ROMANOS 16

Nchcuicha' Pablo ji'i̱ tyu̱u̱ tya'a ñati̱ ji'i̱ Cristo

1-2Lo'o tyalaa ma' Febe slo ma̱, chcui' tso'o ma̱ lo'o ma' xqui'ya ycui' nu Xu'na na, ñi'ya̱ nu nga'a̱ cha' cua'ni ma̱, cha' tya'a ngusñi na cha' ji'i̱ Cristo laca ma' bi'. Tya'a na laca ma' Febe, ndyu'ni ma' cña cuentya ji'i̱ taju ñati̱ ji'i̱ Cristo nu ndi'i̱ quichi̱ Cencrea. Ta ma̱ na nu lyiji ji'i̱ ma' cusu' bi', cha' cua nguxtyucua tsa ma' ji'i̱ quiña'a̱ tsa ñati̱ tya tsubi' la; lo'o jua'a̱ na', cua nguxtyucua tsa ma' jna'.

3Chcuicha' ma̱ ji'i̱ Priscila lo'o Aquila, tya'a ndyu'ni na' cña ji'i̱ Jesucristo. 4Cua tsubi' la hasta cua cajaa ti ycui' ngu' ngua cuentya jna', cha' ngua'ni lyaá ngu' jna' lo'o ntsu'u na' sca su cuxi tsa. Lo'o ycui' na' ndya na' xlya'be ji'i̱ ngu' bi'; jua'a̱ lcaa tya'a ngu' xa' tsu' nu ntsu'u cha' ji'i̱ lo'o Cristo nde quichi̱ tyijyu' la, jua'a̱ nti' ngu', cha' ta ngu' tsaa xlya'be ji'i̱ ngu' bi'. 5Cuati chcuicha' ma̱ ji'i̱ lcaa ñati̱ ji'i̱ Cristo nu ndyu'u ti'i̱ ca toni'i̱ ji'i̱ nu Aquila bi'. Lo'o jua'a̱ chcuicha' ma̱ ji'i̱ Epeneto tya'a tso'o na', ngu' Asia nu clyo ngusñi cha' ji'i̱ Cristo laca yu bi'. 6Jua'a̱ chcuicha' ma̱ ji'i̱ María, cha' ngua'ni tsa ma' cña cuentya ji'i̱ ma̱. 7Lo'o jua'a̱ chcuicha' ma̱ ji'i̱ Andrónico lo'o Junias tya'a quichi̱ tyi na', tya'a ngutu'u na' ni'i̱ chcua̱. Tyucuaa ngu' bi' laca ngu' ñati̱ nu cua nda Cristo ji'i̱ ndyaa, cha' ta ngu' cha' ji'i̱ ycui' Ndyosi lo'o ngu' nu cua tyijyu' la; nguula tsa cña nu ngua'ni ngu' cuentya ji'i̱ nu Xu'na na. Pana yala la ngusñi ngu' bi' cha' ji'i̱ Jesús, lo'o li' tiya' la ngusñi na' cha' bi'.

