ROMANOS 14

Ná chcui' ngu' cha' cuxi ji'i̱ xa' la ñati̱ tya'a ntsu'u cha' ji'i̱ ngu' lo'o Cristo

1Tso'o ti chcui' ma̱ lo'o sca ñati̱ tya'a ngusñi na cha' ji'i̱ Jesús, masi tya lyiji ca cuayá' tso'o ti' cha' bi'; ná xu̱u̱ tya'a ma̱ lo'o nu ñati̱ bi' xqui'ya sca cha' nu ná nchca cuayá' tso'o ti'. 2Ntsu'u ñati̱ nu jlya tsa ti' ji'i̱ Cristo, bi' cha' ná ntsi̱i̱ ngu' cacu ngu' lcaa lo na. Xa' la ñati̱ nu ná jlya tso'o ti' ji'i̱ Cristo, ntsi̱i̱ ngu' bi' si cua'ni ngu' cha' cuxi xqui'ya sca na cacu ngu'; bi' cha' ná ntaja'a̱ ngu' bi' cacu ngu' cuaña'. Ndacu ngu' si'yu, ndacu ngu' cu̱u̱, ndacu ngu' caatya, tsa bi' ti na ndacu ngu' bi'. 3Pana nu ngu' nu ná ntsi̱i̱ ndacu cuaña' ni, ná tso'o si xtyí lo'o ngu' ji'i̱ xa' la tya'a ngu' nu ntsi̱i̱ cacu bi'. La cui' ti cha', nu ngu' nu ntsi̱i̱ cacu cuaña' bi', ná tso'o si chcui' cuxi ngu' bi' ji'i̱ ngu' nu ndacu lcaa lo na nu nda ycui' Ndyosi cha' cacu na, cha' cua nda Ni chacuayá' ji'i̱ ngu' cha' caca ngu' sñi' ycui' Ni. 4Ná tso'o si chcui' cuxi ma̱ ji'i̱ xa' la ñati̱ tya'a ngusñi na cha' ji'i̱ Ni. Ycui' Ndyosi laca Xu'na ngu', si'i cuentya ji'i̱ cu'ma̱ laca ngu' bi'; cuentya ji'i̱ ycui' Ndyosi laca cña nu ndyu'ni ngu', si cha' tso'o ndyu'ni ngu', si cha' cuxi ndyu'ni ngu'. Lo'o jua'a̱ ná tyacua cha' cuxi ji'i̱ ngu' xqui'ya cha' bi', cha' lo'o ngu' bi' ngusñi ngu' cha' ji'i̱ ycui' nu Xu'na na; jua'a̱ xtyucua Ni ji'i̱ ngu', cha' tyi'i̱ tso'o ti ngu' chalyuu cuentya ji'i̱ ycui' Ni.

5Ntsu'u ngu' tya'a ntsu'u cha' ji'na lo'o Cristo nu ndu'ni tacati ji'i̱ sca tsa̱, ná ntsu'u cha' ji'i̱ xa' la tsa̱ cuentya ji'i̱ ngu' bi'; xa' la ñati̱ nchcui' cha' na ji'i̱ ycui' Ndyosi laca lcaa tsa̱. Ta ma̱ chacuayá' cua'ni scaa ñati̱ tsa ña'a̱ nu nclyacua ti' ycui' ca ngu'. 6Si tacati tsa sca tsa̱ cuentya ji'i̱ tsaca ngu', bi' laca tsa̱ nu nga'a̱ cha' cua'ni chi̱ ngu' bi' loo ycui' Ndyosi lacua; lo'o jua'a̱ taca cua'ni chi̱ nu xa' la ñati̱ loo ycui' Ndyosi, masi ná ntsu'u cha' tacati ji'i̱ ngu' lo'o tsa̱ bi'. La cui' jua'a̱ ndyu'u cha' lo'o ñati̱ nu ná ntsi̱i̱ cacu cuaña' bi'; xqui'ya cha' ngusñi ngu' cha' ji'i̱ ycui' Ndyosi, bi' cha' ná ntsi̱i̱ ngu' bi'. Ndya ngu' xlya'be ji'i̱ ycui' Ni lo'o ndacu ngu' ji'i̱. Lo'o nu ntsi̱i̱ cacu cuaña' bi' ni, la cui' ti xqui'ya ycui' Ndyosi ntsi̱i̱ ngu' cacu ngu' ji'i̱; lo'o ngu' bi' ndya ngu' xlya'be ji'i̱ ycui' nu Xu'na na cha' nda Ni na cacu ngu'.

