Proverbios 20
20
1Ñayii ji'i ndixi ma chi ndúu ndee ini i te sa'a ndeva'a i kua'an i,
te kánaa i ji'in ndeva'a‑ni ñayii ma.
Ñayii wa'a tnu'u ja sukan xnda'vi ña'a ndixi ma
chi masu jini‑ka maa i nawa sa'a i.
2Nuna ndakiti ini rey ma
chi masu kaku maa ñayii ni sa'a ja ni ndakiti ini de ma,
vaa sukan ndúxeen ndika'a ma, sukan iyo de ja kuu sa'a de.
3In jayiñu'u kúu nuu ñayii ñatuu játna ini
ja ndi tetna'a ndi tetna'a i jin ko kuu i ma,
kovaa ñayii ñatuu jáku'ni ini ma
chi ni masu kanda i chi ndeva'a‑ni ora
chi skeja'a maa i ja kanaa i ji'in in‑ka ñayii ma.
4Ñayii kuxi ma chi ñatuu ndáta'vi ndásaka i itu i ma tiempu vijin ma,
te kivi kenda ja skee ñayii ma itu i ma,
te visi na ki'in maa i jin koto i itu i ma,
kovaa masu nawa ndani'i i.
5Sukan kúu ndute ñu'u in soko kunu ma,
sukan kuu ja jani ini ñayii ma ini anua i ma,
te ñayii ndichi ma
chi jakun‑tnuni‑ni ini i nawa kúni ñayii ma ka'an i ma.
6Kua'a xeen ñayii ka kuvixi i ja inuva'a ini i,
kovaa masu kuu kukanu ini o ni a in ñayii yukan.
7Ñayii sa'a ja va'a ja ndaa ma
chi ni‑in ja u'vi ñatuu sa'a i, te jika ndaa i ichi Su'si a,
te naka vii naka va'a ka kuu sa'ya ñayii ya'a,
vaa jin ndandikin i sukan ni ka yo sa'a yuva i ma.
8Ora jínkoo rey ma nuu ndákan de kuenda nuu ñayii ma
chi yika‑ni ja nde'ya de ma,
te ka jikayata maa ñayii ka sa'a ja u'vi ma.
9Masu na in kuu ka'an:
“Iyo vii iyo ndoo ini anua sa, ñatuu kuiti na kuechi sa.”
10Ñayii ñukuun sa'a i ma
te masu chíkua'a ndaa i nawa xíko i ma
chi saxiko Su'si ma ja sukan sa'a i ma.
11Onde in suchi luluu ma chi ja jini o sukan sa'a i ma,
te ndasa'a o kuenda na nde suchi ko kuu i,
nú suchi sa'a ja va'a xi suchi sa'a ja u'vi ko kuu i.
12Su'si ma ni sa'a so'o o a sukan‑va'a koniniso'o o,
te ni sa'a ya nduchinuu o a sukan‑va'a konde'ya va'a o.
¡Vivii kúu ja ni sa'a ya a!
13Máko tnaa xeen ro ñuma'na nuu ro,
nú ña'a, te ko kunda'vi ko kukee ro,
su'va ko ndoto ne'e ro te koo kua'a ja kaa ro.
14Ñayii jaan ma chi ndáa xeen i tnu'u ja ya'vi xeen ja yikuu i jaan i ma,
kovaa nú jâ ni jaan i ma,
te kuvixi maa i ja ja va'a kúu te masu ya'vi ni wa'a i.
15Ja va'a‑ka kúu ñayii káji tnu'u va'a ká'an i ma
sana ja ñayii neva'a kua'a xeen oro
xi yuu vivii ka ndaa te ka ndeya'vi xeen ma.
16Ñayii kúu nuu ñayii jikan yika ma
chi skenaa i onde su'nu i ma,
nú ma ndachunaa ñayii yukan ma.
17Ñayii xnda'vi in‑ka ñayii ma te ni'i i ja kaa ja ko'o i ma
chi visi jani ini i ja asi xeen jaa ma,
kovaa kenda kivi ja ndakokon ndayichi i.
18Kuan‑ta'vi o tnu'u va'a ká'an‑so'o in‑ka ñayii ma
te kani va'a ini o nawa sa'a o ma,
vaa nawa kúu ja tee ki'in jin kanaa de ji'in in‑ka ñuu ma
chi xinañu'u‑ka jakin tna'a va'a de naxe ki'in de ma
sukan‑va'a kundee de ma.
19Ñayii tnu'u ma chi masu kuu kukanu ini o i
chi ndi'i kuiti ndáxtuu i kua'an i ma,
chukan kúu ja masu kuu ketna'a ini o
ji'in ñayii masu kutu yu'u i ma.
20Ñayii ká'an u'vi ja kuu yuva i si'i i ma
chi masu na tnu'u kanu ini ja koo va'a i,
vaa koo maa i nuu nee ma‑ni.
21Ñayii masu na tnundo'o te ní'i kua'a i ja koneva'a i ma
chi ndaka maa ja neva'a i ma sa'a ja kenda kivi te ndanda'yu i.
22Máko ku'un ini ni ja maa ni ndachunaa
nawa ni sa'a ndeva'a ña'a in‑ka ñayii ma,
su'va kukanu ini ni Iya Tátnuni ma,
te maa ya ndachunaa te koo va'a maa ni.
23Su'si Iya Tátnuni ma chi saxiko ya ñayii ñatuu chíkua'a ndaa
nawa xíko i ma,
vaa masu játna ini ya ja xnda'vi tna'a o ma
te ma chikua'a ndaa o ma.
24Maa Su'si ma kúu iya jâ jini naxe ko kuu in in ñayii ma,
te ni‑in ñayii ma masu kuu jaku'ni ini i
naxe iyo ja ko kuu ji'in ndi‑in ndi‑in o ma,
vaa maa in‑ni Su'si ma kúu iya jâ jini ndi'i.
25Másu va'a‑ni ja ka'an uun‑ni o
te skuiso o nuu Su'si ma nawa sa'a o ma
te kuee‑ka ma te ndakani ini o ja masu kundee o sa'a o ma.
26Rey tee ndichi ma chi sa'a siin de ñayii ka sa'a ja u'vi ma,
te xnaa de i sukan sa'a yoso mulinu ma triu ma ja vii jaxi i ma.
27Onde ini anua ñayii ma xtnuu Su'si ma ñu'u maa ya ma,
vaa maa ya chi jini ya nawa jani ini ñayii ma,
te masu nawa kuu kuyu'u nuu maa ya ma.
28Tnu'u nda'vi ini ma ji'in tnu'u ndaa tnu'u ndija ma
kúu ja chíndee chítuu rey ma ja núkoo va'a de tátnuni de ma.
29Jayiñu'u suchi jaa ma kúu tnu'u ndee tnu'u ndatnu i ma, jani ini i,
te tee nija'nu ma chi jayiñu'u de kúu vixi xini de ma,
vaa ka jandetu‑ka ñayii ma nuu de ma.
30Ja ka xndo'o ka xneni i ñayii sa'a ja u'vi ma ji'in yutnu xii ma
chi kuenda tnu'u ja jatatna kúu,
vaa sukan, te ndasa'a i kuenda te xndoo i ja u'vi sa'a i ma.
Currently Selected:
Proverbios 20: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