8Lo'o jua'a̱ chcuicha' ma̱ ji'i̱ lcaa ngu' tya'a nscua xtañi ngu' lo quityi re: ji'i̱ Amplias, cha' tyaca'a tsa yu 'na xqui'ya ycui' nu Xu'na na; 9lo'o jua'a̱ ji'i̱ Urbano, tya'a ndyu'ni na' cña ji'i̱ Jesucristo; jua'a̱ ji'i̱ Estaquis, la cui' jua'a̱ tyaca'a tsa yu 'na; 10jua'a̱ ji'i̱ Apeles, cha' cua jlo ti' na cha' ngusñi tso'o yu cha' ji'i̱ Cristo xqui'ya lcaa cña nu ngua ji'i̱ yu cuentya ji'i̱ Cristo; jua'a̱ ji'i̱ lcaa ngu' tya'a Aristóbulo; 11jua'a̱ ji'i̱ Herodión tya'a quichi̱ tyi na'; jua'a̱ ji'i̱ lcaa ngu' tya'a Narciso nu jlya ti' ji'i̱ ycui' nu Xu'na na; 12jua'a̱ ji'i̱ Trifena lo'o Trifosa, nu ndyu'ni tsa cña ji'i̱ ycui' nu Xu'na na; jua'a̱ ji'i̱ Pérsida tya'a tso'o na', cha' quiña'a̱ tsa cña tso'o ji'i̱ ycui' nu Xu'na na ngua'ni ma' bi'; 13lo'o jua'a̱ chcuicha' ma̱ ji'i̱ Rufo, sca ñati̱ ji'i̱ Cristo nu tso'o tsa cha' nchcui' ngu' ji'i̱; lo'o jua'a̱ ji'i̱ xtya'a̱ Rufo, nu nguna'a̱si̱i̱ tsa jna' ñi'ya̱ si laca ma' xtya'a̱ na'; 14lo'o jua'a̱ ji'i̱ Asíncrito, ji'i̱ Flegonte, ji'i̱ Hermas, ji'i̱ Patrobas, ji'i̱ Hermes, lo'o jua'a̱ ji'i̱ lcaa tya'a ñati̱ ji'i̱ Cristo nu ndyu'u ti'i̱ ca slo ngu' bi'; 15lo'o jua'a̱ chcuicha' ma̱ ji'i̱ Filólogo, ji'i̱ Julia, ji'i̱ Nereo, ji'i̱ nu cuna'a̱ tya'a ngula yu, ji'i̱ Olimpas; lo'o jua'a̱ ji'i̱ lcaa tya'a ngu' nu stu'ba ntsu'u cha' ji'i̱ ngu' lo'o Cristo. Nti' na' cha' chcuicha' ma̱ ji'i̱ lcaa ñati̱ bi' cuentya jna'.

16Nu lo'o chcuicha' ma̱ ji'i̱ tya'a ma̱, tyucui tyiquee ma̱ quityi ma̱ ji'i̱ tya'a ma̱ chacuayá' ji'i̱ Cristo. Lcaa taju ñati̱ nu ntsu'u cha' ji'i̱ lo'o Cristo ca nde, cua nti' ngu' chcuicha' ngu' ji'i̱ ma̱.

17Cu'ma̱ tya'a ntsu'u cha' ji'na lo'o Cristo, lye chcui' na' lo'o ma̱ juani, cha' tii ti ti' tyi'i̱ ma̱ xi, cha' ná tyu'u tucua ñati̱ nu ta cha' cusu̱u̱ ji'i̱ ma̱ lo'o tya'a ma̱, cha' ná tacu̱' loo ngu' bi' cha' liñi ji'i̱ Cristo nu cua ndyuna ma̱. Ná xñi ma̱ cha' ji'i̱ ngu' bi', 18cha' si'i cña ji'i̱ Cristo laca bi', si xa' la cha' nchcui' ngu' lo'o ma̱. Ndu'ni ngu' bi' lcaa cha' cuxi nu nclyacua ti' ycui' ngu' cha' cua'ni ngu'. Lo'o jua'a̱ ndyu'ni ngu' cha' quichi̱ yaa cha' hique ngu' ti'i, cha' tso'o tsa ndañi cha' nu nda ngu', cha' tajua' ti nchcui' ngu'. 19Pana nu cu'ma̱ ni, tso'o tsa nchcui' ñati̱ cha' ji'i̱ ma̱ lcaa quichi̱, cha' tso'o tsa ndaquiya' ma̱ cha' ji'i̱ Cristo. Tso'o tsa nti' na' ña'a̱ na' ji'i̱ ma̱ lo'o nduna na' cha' bi'; cua nti' na' cha' yala ti tyatí̱ ti' ma̱ cha' cua'ni ma̱ cua ña'a̱ ca cha' tso'o, cha' ná tyatí̱ ti' ma̱ tsiya' ti cha' cua'ni ma̱ ni sca cha' cuxi. 20Ná tyu̱u̱ tsa̱ lyiji cha' cua'ni tye ycui' Ndyosi ji'i̱ nu xña'a̱, cha' nga'aa tyaca̱' cña cuxi nu ndu'ni nu xña'a̱ bi' tsiya' ti. Cua'ni Ni cha' ti̱ ti tyi'i̱ tyiquee ma̱, ñi'ya̱ ntsu'u tyiquee ycui' Ni; lo'o jua'a̱ ña'a̱ ti cua'ni Jesucristo nu Xu'na na cha' tso'o lo'o lcaa tya'a ma̱.

