ROMANOS 15

Si'i xcui' cña ji'i̱ ycui' ca na nu tyu'u tyiquee na

1Lcaa na nu nguula ti' tyiquee na xqui'ya cha' ngusñi na cha' ji'i̱ Cristo, ntsu'u cha' talo tyiquee na ji'i̱ tya'a ngusñi na cha' ji'i̱ Cristo nu tya lyiji xñi tso'o cha' bi'; ntsu'u cha' xtyucua na ji'i̱ ngu'. Si'i xcui' cña ji'i̱ ycui' ca na nu nga'a̱ cha' tyu'u tyiquee na ji'i̱; 2clyana na ñi'ya̱ caca cha' caca tso'o ji'i̱ ngu' tya'a na nu nga'a̱ cacua ti slo na. Xtyucua na ji'i̱ ngu' bi', cha' tyatí̱ la ti' tyiquee ngu' lo'o jlya ti' ngu' ji'i̱ Cristo; 3ñi'ya̱ nu ngua'ni ycui' Cristo, ni sca cña ná ngua'ni yu cha' ji'i̱ ti yu. Cua ntsu'u sca cha' nu nscua lo quityi cusu', sca cha' nu nda yu lo'o ycui' Ndyosi Sti yu ndi'ya̱: “Lcaa cha' cuxi nu nchcui' ngu' jinu'u̱, cua ndyanu cha' bi' hichu̱' na'; yabe' nu ngusta ngu' jinu'u̱ laca bi'”. 4Lcaa quityi nu nguscua jyo'o cusu' tya sa'ni la ni, nclyu'u quityi bi' ji'na ñi'ya̱ nu caca jatya na ji'i̱ sca cha' nu lijya̱ nde loo la; nda quityi cha' lo'o na ñi'ya̱ xtyucua ycui' Ndyosi ji'na cha' talo tsa tyiquee na laja lo'o ndu̱ ti' na ji'i̱ Ni. 5Lo'o jua'a̱ cua nti' ya cha' xtyucua Ni ji'i̱ cu'ma̱, la cui' nu sca ti ycui' Ndyosi nu nxtyucua ji'i̱ lcaa na cha' talo tyiquee na, nu ndu'ni cha' ca tlyu tyiquee na. Xtyucua Ni ji'i̱ cu'ma̱, cha' jua'a̱ talo tyiquee ma̱ ji'i̱ tya'a ntsu'u cha' ji'i̱ ma̱ lo'o Ni, cha' caca stu'ba tyiquee ma̱ lo'o tya'a ma̱ xqui'ya Jesucristo. 6Lo'o ngua stu'ba cha' ji'i̱ ma̱ lo'o tya'a ma̱, li' sca ti cha' taca tyu'u tyiquee ma̱, sca ti cha' taca tyu'u tu'ba ma̱ lo'o cua'ni tlyu ma̱ ji'i̱ ycui' Ndyosi Sti na, nu laca Sti Jesucristo nu Xu'na na.

Nduna ngu' xa' tsu' cha' tso'o nu nda Jesús

7Ñi'ya̱ tso'o tsa nchcui' Cristo lo'o ma̱, jua'a̱ nga'a̱ cha' chcui' tso'o ma̱ lo'o tya'a ñati̱ ma̱, cha' caja ñi'ya̱ cua'ni tlyu ngu' ji'i̱ ycui' Ndyosi lo'o ña'a̱ ngu' ji'i̱ ma̱. 8Cua ñaa Cristo cha' cua'ni lyaá yu ji'i̱ ngu' judío, ñi'ya̱ nu ngüiñi cha' ji'i̱ ycui' Ndyosi lo'o jyo'o cusu' ji'i̱ ya sa'ni la; caca cuayá' ti' na jua'a̱ cha' liñi tsa cha' nu nda Ni lo'o jyo'o cusu' bi'. 9Ñaa nu Cristo bi', cha' jua'a̱ caja ñi'ya̱ nu cua'ni tlyu ngu' xa' tsu' ma̱ ji'i̱ ycui' Ndyosi, cha' lo'o ji'i̱ cu'ma̱ cua'ni tya'na tsa ti' Ni, ñi'ya̱ nu ndyu'u sca cha' nu nscua lo quityi cusu' nu ndi'ya̱ nchcui':

