ROMANOS 13

1Lcaa cu'ma̱ ngu' tya'a na, nga'a̱ cha' taquiya' ma̱ ji'i̱ ngu' nu laca cña. Ycui' Ndyosi laca nu cua nda chacuayá' ji'i̱ ngu' bi', cha' caca ngu' loo ji'na; ná ntsu'u chaca nu taca ta chacuayá' bi' ji'i̱ ngu'. 2Bi' cha' lacua, nu lo'o xu̱u̱ tya'a na lo'o ngu' nu laca cña, laca ñi'ya̱ si nxu̱u̱ na lo'o ycui' Ndyosi, cha' ycui' Ni ngusta Ni ji'i̱ ngu' bi' cha' caca ngu' loo ji'na. Si jua'a̱ xu̱u̱ tya'a na lo'o ngu', caja ñi'ya̱ nu xcube' ngu' ji'na li'; 3pana ná caca xcutsi̱i̱ ngu' nu laca loo ji'na si cña tso'o ti ndyu'ni na, sca ti ji'i̱ ngu' xña'a̱ xcutsi̱i̱ ngu' bi'. Si chañi cha' nti' ma̱ cha' ná cutsi̱i̱ ma̱ ji'i̱ ngu' nu laca cña, xcui' cha' tso'o ti cua'ni ma̱ li'. Ná tyiquee' lo'o ngu' nu laca cña bi' cua'ni chi̱ ngu' loo ma̱, si jua'a̱ xcui' cha' tso'o ti ndu'ni ma̱. 4Chacuayá' ji'i̱ ycui' Ndyosi laca ngu' bi' loo ji'na, cha' taca xtyucua ngu' ji'na; pana si cua'ni ma̱ cha' cuxi, li' ntsu'u cha' cutsi̱i̱ ma̱, cha' ntsu'u chacuayá' xcube' ngu' bi' ji'i̱ ma̱ li'. Chacuayá' ji'i̱ Ni laca ngu' bi' loo ji'na lacua, cuentya ji'i̱ Ni nchcube' ngu' ji'i̱ ngu' cuxi; 5bi' cha' ntsu'u cha' taquiya' ma̱ ji'i̱ cha' nu nchcui' ngu' bi'. Xcube' ngu' bi' ji'na si ná taquiya' na ji'i̱ ngu'. Lo'o jua'a̱ jlo ti' na cha' nga'a̱ cha' taquiya' na ji'i̱ ngu' bi', xqui'ya cha' liñi nu ntsu'u hique scaa na. 6La cui' jua'a̱ sca cha' tso'o laca si tya ma̱ lcaa cñi cña loo nu jña ngu' bi' ji'i̱ ma̱, cha' msu ji'i̱ ycui' Ndyosi laca ngu' nu laca cña bi', cha' bi' laca cña nu nda Ni ji'i̱ ngu' bi', cha' cua'ni ngu' nde chalyuu.

7Tya ma̱ ji'i̱ ngu' laca cña lcaa na nu ntsu'u chacuayá' ji'i̱ ngu' cha' jña ngu' ji'i̱ ma̱. Ná tyacui ma̱ cñi cña loo, ni ná tyacui ma̱ cñi ji'i̱ sca cña nu cua ngua'ni ngu'; tya ma̱ caya' bi' ji'i̱ ngu'. Lo'o jua'a̱ cua'ni tlyu ma̱ ji'i̱ ngu' bi', cua'ni chi̱ ma̱ loo ngu', tucuá ma̱ cña ji'i̱ ngu' bi'. 8Nga'aa su'ba ma̱ tane' hichu̱' ma̱. Sca lo ti cña lyiji cha' cua'ni ma̱ lo'o xa' ñati̱, cha' tso'o tsa cua'ni ma̱ ña'a̱ ma̱ ji'i̱ ngu'; cua laca ndyu'ni ma̱ lcaa cña nu ngulo ycui' Ndyosi ji'na, nu lo'o tso'o tsa ntsu'u tyiquee ma̱ ña'a̱ ma̱ ji'i̱ tya'a ñati̱ ma̱. 9Tyu̱u̱ lo cña ngulo Ni ji'i̱ ñati̱ nu lo'o nda Ni cha' lo'o Moisés nu ngua sa'ni; ndi'ya̱ nacui̱ Ni: “Ná tyu'u cha' ji'i̱ ma̱ lo'o clyo'o xa' ñati̱”, nacui̱ Ni. “Ná cujuii ma̱ ji'i̱ tya'a ñati̱ ma̱. Ná cuaana ma̱ na nu ntsu'u ji'i̱ tya'a ñati̱ ma̱. Ná tyacui ti' ma̱ na nu ntsu'u ji'i̱ tya'a ñati̱ ma̱”, nacui̱ Ni. Sca ti cuayá' ndyu'u lcaa cha' bi' lo'o chaca cha' nu nchcui' quityi re: “Ntsu'u cha' cua'ni tya'na ti' ma̱ ji'i̱ tya'a ñati̱ ma̱, ñi'ya̱ laca si ndu'ni tya'na ti' ma̱ ji'i̱ ycui' ca ma̱”, nacui̱ Ni. 10Nu lo'o ntsu'u tyiquee na ña'a̱ na ji'i̱ tya'a ñati̱ na jua'a̱, ná taca cua'ni na cha' cuxi lo'o ngu' bi' li'. Bi' cha' na cua ndye ndyu'ni na lcaa cña nu ngulo ycui' Ndyosi ji'na, nu lo'o cua'ni tya'na ti' na ji'i̱ tya'a ñati̱ na, cha' ntsu'u tyiquee na ña'a̱ na ji'i̱ ngu'.

