Galatanan 5
5
1Kristu a duna nos libertat pa hasi nos liber di bèrdat;#Huan 8:32-36 p'esei para firme den e libertat ei i no bolbe someté boso na yugo di sklabitut.
Libertat kristian
2Marka mi palabra! Ami, Pablo, ta bisa boso: si boso laga sirkunsidá boso, Kristu no ta sirbi boso pa nada. 3Mi ke ripití pa esun ku laga sirkunsidá su mes ku e ora ei e ta obligá pa kumpli ku henter Lei di Moises. 4Boso ku ke pa Dios aseptá boso komo hustu, pasobra boso ta kumpli ku Lei, a keda separá di Kristu. Boso a benta grasia di Dios afó. 5Nos, enkambio, ansiosamente ta spera pa medio di Spiritu di Dios, ku Dios ta aseptá nos pa medio di fe. 6Pasobra serka siguidónan di Kristu-Hesus no ta importante si un hende ta sirkunsidá òf nò. Ta e fe ku ta funshoná pa medio di amor ta konta.
7Boso tabata progresá asina bon! Ta ken a stroba boso di obedesé bèrdat? 8E loke nan a bisa pa konvensé boso no ta bini di Dios ku ta yama boso. 9Kòrda: un tiki zürdeg ta pone henter e mansa reis!#1 Korintionan 5:6 10Mi ta konfia den Señor ku boso lo no kambia boso manera di pensa, pero Dios lo kastigá esun ku ta bruha boso, no ta importá ken e ta.
11Pa loke ta toka ami, rumannan, si te ainda mi ta insistí ku sirkunsishon tin su balor i ta sigui hasié ketu bai, pakiko hudiunan ta persiguí mi antó? E ora ei e mensahe di salbashon pa medio di krus lo no a ofendé nan! 12Mare esnan ku ta kana molestiá boso por hasi un trabou kompleto i no solamente sirkunsidá, pero kastra nan mes tambe!
13Rumannan, boso ta yamá pa ta liber. Pero no usa e libertat ei pa entregá boso mes na mal deseo. Mas bien sirbi otro#Mateo 20:26 pa medio di amor. 14Pasobra por resumí henter Lei di Moises den esun mandamentu akí: ‘Stima bo próhimo manera bo ta stima bo mes.’#Levítiko 19:18; Romanonan 13:8-10 15Tene kuidou, pasobra si boso sigui morde i habraká otro, a lo largu boso mes lo kaba ku otro!
Un bida ku ta kuadra ku Spiritu di Dios
16P'esei mes mi ta bisa: Si boso laga Spiritu di Dios dirigí boso bida, boso lo no satisfasé boso mal deseonan. 17Pasobra mal deseo ta bringa Spiritu di Dios i E ta bringa nan! Esun ta bai kontra di e otro, ke men ku boso no por djis hasi loke boso ke!#Romanonan 7:15-23 18Pero si ta su Spiritu ta guia boso, boso lo no ta someté na Lei.
19Ta bon kla kiko esnan ku ta sigui nan mal deseonan ta hasi. Nan ta kometé akto di inmoralidat, nan ta hasi kos impuru i ta biba un bida parotin; 20nan ta adorá dios falsu i praktiká bruheria; nan tin un aktitut hostil, nan ta trese pleitu i ta envidiá otro hende. Nan ta kla pa rabia, nan ta buska nan mes probecho i ta trese desunion i partidismo. 21Nan ta hende yalurs, buraché, parandero i otro kos semehante. Mi ta atvertí boso manera mi a hasi un bia kaba: esnan ku komportá nan asina lo no tin parti den reino di Dios.
22Pero loke Spiritu di Dios ta generá den hende ta amor, goso, pas, pasenshi, amabilidat, bondat, fieldat, 23humildat i dominio propio. E kosnan ei no ta bai kontra ningun lei. 24Esnan ku ta pertenesé na Kristu-Hesus, ya a krusifiká e hende pekadó den nan mes, huntu ku su pashon- i mal deseonan.#Romanonan 6:3-14; Galatanan 2:20; 6:14 25Si ta pa medio di Spiritu di Dios nos ta biba, nos mester laga su Spiritu guia nos. 26Nos no mester ta arogante, ni provoká ni envidiá otro!
Currently Selected:
Galatanan 5: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
