kan‑nuu ma.
Currently Selected:
Proverbios 14: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