Cua'ni tlyu na' jinu'u̱ laja ngu' xa' tsu', xqui'ya cha' ngua'ni lyaá nu'u̱ ji'i̱ ngu';

cula tu'ba na' ji̱i̱ jinu'u̱, cha' cua'ni chi̱ na' loo nu'u̱, nacui̱ jyo'o David.

10Ntsu'u chaca cha' nu nscua lo quityi cusu' nu nchcui' ndi'ya̱:

Cu'ma̱ ngu' xa' tsu', stu'ba ti ca chaa ti' ma̱ lo'o lcaa ñati̱ nu ngusubi ycui' Ndyosi ji'i̱, nacui̱ jyo'o Moisés.

11Lo'o jua'a̱ tya ntsu'u chaca cha' nu nchcui' ndi'ya̱:

Cua'ni tlyu lcaa ngu' xa' tsu' ji'i̱ ycui' nu Xu'na na;

lcaa ngu' cula tu'ba ngu' ji̱i̱ nu chcui' cha' ji'i̱ lcaa cha' tlyu nu ngua'ni ycui' Ni, nacui̱ jyo'o David.

12Lo'o jyo'o Isaías nguscua sca cha' lo quityi cusu' nu nacui̱ ndi'ya̱:

Tyu'u tucua sca ñati̱ tya'a ñati̱ ji'i̱ jyo'o Isaí,

ca̱a̱ yu bi' lo yuu cha' caca yu loo ji'i̱ ngu' xa' tsu'.

Ndu̱ ti' ngu' xa' tsu' ji'i̱ yu bi', cha' cua'ni lyaá yu ji'i̱ ngu'.

Jua'a̱ nchcui' quityi cusu' bi'.

13Bi' cha' juani nti' na' cha' cua'ni Ni cha' xñi tso'o la ma̱ cha' ji'i̱ ycui' Ni, cha' tso'o tsa caca tyiquee ma̱, cha' ti̱ ti taca tyi'i̱ tyiquee ma̱ li'. Nu lo'o tyanu Xtyi'i ycui' Ndyosi ne' cresiya ji'na, li' nga'aa caca taja ti' na lo'o ntajatya na ji'i̱ ycui' Ndyosi cha' ca̱a̱ Ni.

14Cu'ma̱ tya'a ntsu'u cha' ji'na lo'o Cristo, nslo tsa na' ji'i̱ ma̱ cha' tso'o tsa tyiquee ma̱; tso'o tsa nchca cuayá' ti' ma̱ cha' ji'i̱ Cristo, lo'o jua'a̱ nchca tsa ji'i̱ ma̱ ta ma̱ cui̱i̱ lo'o ngu' tya'a ma̱. 15Cua nscua na' quityi re cha' ca̱a̱ ca su ndi'i̱ ma̱; ná ntsi̱i̱ na' tsiya' ti cha' chcui' na' cha' bi' lo'o ma̱, cha' xñi tso'o la ma̱ cha' bi'. Ntsu'u chacuayá' cha' chcui' na' lo'o ma̱, cha' ycui' Ndyosi cua nda Ni cña bi' 'na, cha' tso'o tsa ndu'ni Ni lo'o na'. 16Cua ngusubi ycui' Ndyosi 'na cha' cua'ni na' cña ji'i̱ Jesucristo; cña bi' laca cha' tsa'a na' ta na' cha' tso'o ji'i̱ ycui' Ndyosi lo'o ngu' xa' tsu', lcaa su ndi'i̱ ngu'. Jua'a̱ ndyu'ni na', cha' tyucui tyiquee ngu' caca ngu' bi' ñati̱ ji'i̱ ycui' Ndyosi xqui'ya cña nu cua'ni Xtyi'i ycui' Ndyosi ne' cresiya ji'i̱ ngu'. Li' tyaja'a̱ Ni quiñi cha' ji'i̱ Ni lo'o ngu' bi' xqui'ya na'.

