1 KORINICA 14

Na i Solisoli ni Parofisai kei na Duivosavosa

1Ni vakasaqara taumada na loloma. Ni vagolea na yalomuni ena veisolisoli vakayalo, ka vakabibi mo ni rawa ni dau parofisai. 2O ira era sa vosa ena dua na vosa tani se duivosavosa era sa sega ni vosa vei ira na tamata, ia ki vua ga na Kalou, baleta ni sa sega ni dua na tamata e kila rawa. Era sa tukuna ga na veika vuni ena veiceguvi ni Yalo Tabu. 3Ia o ira era parofisai era sa vosa vei ira na tamata me ra vukei ira, me ra vakayaloqaqataki ira, ka vakacegui ira. 4O ira era duivosavosa era sa vukei ira ga vakataki ira, ia o ira era parofisai era sa vukea na lewe ni soqosoqo lotu kece.

5Au sa vinakata oqo mo ni duivosavosa kece; ia au sa gadreva vakalevu cake ga mo ni parofisai. Ni sa yaga vakalevu cake o ira era parofisai mai vei ira era duivosavosa — ka vakavo ga kevaka e tiko e dua e rawa ni vakadewataka na vosa sa cavuti, me rawa ni vukei kina na lewenilotu taucoko. 6Ni'u sa lako yani vei kemuni na wekaqu, a cava beka ena kequ yaga vei kemuni kevaka au sa vosa vei kemuni ena vosa ni vanua tani? Sa segai sara na kequ yaga, ka vakavo ga kevaka au sa kauta yani vei kemuni eso na i tukutuku vuni ni Kalou, se na kila-ka, se na i vunau, se na i vakavuvuli.

7Ena dua na kena i vakaraitaki, me da raica mada na i yaya ni vakatagi eso, era sa ka mate, me vaka na bitu ni vakatagi se na api. Kevaka e sega ni tu na duidui ni kedra i rogorogo, ena qai kilai rawa vakacava na i yaya ni vakatagi e vakayagataki tiko? 8Kevaka sa solia na davui e dua tani tale na rorogo, ia o cei ena qai vakarautaki koya ki na i valu? 9Sa vakakina vei kemuni; kevaka o ni sa tukuna ena vosa tani e dua na i tukutuku sa sega ni kilai rawa, ena qai kilai rawa vakaevei na ka o ni via tukuna? O ni sa vosa walega ki na cagi. 10Sa dina ni sa vuqa sara na veimataqali vosa e vuravura, ia sa sega ni dua vei ira me sega na kena i balebale. 11Kevaka au sa sega ni kila na i balebale ni vosa, au sa qai vulagi vei koya sa vosa tiko, ka sa vulagi talega vei au o koya. 12Ia me vaka ni o ni sa gadreva vakalevu na veisolisoli vakayalo, ni gumatua sara mo ni vakayagataka vakalevu na veisolisoli era vukea na tarai cake ni soqosoqo lotu.

13O koya sa duivosavosa me na masulaka talega me soli vua na i solisoli me vakadewataka rawa kina na veika sa tukuna. 14Kevaka au masu ena dua na vosa tani, sa masu tikoga na yaloqu, ia sa sega ga ni vakaitavi kina na noqu vakasama. 15A cava me'u qai cakava? Au na masu ena yaloqu, ka'u masu talega ena noqu vakasama; au na laga sere ena yaloqu, ka'u na laga sere talega ena noqu vakasama. 16Ni o ni vakavinavinaka vua na Kalou ena yalomuni walega, ena qai kila vakacava o ira na tamata mai taudaku o ni soqoni vata tiko me ra tukuna na “Emeni” ena nomuni masu ni vakavinavinaka? Era sa sega ni kila na veika o ni sa kaya. 17Kevaka e mani daumaka sara na nomuni masu ni vakavinavinaka, era sa sega ga ni vukei ena dua na ka o ira na kena vo.

18Au vakavinavinakataka na Kalou ni sa levu cake sara mai vei kemuni na noqu duivosavosa. 19Ia ena gauna ni sokalou, sa vinaka cake vei au me'u vosataka ga e lima na vosa sa kilai raraba, me ia kina na veivakatavulici, mai na kena vosataki e udolu na vosa ena veivosa eso na sega ni kilai.

20Kemuni na veiwekani, ni kakua ni vaka tiko na gone ena nomuni vakasama; mo ni gone lalai ga ena vuku ni i tovo ca, ia mo ni tamata bula ena nomuni vakasama. 21Ni sa volai tu ena Vola Tabu:

“‘Au na vosa vei ira na tamata oqo,

Vei ira na tamata era vosa ena vosa tani.