21Lo'o Timoteo tya'a ndya'a̱ na' cña, lo'o Lucio, lo'o Jasón, lo'o Sosípater ngu' tya'a quichi̱ tyi na', cua nti' ngu' chcuicha' ngu' ji'i̱ ma̱.

22Cuati lo'o na', scaranu ji'i̱ Pablo laca na' lo'o nscua ya quityi re, Tercio naa na'; lo'o na', nti' na' chcuicha' na' ji'i̱ ma̱ chacuayá' ji'i̱ ycui' nu Xu'na na.

23Lo'o yu Gayo nda yu cha' lo'o na' cha' chcuicha' na' ji'i̱ ma̱; la cui' to' tyi yu nda yu su tyi'i̱ na', jua'a̱ nda yu toni'i̱ ji'i̱ yu su tyu'u ti'i̱ ña'a̱ taju ñati̱ nu ntsu'u cha' ji'i̱ lo'o Cristo re. Cuati lo'o Erasto nu laca loo ji'i̱ cñi quichi̱ re, nti' yu chcuicha' yu ji'i̱ ma̱; la cui' ti cha' nti' Cuarto, yu tya'a na.

24Bi' cha' lacua, xtyucua ycui' Jesucristo nu Xu'na na ji'i̱ lcaa ma̱ lo'o tya'a ma̱, ña'a̱ ti cua'ni Ni cha' tso'o lo'o ma̱; jua'a̱ nti' na cha' caca.

Ngusalya' Pablo lo'o ngu'

25Cua'ni tlyu na ji'i̱ ycui' Ndyosi lacua. Taca ji'i̱ Ni ta Ni juersa ji'i̱ ma̱, cha' tyi'i̱ ma̱ ñi'ya̱ nu nga'a̱ cha' tyi'i̱ ti na chalyuu, si xñi tso'o na cha' ji'i̱ Jesús. Cha' tso'o ji'i̱ la cui' Jesucristo, bi' laca cha' nu nda na' lo'o ngu', masi tyu̱u̱ tsa siyento yija̱ ntsu'u cuatsi' ti cha' nu nchcui' ñi'ya̱ nu cua'ni ycui' Ndyosi nde loo la; 26pana juani cua ngulu'u tso'o Ni cha' bi' ji'na. Bi' cha' nga'a̱ cha' cañi cha' ji'i̱ Cristo tyucui ña'a̱ lo yuu chalyuu su ndi'i̱ ñati̱ ña'a̱ cuayá' cuna lcaa ngu' xa' tsu', cha' taca xñi ngu' cha' ji'i̱ sca ti ycui' Ndyosi, cha' taquiya' ngu' ji'i̱ cha' nu nchcui' Ni. La cui' cha' bi' laca nu cua nscua lo quityi ji'i̱ ycui' Ndyosi, nu nguscua jyo'o cusu' ñi'ya̱ caca cha' nde loo la. Ngua ti' ycui' Ndyosi cha' caca cha' bi', bi' cha' jua'a̱ ndyaca juani; ycui' Ndyosi laca nu ná nga'a̱ cha' tye chalyuu ji'i̱ Ni tsiya' ti.

27Sca ti ycui' Ndyosi jlo ti' lcaa cha', bi' cha' lcaa tyempo ná nga'a̱ cha' tye cha' cua'ni tlyu na ji'i̱ ycui' Ni chacuayá' ji'i̱ Jesucristo. Jua'a̱ nti' na cha' caca tu'ni.

Currently Selected:

ROMANOS 16: cta

Highlight

Copy