1 KORINICA 12

Na Veisolisoli Vakayalo

1Kemuni na veiwekani, ena vuku ni veisolisoli vakayalo, au sega ni vinakata mo ni sega ni kila. 2O ni sa kila ni gauna o ni se tawa-lotu tu kina, o ni a vakatagarogaroi ka vakacalai vakalevu ena qaravi kalou matakau eso sa sega ni vosa rawa. 3Au sa vinakata kina mo ni kila ni sa sega ni rawa vua e dua na tamata sa liutaki koya na Yalo ni Kalou me na kaya “Me rukaki ko Jisu!” ka sa sega talega ni rawa vua e dua me vakatusa “Sa Turaga ko Jisu”, kevaka e sega ni vakavuna na Yalo Tabu.

4Sa duidui na veisolisoli vakayalo, ia sa dua bau ga na Yalo Tabu ka sa vakavuna.#Roma 12.6-8 5Sa vuqa na sala duidui eso ni veiqaravi, ia sa dua bauga na Turaga sa qaravi. 6Sa vuqa na kila-ka vakacakacaka ni veiqaravi, ia sa dua bauga na Kalou sa solia na kila-ka oqo ki na tamata yadua. 7A sa soli vei ira na tamata yadua na i vakatakilakila ni nona cakacaka na Yalo Tabu me yaga raraba vei keda. 8Sa soli ki vua e dua na vosa vuku ena cakacaka ni Yalo Tabu, vua tale e dua sa soli kina na kila-ka ena cakacaka talega ni Yalo Tabu, 9ki vua tale e dua na vakabauta ena cakacaka talega ni Yalo Tabu, ki vua tale e dua me veivakabulai. 10Ki vua tale e dua na veicakacaka mana, e dua na parofisai, vua tale e dua me rawata me tukuna na kedra duidui na veisolisoli sa vakavuna na Yalo Tabu kei na kena e vakavuna na tevoro, e dua tale me duivosavosa, kei na dua tale me vakadewataka na duivosavosa. 11Ia na Yalo Tabu e duabau ga sa vakavuna na veika kece oqo; sa solia o koya na veisolisoli duidui eso ki na tamata yadua, me vaka na lomana.

Sa Dua Bauga na Yago ka Vuqa na Veitikina

12Me vaka sa dua bauga na yago ka vuqa na veitikina, ia na veitiki ni yago sa vuqa sara, sa buli kina e dua na yago taucoko. Sa vaka talega kina na Karisito.#Roma 12.4,5 13Eda sa papitaisotaki kece ki na dua ga na yago ena dua bauga na Yalo Tabu. Se da Jiu se da kai Kirisi, se da bobula se da tamata galala, eda sa vagunuvi talega mai na dua bauga na Yalo Tabu. 14Ni sa sega ni dua walega na tiki ni yago, sa vuqa sara na veitikina. 15Kevaka e kaya na yava, “Au sa sega ni tiki ni yago oi au baleta ni'u sega ni liga,” ena sega ni vakavuna oqori me sa sega kina ni tiki ni yago. 16Kevaka e kaya na daliga, “Au sa sega ni tiki ni yago oi au baleta ni'u sega ni mata,” ena sega ni vakavuna oqori me sa sega kina ni tiki ni yago. 17Kevaka sa duabulu ga na yaloka ni mata na yago taucoko, na cava li me na qai rogo kina? Kevaka sa daliga na yago taucoko, na cava li me na boica kina na ka? 18Ia me vakaoqo, a sa tuvana na Kalou na veitikina kece sara ena yago me vaka na lomana. 19Kevaka sa duabulu ga na tiki ni yago, sa sega ni vakatokai oqori me dua na yago! 20Ni sa vuqa na veitikina ka sa duabau ga na yago.

21O koya oqo ena sega ni kaya rawa kina na mata ki na liga, “Au sa sega ni gadrevi iko.” Se me kaya na ulu ki na yava, “E sega na kemu yaga vei au.” 22Ia eda sa vakadinata ga ni da sa gadreva talega na veitiki ni yago vakaoqo era sa rairai malumalumu; 23ni da sa dau qarauna vakalevu cake na veitiki ni yagoda sa nanumi ni ra sega soti ni yaga; kei na veitiki ni yagoda sa sega so ni rairai vinaka eda sa dau ukutaka vakalevu cake, 24ia sa sega ga ni gadreva oqo na veitiki ni yagoda rairai vinaka. Sa i koya ga na Kalou sa bulia na yago ena kena i bulibuli me dokai vakalevu cake kina na veitikina sa malumalumu. 25Sa sega kina na tatawasewase ena yago, ia sa tautauvata ga na nodra veimositi vakai ira na veitikina kece sara. 26Kevaka sa rarawa e dua na tiki ni yago, era sa rarawa vata kaya na veitikina kecega; kevaka sa dokai e dua na tikina, era sa reki vata kaya na veitikina kecega.

27Sa i kemuni na yago i Karisito, ka sa tiki ni yago oqo oi kemuni yadudua. 28A sa lesia na Kalou eso na tamata ki na i soqosoqo lotu: ai matai o ira na i apositolo, ai karua o ira na parofita, ai katolu o ira na i vakavuvuli; sa qai tarava yani o ira sa dau cakava na cakacaka mana, e tarava yani o ira sa soli vei ira na kaukauwa me ra dauveivakabulai se dauveivukei se dauveiliutaki se duivosavosa.#Efe 4.11 29Era sa sega kece ni apositolo se parofita se vakavuvuli. Sa sega ni tiko vei ira kecega na kaukauwa me ra vakayacora kina na cakacaka mana 30se vakabulai ira na tauvimate se duivosavosa se vakadewataka na duivosavosa. 31O koya oqo, mo ni vagolea kina na yalomuni ki na veisolisoli sa yaga vakalevu cake.

Ia sa uasivi duadua na sala e tarava oqo.

Currently Selected:

1 KORINICA 12: FNV

Highlight

Copy