1 KORINICA 15

Na Tucake Tale Mai na Mate i Karisito

1Oi kemuni na veiwekani, au sa gadreva me'u tukuna tale vei kemuni na i Tukutuku Vinaka ka'u a vunautaka vei kemuni, o koya o ni sa ciqoma ka sa tudei kina. 2Sa i koya oqori na kosipeli, na i tukutuku vinaka ka'u sa vunautaka vei kemuni. O ni sa vakabulai mai na kosipeli kevaka o ni taura dei tiko — ka vakavo kevaka sa ka walega na nomuni vakabauta.

3Au sa vakadewataka taumada vei kemuni na ka bibi duadua ka'u sa ciqoma: ni sa mate na Karisito ena vuku ni noda i valavala ca me vaka sa volai ena i Vola Tabu;#Aisea 53.5-12 4ni sa bulu talega, ka sa vakaturi cake tale ki na bula ena i katolu ni siga, me vaka sa volai ena i Vola Tabu;#Same 16.8-10; Maciu 12.40; Caka 2.24-32 5a sa rairai vei Pita, ka vakakina vei iratou kece na i apositolo lewe tinikarua.#Luke 24.34; Maciu 28.16,17; Mari 16.14; Luke 24.36; Joni 20.19 6E a qai rairai vei ira e sivia e lewe lima na drau na veiwekani ena dua vata ga na gauna, e lewe vuqa vei ira oqori era sa bula tikoga edaidai, ka so era sa vakacegu yani. 7Sa rairai e muri o koya vei Jemesa, ka vakakina vei ira kecega na i apositolo.

8A sa qai rairai sara e muri vei au, ka dina ga ni'u sa vaka e dua na gone sucu dole oi au.#Caka 9.3-6 9Ni'u sai murimuri ni tamata vei ira na i apositolo kecega, ka sa sega ni yaga me'u vakatokai me dua na i apositolo, baleta ni'u a vakacacana na i soqosoqo lotu ni Kalou.#Caka 8.3 10Ia ena vuku ga ni lolomasavu ni Kalou ka'u sa yaco rawa kina me'u vaka tu oqo edaidai, ka sa sega ni maumau wale na nona lolomasavu sa soli oqo vei au. Ia ena dua tale na yasana, au sa cakacaka vakaukauwa cake sara mai vei ira kecega na i apositolo, ia oqori sa sega ni o au, na lolomasavu ga ni Kalou sa cakacaka tiko e lomaqu. 11O koya oqo, kevaka sa vakayacora o au se o ira, sai koya oqo na ka keitou sa vunautaka, ka sai koya na ka o ni sa vakabauta.

Na Nodra Tucake Tale o Ira sa Mate

12Kevaka sa vunautaki vakaoqo ni sa vakaturi cake tale mai na mate na Karisito, era sa qai kaya vakaevei eso vei kemuni ni ra na sega ni tucake tale ki na bula o ira na mate? 13Ni kevaka sa sega ni tucake tale o ira na mate, sa kena i balebale o ya ni sa sega ni tucake tale mai na Karisito; 14ia kevaka sa sega ni tucake tale mai na mate na Karisito, sa qai sega sara na ka me keitou vunautaka vei kemuni ka sa sega talega na ka mo ni vakabauta. 15Keitou sa na kunei talega ni keitou sa vosa lasu ena vuku ni Kalou, baleta ni keitou sa tukuna ni sa vakaturi Karisito cake tale na Kalou — ia kevaka sa mani dina ni ra sa sega ni vakaturi cake tale ki na bula o ira na mate, sa dusia oqori ni sa sega ni vakatura cake na Karisito o koya. 16Ni kevaka era sa sega ni tucake tale o ira na mate, sa sega talega ni tucake tale na Karisito. 17Ia kevaka sa sega ni vakaturi cake tale na Karisito, sa qai sega ni yaga na nomuni vakabauta ka o ni se yali tu ga ena nomuni i valavala ca. 18Era sa rusa talega o ira era sa vakabauti Karisito era sa mate. 19Kevaka sa ka walega ni bula oqo na noda vakanuinui vei Karisito, eda sa qai tamata vakaloloma duadua mai vei ira na tamata kecega.

