1 KORINICA 13

Na Loloma

1Kevaka au sa vosataka na nodra duivosavosa na tamata kei na nodra vosa na agilosi, ia sa sega vei au na loloma, na noqu vosa sa vaka walega na kaukamea sa rorogo, se na lali sa tataqiriqiri. 2Sa rawa ni tu vei au na i solisoli ni dauvunau; sa rawa ni tu vei au na kila-ka me kilai rawa kina na veika vuni kecega; sa rawa ni tu vei au na vakabauta e gadrevi me tosoya na ulunivanua — ia kevaka sa segai vei au na loloma, au sa ka walega.#Maciu 17.20; 21.21; Mari 11.23 3Sa rawa vei au me'u solia tani yani na veika kecega sa noqu, se mani solia sara na yagoqu me vakamai — ia kevaka sa segai vei au na loloma, sa sega ga na kena yaga vei au.

4Sa dauvosota vakadede ka yalovinaka na loloma; sa sega ni dauvuvu se qaciqacia se dokadoka na loloma; 5sa sega ni viavialevu se daucakava na ka tawa kilikili se daunanumi koya vakataki koya na loloma; sa sega ni daukatona na veika ca na loloma; 6sa sega ni daurekitaka na ca na loloma, ia sa rekitaka ga na dina. 7Sa sega ni sorosoro rawarawa na loloma; ka sa sega ni druka rawa ena vakabauta, ena i nuinui, kei na vosota.

8Sa tawamudu na loloma. Ia na veivosa ni parofisai ena takali ga; na i solisoli ni duivosavosa ena mudu mai; na kila-ka ena oti yani. 9Ni sa vakatikina ga na veika eda sa kila, ka sa vakatikina ga na vosa ni parofisai; 10ia ni sa yaco mai na ka sa taucoko vakaoti, ena qai takali tani na ka sa vakatikina ga. 11Ni'u a se gone, sa dauvaka na gone na noqu i vosavosa, na noqu kila-ka, kei na noqu vakanananu; ia ni'u sa yaco me'u tamata bula, au sa biuta tani na i tovo vagonegonea. 12Io, edaidai eda sa raica me vaka na titiro e na i iloilo buwawa; ia maimuri ena vaka na veirai ena matanavotu: edaidai ka'u sa kila vakatikina ga; ia mai muri, ka'u na kila me vaka ka'u sa kilai vakaoti. 13Ia oqo, sa tudei na vakabauta, na i nuinui, kei na loloma; sa uasivi cake vei iratou na ka tolutolu oqo na loloma.

Currently Selected:

1 KORINICA 13: FNV

Highlight

Copy