2 KORINICA 1

1 # Caka 18.1 Oqo na i vola i Paula na i apositolo i Karisito Jisu ena lewa ni Kalou kei Timoci na wekada.

Kivei ira na i soqosoqo lotu mai Korinica kei ira talega na tamata ni Kalou mai Akaia taucoko.

2Me nomuni na loloma kei na vakacegu mai vua na Kalou o Tamada kei na Turaga ko Jisu Karisito.

Sa Vakavinavinaka o Paula Vua na Kalou

3Me vakavinavinakataki na Kalou na Tama ni noda Turaga ko Jisu Karisito, o koya na Tama ni yaloveivosoti, na Kalou sa sega ni mudu rawa na nona veivakacegui! 4Sa vakacegui keda o koya ena noda rarawa kecega, ka sa rawa kina vei keda me da vakacegui ira era sota kaya na veimataqali leqa kecega, ena veivakacegui ga sa rawata mai vua na Kalou. 5Me vaka ga na noda vakaivotavota ena rarawa i Karisito, eda na vakaivotavota vakakina e na veivuke levu ni Kalou e na vuku i Karisito. 6Ia kevaka keitou sa vakararawataki, sa ka mo ni vakacegui ka vakabulai kina. Kevaka keitou sa vakacegui, sa ka mo ni vakacegui kina ena nomuni vosota talega na veika rarawa vata ga keitou a vakararawataki kina. 7Sa tudei na neitou vakanuinui me baleti kemuni, ni keitou sa kila ni o ni sa vakaivotavota tiko ena vakararawataki, o ni na vakaivotavota talega ena neitou vakacegu.

8 # 1Kori 15.32 Ni keitou sa vinakata mo ni kila na veiwekani na veivakararawataki keitou a sota kaya mai Esia. Sa bibi ka dredre sara vei keitou ka keitou sa sega tale ni nuitaka na bula. 9E vaka sa lewai me keitou mate, me keitou kakua kina ni vakararavi ga vei keitou ia me keitou vakararavi ga vua na Kalou o koya sa vakaturi ira cake tale na mate. 10Sa i koya sa vakabulai keitou tikoga. Keitou sa vakanuinui tu vua ni na vakabulai keitou tale, 11me vaka o ni vukei keitou talega ena nomuni masu. Sa na qai lewe levu kina era vakavinavinaka vua na Kalou ena vuku ni veivakalougatataki ni Kalou vei keitou.

Veisau na i Tuvatuva ni Veisiko i Paula

12Ni sai koya oqo na ka keitou cibitaka: Sa vakadinadinataka na neitou lewa e loma na neitou i valavala e vuravura oqo ka vakauasivi vei kemuni, ni sa caka ena yalododonu kei na yalodina vua na Kalou. Ia sa sega ni rawa oqo ena vuku vakatamata, sa rawa ga ena lolomasavu ni Kalou. 13Ni sa sega ni dua na ka tani keitou vola yani vei kemuni, ia na ka ga e rawa ni o ni wilika ka kila. Au nuitaka ni o ni na kila vinaka sara, 14na ka o ni sa kila tu oqo vakatikina ga, ni na rawa mo ni cibitaki keitou me vaka na neitou na cibitaki kemuni ena Siga ena lesu tale mai kina na Turaga ko Jisu.

15Ena noqu vakadinata sara na ka oqo, au a lokuca taumada kina me'u lako yani vei kemuni, me vakaruataki kina vei kemuni na veivakalougatataki. 16#Caka 19.21Ni'u a nakita me'u sikovi kemuni talega ena noqu lako ki Masitonia, kei na noqu lesu tale mai kina ka mo ni na qai vukei au me'u lako sara yani ki Jutia. 17Au a lomaloma rua li ena noqu vakotora na noqu i loku? Se au a vakotora na noqu i loku me vaka e dua na tamata vakavuravura, sa rawarawa vua me kaya, “Io, io” ka “Sega, sega” ena duavata tikoga na gauna? 18Me vaka ga na nona yalodina na Kalou sa sega kina ni “Io”, ka “Sega”, na neitou vosa vei kemuni. 19#Caka 18.5Ni sa sega ni “Io” se “Sega” ko Jisu Karisito na Luve ni Kalou o koya keitou sa vunautaka vei kemuni oi keitou o Sailasa, Timoci vata kei au. Sa i koya ga na nona “Io” na Kalou; 20ka sai koya na “Io” ki na vosa ni yalayala kecega ni Kalou. O koya oqo, ena vuku i Jisu Karisito, sa tukuni kina na “Emeni” me vakarokorokotaki kina na Kalou. 21Ni sai koya ga na Kalou sa vakataudeitaki keitou vata kei kemuni vei Karisito ka sa lumuti keda. 22Sa i koya talega na Kalou sa vakatakilakilataki keda me da sa nona, ka solia mai na Yalona ki na lomada me i vakadei ni veika kece sara ena solia vei keda.

23Ia au sa kaciva na Kalou me noqu i vakadinadina, o ya ni'u a lomani kemuni walega, au sega ni lako yani kina i Korinica. 24Ni kua ni nanuma ni keitou sa via lewa tikoga yani na nomuni vakabauta; keitou sa kila ni o ni sa tudei tu ena nomuni vakabauta. Ia keitou via veivuke ga vei kemuni ena ka mo ni reki kina.

Currently Selected:

2 KORINICA 1: FNV

Highlight

Copy