20Ia na kena dina sai koya ni sa vakaturi cake tale mai na mate na Karisito, ka sa vakataudeitaka ni ra na vakaturi cake talega mai na mate o ira na mate era sa moce tu. 21Me vaka ni sa vakavuna na mate e dua na tamata, sa vakavuna talega na tucake tale mai na mate e dua na tamata. 22Ni ra sa mate na tamata kecega ena vuku i Atama, ia era sa vakaturi cake tale ki na bula na tamata kecega ena vuku i Karisito. 23Ia sa dui muria ga na kena veitarataravi: sa liu taumada, na Karisito; sa qai muri o ira era sa nei Karisito, ni sa lako tale mai o koya. 24Ena qai yaco emuri na i otioti ni gauna; ena solia kina na Karisito na lewa vua na Kalou na Tamana ni sa vakamalumalutaki ira oti na daulewa kecega, kei ira na veiliutaki kecega, kei na kaukauwa kecega. 25Ni sa dodonu me vakataulewa tikoga na Karisito me yacova na gauna sa vakadrukai ira kece kina na nona meca na Kalou, ka biuti ira ena ruku ni yavana.#Same 110.1 26Na i otioti ni meca me na vakadrukai sai koya o mate. 27Ni sa tukuna na i Vola Tabu, “Ni sa vakamalumalumutaka na Kalou na ka kecega ena ruku ni yavana.” Ia me kilai vakamatata ga ni kena tukuni oqo “na ka kecega”, e sega ni okati kina na Kalou, o koya ka sa biuta na ka kecega ena ruku i Karisito.#Same 8.6 28Ia ni sa la'ki biu na ka kecega ena ruku ni veiliutaki i Karisito, o koya vakataki koya, na Luvena, ena biuti koya ena ruku ni veiliutaki ni Kalou, o koya ga ka sa biuta na ka kecega ena rukuna; ka sa lewa tikoga kina na Kalou na veika kecega.

29Kevaka sa sega na tucake tale mai na mate, a cava era na cakava o ira era papitaisotaki ena vukudra na mate? Kevaka era na sega ni vakaturi cake tale na mate, na cava era papitaisotaki kina na tamata ena vukudra? 30E qai cava na vuna edatou bolea tikoga kina na veika rerevaki ena veigauna kece sara? 31Kemuni na wekaqu, au sa sotava tiko na mate ena veisiga! Na noqu dokadokataki kemuni ena vuku ni noda bula ni veisemati kei Karisito Jisu na noda Turaga sa vakavuna na noqu tusanaka na ka oqo. 32A cava li me na kena yaga vei au kevaka sai nakinaki ga vakatamata na noqu veivala kei na manumanu kila mai Efeso? Ni kevaka era sa sega ni vakaturi cake tale ki na bula o ira na mate, ia ena qai vaka ga na veika sa volai oqo, “Me da kana ga ka gunu, ni da na mate ni mataka.”#Aisea 22.13

33Ni kakua sara ni vakacalai. “Sa dau vakarusa na i vakarau vinaka o ira na i tokani ca.” 34Mo ni kilai yalomuni tale mada ka tarovi kemuni mai na i valavala ca; ka tiko talega eso vei kemuni era se sega ni kila na Kalou. Au sa vosa vakaoqo mo ni madua kina.

Na Tucake Tale ni Yago

35Ia ena taroga e dua, “Era na vakaturi cake tale vakaevei o ira na mate? Na mataqali yago vakacava era na lako vata mai?” 36Tamata lialia! Na i tei sa teivaki ki na qele ena sega mada ni bula cake mai ka vakavo ga ke sa mate taumada. 37Me baleta na i tei o teivaka, o na sega ni teivaka na yago ni ka ena la'ki tubu cake mai, ia na sorena ga se na kena i tei, oqo me vaka beka na sore ni sila se i tei ni dua tale na ka. 38Ni sa solia na Kalou ki na i tei o ya na yago sa vinakata o koya, ka sa solia talega ki na i tei yadua na yago sa veirauti kaya.

39Sa sega ni tautauvata na yagodra na veika bula kecega. Sa duatani ga na mataqali yago vei ira na tamata, e dua tale o ira na manumanu, e duatani tale na manumanu vuka, ka duatani na ika.