17Xqui'ya Jesucristo ntsu'u tsa cha' nu taca chcui' na' lo'o cu'ma̱ nquicha'; taca chcui' na' ji'i̱ cña nu cua ngua'ni na' cuentya ji'i̱ ycui' Ndyosi, ni si'i cha' cua'ni tyucuaa ti' na' lo'o ma̱ laca si chcui' na' jua'a̱. 18Pana tsa bi' ti cha' chcui' na' lo'o ma̱, cha' ji'i̱ cña nu ngua'ni Jesús, cha' caja ñi'ya̱ nu taquiya' ngu' xa' tsu' ji'i̱ cha' nu nchcui' ycui' Ndyosi. Si'i sca ti na' nu ngua'ni na' cña bi', pana Xtyi'i ycui' Ndyosi ngua'ni cña lo'o na' lo'o nchcui' na' lo'o ngu'. 19Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na. 20Lye tsa ndyu'ni cña ti' na', cha' tsa'a na' tsaana na' lcua ti quichi̱ su bilya cuna ngu' cha' ji'i̱ Cristo. Bi' ti quichi̱ ndyanu na' nclu'u na' cha' tso'o bi' ji'i̱ ngu', cha' ná nti' na' tyatí̱ yu'u na' lo'o cña nu ndyu'ni xa' tya'a ñati̱ ji'i̱ Cristo. 21Nti' na' cha' tyu'u tucua sca cha' nu nscua lo quityi cusu' nu nchcui' ndi'ya̱:

Ca quichi̱ su bilya chcui' ngu' cha' ji'i̱ ycui' Ndyosi lo'o ngu', ca bi' tyuloo tso'o ñati̱ ji'i̱ ycui' Ndyosi;

ca su bilya cuna ngu' cha' ji'i̱ ycui' Ni, ca bi' ca cuayá' tso'o ti' ñati̱ cha' ji'i̱ Ni.