11Cua'ni ma̱ cha' tyi'u ti' ma̱ lcaa cha' bi'. Cua jlo ti' ma̱ cha' cua ndyalaa hora cha' clyana na ji'i̱ ycui' Ndyosi; bi' cha' juani que ti' ma̱ lacua, cha' tii ti ti' ma̱ tyi'i̱ ma̱ chalyuu. Cua tya̱a̱ ti ycui' Jesús cha' cua'ni lyaá Ni ji'na, cha' ca̱qui'ya Ni ji'na. Nu lo'o ngusñi na cha' ji'i̱ Jesús tya clyo, li' ngua ti' na cha' tya lyiji tsa tyalaa tsa̱ bi' cha' tya̱a̱ ycui' Jesús; pana juani cua ngulala ti tyalaa tsa̱ bi'. 12Ñi'ya̱ laca chalyuu talya, jua'a̱ laca lo'o ndi'i̱ na chalyuu, xqui'ya cha' cuxi nu ntsu'u ji'na. Pana juani cua tye ti talya bi', cua tya̱a̱ ti Cristo cha' culotsu' Ni cha' cuxi bi'. Li' caca chalyuu ji'na ñi'ya̱ si cua nguxee tso'o, cha' lubii tsa xee caca li'. Bi' cha' nga'a̱ cha' xtyanu na ji'i̱ cha' cuxi nu ndu'ni ngu', cha' cuxi tsa tyiquee ngu' nu ndya'a̱ chalyuu talya bi'. Cua'ni cho'o na tyucui ña'a̱ na, cha' nguula tsa cua'ni na cña cuentya ji'i̱ Cristo nde chalyuu, ñi'ya̱ si laca na sendaru ji'i̱ Cristo. 13Clyana na ñi'ya̱ caca tyi'i̱ tso'o ti na lo'o ñati̱, ñi'ya̱ si laca na ñati̱ nu xcui' ndya'a̱ ndacua̱ ti su caca ña'a̱ ñati̱ ji'na. Li' ná tso'o laca si culiji na chalyuu ji'na jua'a̱ ti lo'o ndya'a̱ na cha' cu'bi na, masi xa' la juersa ji'na culiji na lo'o xcui' ndi'i̱ ti na ta'a. Ná tso'o bi'. Lo'o jua'a̱ ná ntsu'u cha' cua'ni suba' na lo'o xa' ñati̱, ná ntsu'u cha' clyana na xa' la cha' cuxi nu cua'ni na lo'o ñati̱; ni nga'aa clyana na cha' cusu̱u̱ lo'o ngu', nga'aa cua'ni liye' ti' na ji'i̱ ngu'. 14Ta ma̱ chacuayá' cha' caca loo ycui' Jesucristo nu Xu'na na ji'i̱ tyucui ña'a̱ ma̱; nga'aa taquiya' na ji'i̱ lcaa lo cha' cuxi, cha' nu tiji̱' tsa ti' na ji'i̱ xqui'ya cha' laca na ñati̱ ti.

Currently Selected:

ROMANOS 13: cta

Highlight

Copy