40Era sa tu talega na yago vakalomalagi kei na yago vakavuravura; ka sa duatani na i ukuuku ni yago vakalomalagi mai na i ukuuku ni yago vakavuravura. 41Sa tikoga na nona i ukuuku na matanisiga, ka duatani na nona i ukuuku na vula, sa duatani talega na i ukuuku ni veikalokalo; ka sa tiko talega na duidui ni nodra i ukuuku na veikalokalo yadua ena kedra maliwa.

42Ni sa vakaoqo na nodra vakaturi cake tale ki na bula o ira na mate. Ni sa buluti na yago, sa vakaiyalayala ga na bula; ni sa vakaturi cake tale, sa tawamudu na bula. 43Ni sa buluti, sa rairai beci ka malumalumu; ni sa vakaturi cake tale, sa rairai vinaka ka kaukauwa. 44Ni sa buluti, sa yago vakatamata; ni sa vakaturi cake tale, sa yago vakalou. Ni sa tiko vakaidina na yago vakatamata, sa tiko talega vakakina na yago vakalou. 45Ni sa volai ena i Vola Tabu, “Na i sevu ni tamata, o Atama, sa buli me tamata bula;” ia na i otioti ni Atama sai koya na Yalo sa dau vakavouia na bula.#Vteki 2.7 46A sa sega ni liu taumada mai na ka vakayalo, ia na ka vakayago ga, ka sa qai muri na ka vakayalo. 47Sa buli na i matai ni Atama mai na qele ka sa lako mai vuravura; a sa lako mai lomalagi na i karua ni Atama. 48Era sa vakataki koya sa lako mai vuravura o ira era sa vakavuravura, ka ra sa vakataki koya sa lako mai lomalagi o ira era sa vakalomalagi. 49Me vaka ni da sa veiucui kei koya sa buli mai na qele, eda na qai veiucui vakakina kei koya sa lako mai lomalagi.

50Kemuni na veiwekani, na i balebale ni veika au kaya tiko oqo: ni sa sega ni rawa ni vakaivotavota ena Matanitu ni Kalou na yago sa vakalewe ka vakadra, kei na yago sa bula vakaiyalayala ga sa sega ni rawa ni vakaivotavota ena bula sa tawamudu. 51Ni rogoca oqo, au na tukuna vei kemuni e dua na ka vuni! Eda na sega ni mate kece, ia eda na vukici ga vakasauri, 52me vaka na sauriva ni mata, ni sa uvu na i otioti ni davui. Ni sa tagi na davui, era na tucake tale na mate, ka ra na sega tale ni mate, ia oi keda eda na vukici kece sara.#1Cesa 4.15-17 53Ni yago sa mate rawarawa oqo ena vukici me yago sa sega ni mate rawa; kei na bula sa vakaiyalayala ga ena vukici me bula sa tawamudu. 54Ena gauna sa vukici kina na yago mate oqo me yago sa sega ni mate rawa, ka sa vukici na bula sa vakaiyalayala me bula sa tawamudu, ena qai vakayacori kina na ka sa volai: “Sa vakarusai o mate; sa ka taucoko na qaqa!”#Aisea 25.8

55“O iko, Mate, sa evei na nomu qaqa?

O iko, Mate, sa evei na nomu kaukauwa ni veivakarusai?”#Osea 13.14 (LXX)

56Sa kauta mai o Mate na kaukauwa me veivakarusai kina mai na i valavala ca, ka sa kauta mai na i valavala ca na nona kaukauwa mai na Lawa. 57Ia sa vakavinavinakataki ga na Kalou, o koya sa solia vei keda na qaqa ena vuku ni noda Turaga ko Jisu Karisito!

58O koya oqo, kemuni na wekaqu, mo ni qai tudei sara ka kakua ni vakayavalati vakarawarawa. Ni vakaogai kemuni tikoga vakalevu ena cakacaka ni Turaga, me vaka o ni sa kila ni sa sega ni ka wale na nomuni cakacaka ena vuku ni Turaga.

Currently Selected:

1 KORINICA 15: FNV

Highlight

Copy