Popular Bible Verses from Proverbios 15

Share

Nú tnu'u vii tnu'u kuee kúu tnu'u ndákone'e o nuu ñayii ndákiti ini ma chi ndiko ini i, kovaa nú tnu'u xiko tnu'u ndi'vi ma na ndakone'e o chi su'va ndakiti‑ka ini i.

Nú jan‑ta'vi o ja ka ndaka'an‑so'o i nuu o ma chi jayiñu'u Su'si ma kúu, vaa jandetu o nuu ya ma, vaa nuna kava kuee ini o te kani ini o ja maa Su'si ma sana kuu nawa sa'a o ma chi koo jayiñu'u o.

Ñayii ká'an vii ká'an va'a ma chi wa'a i tnu'u kanu ini in‑ka ñayii ma, te ndusii ini ñayii yukan, kovaa ñayii ká'an tnu'u ndeva'a ma nuu in‑ka ñayii ma chi sa'a i ja kúxii ini ñayii yukan.

Nú ñatuu na in ndichi ja ndaka'an‑so'o i naxe ko kuu ma chi masu kee ja ka ñu'u ini i ja jin sa'a i ma, kovaa nuu ka iyo kua'a ñayii ndichi‑ka te ka ndatnu'u tna'a i naxe ko kuu ma chi vivii kendoo.

Ñayii iyo sii ini anua i ma chi ndijin ndaa na'a nuu i ma ja iyo sii ini i ma, kovaa ñayii kúxii ini ma chi ñatuu na tnu'u sii ini iyo ini anua i ma te ndijin‑ni na'a i.

Su'si Iya Tátnuni ma chi nde'ya nde'ya‑ni ya ni‑ka'nu ñuu ñayivi a, te jini ya nawa ka sa'a ñayii ka sa'a ja va'a ma ji'in nawa ka sa'a ñayii ka sa'a ja u'vi ma.

Sa'a te jini o ja va'a‑ka kúu ja visi jaku‑ni neva'a o ma, te iyo sii ini o vaa iyo o ji'in Su'si ma iya ndakan kuenda nawa sa'a nawa kúu o ma, sana ja ko ni'i ko tna'a o ma te ñatuu na tnu'u sii ini iyo ini anua o ma ja ndaka ja ndí ini xeen o ma.

Ñayii yachi xeen ndákiti ini ma chi ja sa'a i kúu ja skanaa tna'a i, kovaa ñayii kuee ini ma chi sa'a i ja ka iyo mani ñayii ma.

Ñayii sa'a ja va'a ja ndaa ma chi ndása'a i kuenda naxe ndakone'e i nuu in‑ka ñayii ma, kovaa ñayii sa'a ja u'vi ma chi kée koo kée ni'ni‑ni ja ká'an i ma.