Popular Bible Verses from Proverbios 19

Share

Kua'a xeen ja jani ka'vi ini ñayii ma ja sa'a i, kovaa yika‑ni ja ja kúu ini maa Su'si ma kúu ja ko kuu.

Ja chíndee o ñayii nda'vi ma chi kuenda tnu'u ja in ja wanuu o nuu Su'si ma kúu, te maa ya ja kúu ya Iya Tátnuni ma ndataa nuu o ja va'a ni sa'a o ma.

Ñayii ndichi te ndasa'a i kuenda ma chi kutu'va i ja kava kuee ini i, te jayiñu'u i kúu ja ni sakanu ini i ja u'vi ni sa'a ña'a in‑ka ñayii ma.

Ñayii kuan‑ta'vi ja ka ndaka'an‑so'o i nuu i ma te ma ndakone'e xiko i ja sukan ni ka jiña'a ñayii ma chi kutu'va i ja ko kuu i in ñayii ndichi.

Ja koyu'u o Su'si ma te ma ko sa'a o ja u'vi ma chi chindee ña'a i ja koteku o ni‑kani ni‑jika, te maa ya sa'a ja kusu sii ini o te ndatatu o, te ni‑in tnundo'o ma kenda nuu iyo o ma.

Ñayii ni jaku'ni ini tnu'u ndichi ma te sa'a i sukan ká'an ma chi ja kútoo i maa i kúu ja ndí ini i ja koo va'a i ma.

Ndaka'an‑so'o ni'i ni nuu sa'ya ni ma vitna ja iyo‑ka i ja koniniso'o i tnu'u kuña'a ni ma, te máko ko kasiyu'u ni ja u'vi sa'a i ma, te ko kuu kuechi tna ni ja kûu i ma te skenaa i maa i ma.

Ñayii ñatuu ndakani ndaa nawa ni jini i ma chi ma kaku maa i chi onde ndo'o neni i ja sukan sa'a i ma, te suni ñayii játna ini ja ka'an tnu'u i ma chi masu yanduu ja onde ndo'o neni tna maa i ja sukan sa'a i ma.