2 KORINICA 2

Na Levu ni Loloma i Paula Vei Ira mai Korinica

1Au sa vakadeitaka oti e lomaqu me'u kakua tale ni cakava e dua na veisiko e veivakararawataki vei kemuni. 2Ia kevaka au sa vakararawataki kemuni o cei sa qai vo me vakamarautaki au? Sa i ira ga na tamata au sa vakararawataka! 3Sa i koya sara ga na ka oqo au a vola yani vei kemuni e liu me kakua ni vakararawataki na lomaqu ni'u sa kila vakaidina, ni kevaka au marau, o ni na marau talega. 4Au volavola yani vei kemuni ena rarawa levu kei na yaluma ni lomaqu, ka lako vakayauyau na wai ni mataqu. E sega ni ka mo ni rarawa kina, mo ni kila ga kina na levu ni noqu loloma vei kemuni.

Me Vosoti na Tamata Cala

5Kevaka e dua na tamata e vakavuna na nona rarawa e dua tale na tamata, e sega ni vakararawataki au taudua ga, ia au sega ni via vakabibitaka sara, ni sa vakararawataki kemuni kece sara talega. 6Na tamata sa vakaoqo sa ganita na i totogi mai vei ira na lewe vuqa. 7Ia sa dodonu mo ni vosoti koya ka vakacegui koya, de na qai bikai ena rarawa bibi sara. 8Sa i koya oqo au sa vakamasuti kemuni kina mo ni vakadeitaka na nomuni lomani koya. 9Ni sai koya sara ga oqo na vuna au volavola yani kina; me'u vakatovolei kemuni ka me'u kila, o ni sa dau talairawarawa ena ka kecega se sega. 10Ni o ni sa vosota e dua na tamata, au na vosoti koya talega. Ni'u sa vosota e dua na tamata, au sa vosoti koya dina; au vakayacora oqo ena vukumuni ena mata i Karisito. 11Eda sa kila na veivadi ca nei Setani, ia me da kua sara ni laivi koya me rawai keda.

Na Nuiqawaqawa ni Yalo i Paula mai Tiroa

12 # Caka 20.1 Ni'u sa yaco yani ki Tiroa me'u vunautaka na i Tukutuku Vinaka, au sa raica ni sa dolava tu vei au na sala na Turaga ena vuku ni cakacaka mai kea. 13Ia sa sega ni nuiqawaqawa na yaloqu ni'u sa sega ni kunei Taito na wekaqu. Au sa mai tatau yani vei ira ka lako sara yani ki Masitonia.

Na Qaqa ena Vuku i Karisito

14Me da ia na vakavinavinaka vua na Kalou! Ena vuku ni noda sa semati vei Karisito, eda sa dauliutaki kina mai vua na Kalou me vaka na i lawalawa bobula sa vakaitavi ena tayabe qaqa i Karisito. Sa vakayagataki keitou na Kalou me vakadewataki ki na veivanua kecega na i tukutuku ni Kalou me vaka e dua na ka boi vinaka. 15Ni keitou sa vaka na ka boi vinaka sa vakama na Karisito vua na Kalou ka sa lako yani vei ira era sa vakabulai kei ira era se yali voli ga. 16Vei ira sa sese tiko, sa i boiboi ni bona e dau veivakamatei; ia vei ira sa vakabulai, sai boiboi ni bula me ra bula kina. Ia o cei sa veiganiti kei na i lesilesi oqo? 17Keitou sa sega ni vakataki ira eso era sa dau vakatanitaka na vosa ni Kalou, ia keitou sa vosa me vaka na tamata yalodina sa talai mai vua na Kalou, keitou sa dau vosa ena yaca i Karisito ena mata ni Kalou.

Currently Selected:

2 KORINICA 2: FNV

Highlight

Copy