7Ntsu'u cha' caca na cña ji'i̱ Ni, masi tya lu'ú na, masi cajaa na. Si'i cha' ji'i̱ ycui' ti na ndi'i̱ na chalyuu, si'i cha' ji'i̱ ycui' ti na cajaa na; 8cha' caca na cña ji'i̱ ycui' Ndyosi, bi' cha' ndi'i̱ na lo yuu chalyuu. Nu lo'o ntsu'u cha' cajaa na, cha' ji'i̱ Ni laca li', cha' na ji'i̱ ycui' Ni laca na, masi tya lu'ú na, masi cua ngujuii na. 9Cua ngujuii Cristo, lo'o jua'a̱ cua ndyu'ú Cristo chaca quiya', cha' ca cuayá' ti' lcaa ngu' cha' ycui' Ndyosi laca Xu'na lcaa jyo'o nu ngusñi cha' ji'i̱ Ni nu lo'o nguti'i̱ ngu' chalyuu. Lo'o jua'a̱ ycui' Ni laca Xu'na ñati̱ nu jlya ti' ji'i̱ Ni nde chalyuu juani.

10Ñati̱ ji'i̱ Cristo laca cua ña'a̱ ca ngu' tya'a ngusñi na cha' ji'i̱ Ni, bi' cha' ná nga'a̱ cha' chcui' cuxi ma̱ ji'i̱ cña nu ndu'ni scaa ngu' tya'a ntsu'u cha' ji'na lo'o Cristo. Ná chcui' cuxi ma̱ ji'i̱ ngu' bi', ñi'ya̱ nu ngua'ni ma̱ tya tsubi' la; ntsu'u cha' tyalaa tsa̱ bi' lo'o tyaa lcaa tya'a na ca su ntucua ycui' Ndyosi. Nde loo ycui' Ni tsatu̱ na li', cha' cua'ni cuayá' Ni ji'na. 11Ntsu'u sca cha' nu nscua lo quityi cusu' nu nacui̱ ycui' Ndyosi ndi'ya̱:

Ycui' Ndyosi lu'ú laca na', nacui̱ Ni, nga'a̱ cha' tyatu̱ sti̱' lcaa ñati̱ nde loo su ntucua na',

cha' chcui' liñi ngu' lo'o tya'a ñati̱ cha' laca na' ycui' Ndyosi Sti ngu'.

12Bi' cha' lacua, lcaa na lo'o tya'a na nga'a̱ cha' xacui̱ na cha' ji'i̱ ycui' Ndyosi lo'o tyalaa tsa̱ bi', lcaa cha' ñi'ya̱ nu ngua'ni scaa na lo'o ñaa na chalyuu.