Kei na gusudra na kai matanitu tani,

Ia era na sega ga ni vakarorogo vei au,’

Sa kaya na Turaga.”#Aisea 28.11,12

22O koya oqo, sai vakadinadina kina vei ira era tawa vakabauta na i solisoli ni duivosavosa, sa segai ga vei ira sa vakabauta, ka sai vakadinadina vei ira sa vakabauta na i solisoli ni parofisai, sa segai ga vei ira na tawa vakabauta.

23Ni kevaka sa vakasoqoni vata mai na i soqosoqo lotu kece, ka o ni sa qai tabalaka kecega na duivosavosa — ka ra sa curu yani eso na tamata mai taudaku kei ira na tawa vakabauta, era na sega li ni kaya ni o ni sa lialia? 24Ia kevaka era sa parofisai na tamata kecega ena gauna era curu yani kina na tamata mai taudaku kei ira na tawa vakabauta, era na qai kilai yalodra mai na veika era sa rogoca. Era na lewai o ira oqo mai na veika kece sara era rogoca, 25ena vakavotui na veika vuni ni lomadra, era na qai cuva sobu ka vakarokorokotaka na Kalou, ka vakatusa, “Sa tiko vakaidina na Kalou ena kemuni maliwa!”

Na Tuvai Vinaka ni Vakarau ni Lotu

26Kemuni na wekaqu, sai koya oqo na i balebale ni ka au sa tukuna vei kemuni. Ni o ni sa soqoni vata mo ni qarava na Kalou, me dua e nona i tavi na sere, e dua me veituberi, e dua tale me vakatakila na i tukutuku mai vua na Kalou, e dua tale me duivosavosa, kei na dua tale me vakadewataka na vosa sa tukuni. Na veika kece oqo sa vakayacori me vukea na tarai cake ni soqosoqo lotu. 27Kevaka e dua sa duivosavosa, e rawa ni rau lewe rua, se tolu ga, me ratou veitaravi yadudua ga; ka me dua me qai vakadewataka. 28Ia kevaka sa sega ni dua me vakadewataka, me galu ga o koya sa duivosavosa ena gauna ni lotu, ka me vosa ga vei koya vakai koya, vua talega na Kalou. 29Me lewe rua se tolu na parofita me ratou qai vosa, ka me ra qai vakadeuca se vakalewa na veika sa tukuni o ira na kena vo. 30Ia kevaka sa vakatakilai mai e dua na i tukutuku ni Kalou vua tale e dua sa dabe voleka, me qai vosa ga o koya ka me galu o koya e vosa tiko. 31Sa rawa vei kemuni kece mo ni parofisai, ka mo ni vakaitavi yadudua, me rawa mo ni vuli kece kina ka vakayaloqaqataki. 32Na i solisoli ni parofisai e dodonu me tiko na kena lewa mai vua ga sa ia na parofisai, 33baleta ni sa sega ni vinakata na Kalou me da veisei, ia me da duavata ga ka tiko veilomani.

Me vaka sa yaco tiko ena veisoqosoqo lotu kece, 34me ra galu ga o ira na yalewa ena gauna ni soqoni. Sa vakatabui vei ira me ra vosa; me vaka sa kaya na nona Lawa na Jiu, era sega ni dodonu me ra veiliutaki. 35Kevaka era via kila e dua na ka, me ra qai taroga ga na watidra mai vale. Sa ka vakamadua me vosa na yalewa ena soqoni vakalotu.

36Sa taka li mai vei kemuni na vosa ni Kalou? Se sa yaco beka mai ena vukumuni duadua ga? 37Kevaka e dua sa nanuma ni sai talai ni Kalou o koya se tiko vua e dua na i solisoli vakayalo, e dodonu me kila taumada ni sai vunau ni Turaga na veika ka'u sa vola vei kemuni. 38Ia kevaka sa sega ni kauwaitaka o koya na veika oqo, mo ni kua talega ni qai kauwaitaki koya. 39O koya oqo, kemuni na wekaqu, ni vagoleva na yalomuni mo ni parofisai, ia ni kakua ga ni vakatabuya na duivosavosa. 40Na veika kecega e dodonu me vakayacori ena sala dodonu ka tuvalaki vakamatau.

Currently Selected:

1 KORINICA 14: FNV

Highlight

Copy