Galatanan 4
4
Katibu òf yu?
1Esaki ta loke mi ke men: miéntras un heredero ta menor di edat, no tin niun diferensia entre e i un katibu di kas, ounke en realidat e heredero ta doño di tur kos. 2Tin hende spesial pa kuid'é i pa sòru pa su asuntunan te ora e dia yega ku e tata a stipulá. 3Meskos tambe a pasa ku nos ku ta hudiu: tempu nos tabata menor di edat nos tabata katibu di e podernan di kòsmòs.#Kolosensenan 2:8,20 4Pero ora e momento ku Dios a stipulá a yega, El a manda su Yu, ku a nase di un hende muhé i ku tabata someté na lei di Moises, 5pa asina reskatá nos ku tabata sometí na Lei i tambe pa hasi ku nos por bira yu adoptivo di Dios. 6I esaki ta e prueba ku boso ta yu: Dios a manda Spiritu di su Yu den nos kurason i e Spiritu akí ta sklama: ‘Abba, Tata!’ 7Ke men antó ku bo no ta katibu mas, pero yu di Dios i ta Dios su boluntat pa, komo yu, bo ta heredero tambe!#Romanonan 8:15-17
Pablo su preokupashon pa e Galatanan
8Ántes, tempu boso no tabata konosé Dios, boso tabata katibu di loke en realidat no ta Dios. 9Pero awor ku boso a siña konosé Dios, òf mihó bisá, awor ku Dios ker a konosé boso, kon ta posibel ku boso ta bolbe someté boso na e podernan spiritual débil i mizerabel ei? Akaso boso ke bolbe bira nan katibu atrobe? 10Mira kon boso ta selebrá sierto dia, luna, temporada i aña spesial! 11Mi tin miedu ku e trabou duru ku mi a traha na boso benefisio, tabata enbano!
12Rumannan, mi ta pidi boso: sea manera mi, pasobra ami a bira manera boso. No ku mi ta bisa ku boso a hasi mi niun daño sí. 13Manera boso sa kaba, e promé bia ku mi a prediká e bon notisia na boso,#Echonan 16:6 tabata pa motibu di mi enfermedat. 14I ounke mi tabatin un enfermedat ku por a pone boso rechasá mi, tòg boso no a mustra niun tiki menospresio òf rechaso! Al kontrario, boso a risibí mi komo si fuera mi tabata un angel di Dios òf Kristu-Hesus mes! 15Awor ta kiko a pasa antó ku e alegria ei ku boso tabata sinti? Esaki sí mi tin ku bisa di boso: e tempu ei boso lo a saka boso wowo mes duna mi si tabata posibel. 16I awor mi a bira boso enemigu, pasobra mi ta bisa boso bèrdat?
17Mi oponentenan ta mustra mashá interes den boso, pero no ku bon intenshon. Ta kita nan ke kita nos for di otro pa boso bai traha na nan interes! 18Ta bunita bringa pa un bon kousa, pero hasié tur ora, no solamente ora mi t'ei! 19Mi yunan, un bia mas mi ta pasa den dolónan di parto pa boso, te ora boso keda formá segun imágen di Kristu.#Romanonan 8:29; 2 Korintionan 3:18; Filipensenan 3:10 20Esta hopi gana mi tin di por tabata huntu ku boso awor akí i papia ku boso na otro un manera, pasobra na e momento akí mi no sa ki pensa di boso!
Hagar i Sara: símbolo di dos aliansa diferente
21Boso ku ke someté boso na Lei di Moises, tende mi un kos aki: Boso no ta pone atenshon na loke Lei di Moises mes ta bisa? 22Wèl e ta bisa ku Abraham tabatin dos yu: un ku e muhé katibu,#Génesis 16:15 e otro ku e muhé liber.#Génesis 21:2 23E yu di e katibu a nase na un manera puramente humano, pero e yu di e muhé liber a nase komo resultado di e promesa ku Dios a hasi. 24Esaki tin un nifikashon simbóliko. E dos muhénan ta representá e dos aliansanan: un ta e aliansa di seru di Sinai ku ta produsí katibu; esei ta Hagar. 25Ke men antó ku Hagar ta representá seru di Sinai na Arabia i esei na su turno ta símbolo di e Herusalèm djawendia, pasobra e siudat akí i tur su habitantenan ta bou di yugo di sklabitut. 26Pero e Herusalèm selestial ta liber i nos ta su yu. 27Pasobra Skritura ta bisa:
‘Muhé ku nunka no a pari,
ku nunka no a konosé doló di parto,
keda kontentu i basha gritu di húbilo,
pasobra abo, muhé bandoná, lo ta riku na yu,
mas riku ku kualke muhé ku esposo!’#Isaías 54:1
28Rumannan, meskos ku Isak boso ta e yu ku Dios a primintí. 29Pero meskos ku den e tempu aya e yu ku a nase na un manera puramente humano, tabata persiguí esun ku a nase pa obra di Spiritu di Dios,#Génesis 21:9 e ta sosodé awor tambe. 30Pero kiko Skritura ta bisa? Wèl, e ta bisa: ‘Kore ku e kriá i ku su yu, pasobra yu di e kriá no por kompartí e herensia ku e yu liber.’#Génesis 21:10 31Ke men antó, rumannan, ku nos no ta yu di e katibu, pero yu di e muhé liber!
Currently Selected:
Galatanan 4: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