Nti' tsa Pablo tsaa ca quichi̱ Roma

22Tyijyu' tsa ndya'a̱ na', bi' cha' bilya caja ñi'ya̱ nu ca̱a̱ na' ca su ndi'i̱ ma̱, 23masi cua ngua tyu̱u̱ yija̱ nu ngua ti' na' cha' ca̱a̱ na' chcui̱' lo'o ma̱. Ca juani ngua laja 'na lijya̱a̱, cha' nga'aa ntsu'u cña nu cua'ni na' ca nde; 24bi' cha' cua nti' na' cha' ca̱a̱ na' tyi'i̱ na' xi ca su ndi'i̱ ma̱, tyucui̱i̱ su tsa'a̱ nde España. Li' taca ta na' xi cha' lo'o ma̱. Nu lo'o ngua chaa xi ti' na lo'o tya'a na, li' taca chcui' salya' ma̱ lo'o na', cha' xtyucua ma̱ jna' tyucui̱i̱ su tsa'a̱ nde loo la. 25-26Pana clyo la ntsu'u cha' tsa'a na' nde quichi̱ Jerusalén. Nu ngu' tya'a ntsu'u cha' ji'na lo'o Cristo nu ndi'i̱ nde Macedonia, nu ndi'i̱ nde Acaya ni, tso'o tsa tyiquee ngu' ña'a̱ ngu' ji'i̱ xa' ñati̱; bi' cha' cua nguxuti'i̱ ngu' tsa ycu' cñi nu caca msta̱, cha' cua nti' ngu' xtyucua ngu' ji'i̱ ngu' ti'i tya'a na, nu ñati̱ ji'i̱ Cristo nu ndi'i̱ nde Jerusalén. Bi' cha' tsa'a na' tsaa lo'o na' ji'i̱ cñi bi' ca slo ngu' ti'i bi'. 27Chañi cha' tyucui tsa tyiquee ngu' bi' nda ngu' msta̱ bi'. Taca ñacui̱ na cha' ñi'ya̱ laca si na ndacui ti ngu' bi' ji'i̱ tya'a ngu', jua'a̱ laca cña nu ndyu'ni ngu' juani. Tya clyo ngu' judío laca nu cua nda cha' ji'i̱ Cristo lo'o ngu' xa' tsu'; xqui'ya cha' bi' ngua tso'o cresiya ji'i̱ ngu' cuentya ji'i̱ ycui' Ndyosi, masi ngu' xa' tsu' laca ngu'. Bi' cha' juani lo'o ngua ti'i nu ngu' judío bi', tso'o si xtyucua ngu' xa' tsu' ji'i̱ ngu' bi', cha' tya'a ñati̱ ji'i̱ Cristo laca ngu'. 28Clyo cua'ni na' cha' xcua se'i̱ ti cña bi', ña'a̱ cuayá' nu cua nda na' cñi bi' ji'i̱ ngu'; li' xñi na' tyucui̱i̱ tsa'a̱ nde España. Pana laja tyucui̱i̱ tyeje tacui na' ca su ndi'i̱ cu'ma̱. 29Nu lo'o tyalaa na', li' jlo ti' na' cha' quiña'a̱ tsa cha' tso'o ji'i̱ Cristo ntsu'u cha' chcui' na' lo'o ma̱, cha' caja ñi'ya̱ nu tyatí̱ la ti' tyiquee ma̱ li'.

30Cu'ma̱ tya'a ngusñi na cha' ji'i̱ ycui' Ndyosi, tyu'u cha' clyu ti' ji'i̱ ma̱ lo'o na' xqui'ya Jesucristo nu Xu'na na, cha' jua'a̱ ntsu'u tsa tyiquee ma̱ ña'a̱ ma̱ ji'i̱ tya'a ñati̱ ma̱, xqui'ya cña nu ndyu'ni Xtyi'i ycui' Ni ne' cresiya ji'i̱ ma̱. Cua'ni ma̱ cha' caca stu'ba tyiquee ma̱ lo'o na', cha' lu'ba tsa chcui' ma̱ lo'o ycui' Ndyosi cuentya jna'. 31Jña ma̱ cha' clyu ti' ji'i̱ ycui' Ni, cha' clyaá na' ji'i̱ nu ngu' tyaala nu ná jlya ti' tsiya' ti cha' ji'i̱ Cristo, nu ngu' nu ndi'i̱ nde Judea ni. Lo'o jua'a̱ jña ma̱ cha' ji'i̱ Ni cuentya ji'i̱ ñati̱ ji'i̱ ycui' Ndyosi nu ndi'i̱ nde Jerusalén, cha' tso'o ti tyu'u tyiquee ngu' tya'a na chcui' ngu' lo'o na', nu lo'o xñi ngu' msta̱ nu ta na' ji'i̱ ngu'. 32Lo'o jua'a̱ jña ma̱ cha' ji'i̱ Ni, cha' tso'o ti caca tyiquee na' lo'o tyalaa na' ca su ndi'i̱ ma̱, cha' xa' caca nguula ti' tyiquee na' nu lo'o tyi'i̱ na' lo'o ma̱, si jua'a̱ nti' Ni cha' caca. 33Xtyucua Ni ji'i̱ lcaa cu'ma̱ lacua, la cui' ycui' Ndyosi nu ndu'ni cha' ti̱ ti tyi'i̱ tyiquee na nde chalyuu. Chañi tsa cha' caca jua'a̱.

Currently Selected:

ROMANOS 15: cta

Highlight

Copy