Ná ta ngu' tyempo ji'i̱ tya'a ngu' cha' tya'a̱chu̱' ngu' ji'i̱ Jesús

13Nga'aa chcui' cuxi ma̱ ji'i̱ cña nu ndyu'ni scaa ngu' tya'a ngusñi ma̱ cha' ji'i̱ Jesús lacua. Ndi'ya̱ cua'ni ma̱ juani: nga'aa ta ma̱ tyempo ji'i̱ ngu' tya'a ma̱ cha' cua'ni ngu' cha' cuxi xqui'ya cu'ma̱. 14Cua nchcui' Cristo lo'o na', cua jlo ti' na' cha' ni sca na cuxi ná nda ycui' Ndyosi cha' cacu ñati̱; lcaa na nu ndacu ñati̱ chalyuu, na tso'o laca bi'. Pana ntsu'u ñati̱ nu ná nchca cacu sca na, xqui'ya cha' nti' ti ngu' cha' na cuxi laca bi'; cuxi tsa laca na bi' cuentya ji'i̱ ngu' bi' si cacu ngu' ji'i̱ li'. 15Lo'o ngu' tya'a ntsu'u cha' ji'i̱ ma̱ lo'o Jesús ni, si ña'a̱ ngu' cha' ndyacu ma̱ sca na nu ná ntsu'u chacuayá' cacu ycui' ngu', nti' ngu', chiya'a̱ culacua ti' ngu' bi' li'; ñi'ya̱ laca si ná tso'o ntsu'u tyiquee ma̱ ña'a̱ ma̱ ji'i̱ ngu', bi' cha' ndyacu ma̱ na bi' culacua ti' ngu'. Ná tso'o jua'a̱. Ná ntsu'u chacuayá' ji'i̱ ma̱ cacu ma̱ na laca nu nti' ti ma̱, si jua'a̱ cua'ni ma̱ cha' xtyanu ngu' tya'a ma̱ cha' ji'i̱ Cristo xqui'ya cha' ndyacu ma̱ na bi'. Lo'o ngu' bi', laca ngu' cuentya ji'i̱ ycui' Ndyosi; xqui'ya ngu' bi', bi' cha' ngujuii Cristo. 16Masi ndi'i̱ tso'o ti ma̱, ná nga'a̱ cha' ta ma̱ tyempo ji'i̱ ngu' cha' chcui' ngu' cha' cuxi ji'i̱ cña nu ndyu'ni ma̱ xqui'ya cha' ndyacu ma̱ na bi'. 17Nu lo'o laca ycui' Ndyosi loo ji'na ni, ná ndulo tsa cha' ji'na cuentya ji'i̱ sca na nu ndacu na, sca na nu co'o na; nu ndulo tsa ji'na laca cha' tya̱a̱ Xtyi'i ycui' Ndyosi tyanu ne' cresiya ji'na, cha' ca tso'o cresiya ji'na xqui'ya Jesús. Bi' cha' ti̱ ti taca tyi'i̱ tyiquee na chalyuu, taca ca chaa ti' na xqui'ya ycui' Ndyosi; lcaa cha' bi' caca nu lo'o laca Ni loo ji'na. 18Li' tso'o ntsu'u tyiquee Ni ña'a̱ Ni ji'i̱ ma̱, lo'o jua'a̱ ñati̱ chalyuu cua'ni chi̱ ngu' loo ma̱, si cua'ni ma̱ lcaa ña'a̱ cña nu ngulu'u Cristo ji'na.

19Tso'o lacua. Lcaa tya'a na nga'a̱ cha' clyana na cua ña'a̱ ca cha' nu cua'ni cha' caca tyi'i̱ tso'o na lo'o tya'a ñati̱ na, ña'a̱ cha' nu cua'ni cha' xtyucua na ji'i̱ tya'a ñati̱ na, cha' tso'o ti tyi'i̱ na cuentya ji'i̱ Cristo; 20ná cua'ni ñu'u̱ ma̱ ji'i̱ cña nu ndyu'ni ycui' Ndyosi xqui'ya sca na nu ndacu ma̱. Chañi cha' tso'o tsa laca lcaa na nu nda Ni cha' cacu ñati̱, pana caca cuxi na bi' cuentya ji'i̱ ma̱, si ntsu'u ngu' nu xtyanu cha' ji'i̱ Jesús xqui'ya cha' ndacu ma̱ ji'i̱. 21Tso'o la masi ná cacu ma̱ cuaña' tsiya' ti, masi ná co'o ma̱ lcui tsiya' ti, si nti' ma̱ cha' cuxi laca na bi' cuentya ji'i̱ tya'a ñati̱ ma̱. Ni sca na ná cua'ni ma̱ nu cua'ni cha' tya'a̱chu̱' ngu' tya'a ma̱ ji'i̱ Jesús, cha' cua'ni ngu' cha' cuxi, cha' quiñu'u̱ cresiya ji'i̱ ngu'. 22Nu lo'o nti' ma̱ cha' tso'o tsa cuentya ji'i̱ ycui' Ndyosi laca sca cña nu ndu'ni ma̱, masi ntsu'u ñati̱ nu ná ndiya ti' cha' ndu'ni ma̱ jua'a̱, tsiya' ti cua'ni ma̱ cña bi' li' ca su nga'a̱ ycui' ti ma̱, ca su ña'a̱ sca ti ycui' Ndyosi ji'i̱ ma̱. Tso'o tsa ntsu'u tyiquee ñati̱ nu ngui'i̱ ndu'ni jua'a̱, ná ntsu'u cha' culacua tsa ti' ngu' bi'; cua jlo ti' ngu' bi' cha' si'i cha' cuxi nu ndu'ni ngu'. 23Pana ná tso'o ndyu'ni ñati̱ lo'o ndyacu cuaña' si nti' ngu' cha' cuxi laca cha' bi' cuentya ji'i̱ ycui' Ni; qui'ya laca ji'i̱ ngu' bi', cha' si'i na tyucui tyiquee ngu' ndyacu ngu' cuaña' bi' li'. Lcaa cña nu ndyu'ni na cha' siya' ti tyiquee na, qui'ya ji'na laca bi'.

Currently Selected:

ROMANOS 14: cta

Highlight

Copy