Maciu 13

Na Vosa Vakatautauvata ni Daukabukaburaki

(Mari 4.1-9; Luke 8.4-8)

1Ena siga o ya sa biuta mai na vale o Jisu ka la'ki tiko sobu e matasawa, 2ka ra sa qai soqoni vata mai vei koya e lewe vuqa sara, sa mani vodoka kina e dua na waqa ka dabe toka kina, ka ra sa tu kecega yani na lewe vuqa mai matasawa.#Luke 5.1-3 3Sa qai tukuna vei ira e vuqa na ka ena vosa vakatautauvata, ka kaya:

“E a lako yani e dua na dauteitei me kabukaburaki. 4Ni sa kabukaburaki voli, sa qai lutu eso na i tei ena loma ni sala, ka ra lako mai na manumanu vuka ka kania. 5E lutu eso tale na i tei ena vanua veivatu, ka sega soti kina na qele, ka tubu cake sara mai vakatotolo, ia ni sega soti ni vavaku na kena qele; 6ni sa cabe na siga, sa malai mai, ia ni sa sega na wakana sa raqosa sara. 7Sa lutu tale eso na i tei ena maliwa ni veiwavakavotona, ka sa tubu cake na veiwavakavotona ka vakaruguta. 8Era sa mani lutu eso ena qele vinaka, ka mani vua: e vuaidrau eso, e onosagavulu eso, ka tolusagavulu eso.”

9Sa qai tinia o Jisu ka kaya, “Mo ni rogoca vinaka oqo, kevaka sa tiko na daligamuni!”

Na Kedra i Naki na Vosa Vakatautauvata

(Mari 4.10-12; Luke 8.9-10)

10E ratou sa qai lako mai na nona tisaipeli vei Jisu ka tarogi koya, “Na cava mada o ni vosa tikoga kina vei ira ena vosa vakatautauvata?”

11Sa qai sauma o Jisu ka kaya vei iratou, “Sa soli ga vei kemudou mo dou kila na veika vuni ni matanitu vakalomalagi, ia e sa sega ga ni soli vei ira.

12Ni o koya ga e tu vua na ka, ena soli vakalevu tale vua, ka na levu sara na nona, ia o koya e sega vua na ka, ena kau tani tale mai vua na ka sa bau toka vua.#Maciu 25.29; Mari 4.25; Luke 8.18; 19.26 13Sa i koya oqo au vosa tiko kina vei ira ena vosa vakatautauvata, me ra rai tu ka sega ni kunea, ka rogo tu ka sega ga ni kila. 14Sa vakayacori dina vei ira na vosa ni Kalou ka a parofisaitaka o Aisea ka vaka:

‘Dou na rogoca vakaidina ka lecava tu ga,

Ka dou na raica vakaidina ka sega ga ni kunea.#Aisea 6.9,10 (LXX)

15Ni sa moce na lomadra na tamata oqo,

Ka sa didivara mai na daligadra,

Ka sa bobo na matadra.

Kevaka e sega, ena rai na matadra,

Ka rogo na daligadra,

Ka kila na lomadra,

Ka lesu mai me'u vakabulai ira.’

16“Ia sa kalougata na matamudou, ni sa rai, kei na daligamudou ni sa rogo.#Luke 10.23,24 17Ni'u sa kaya vakaidina vei kemudou, ni ra a gadreva e lewe vuqa na parofita kei na tamata yalododonu me ra raica na ka dou sa raica, ka mani sega ni raica; me ra rogoca na ka dou sa rogoca, ka mani sega ni rogoca.

Vakamacalataka o Jisu na Vosa Vakatautauvata ni Daukabukaburaki

(Mari 4.13-20; Luke 8.11-15)

18“O koya oqo mo dou rogoca mada na vosa vakatautauvata ni daukabukaburaki. 19Ni sa dua e sa rogoca na vosa me baleta na matanitu ka sega ni kila rawa, sa dau lako mai na vunica ka kauta laivi na ka sa kaburaki tu e lomana. Sa i koya oqo na ka e kaburaki ena loma ni sala. 20Na kena e kaburaki ena vanua veivatu, sai koya e rogoca na vosa ka ciqoma sara ena reki; 21ka sega ga na wakana e lomana, e mani tu dei vakalailai ga; ia, ni sa qai tubu na rarawa se na veivakacacani ena vuku ni vosa, era tarabe sara. 22Na kena e kaburaki ena veiwavakavotona, sai koya e rogoca na vosa, ia, sa qai curu yani na lomaocaoca ni vuravura oqo, kei na veitemaki ni yau ka vakaruguta na vosa, ka sega kina ni vua. 23Ia, na kena e kaburaki ena qele vinaka, sai koya sa rogoca na vosa ka kila rawa, ka vua, ka vuaidrau eso, onosagavulu eso ka tolusagavulu eso.”

Na Vosa Vakatautauvata ni Sore ni Kau Ca

24Sa qai tukuna vei ira e dua tale na vosa vakatautauvata, ka kaya, “E rawa ni vakatautauvatataki na Matanitu vakalomalagi kei na dua na tamata e kaburaka na i tei ni kau vinaka ena nona i teitei. 25Ia, ni ra sa moce tu na tamata sa qai lako mai na nona meca ka kaburaka talega na i tei ni kau ca ena maliwa ni witi, ka mani lako yani. 26Ia ni sa tubu mai na witi ka tekivu vua, sa basika talega na kau ca. 27Era sa qai lako mai na nona tamata na i taukei ni vale ka kaya vua, ‘Turaga, o ni a sega li ni kaburaka na i tei ni kau vinaka ena nomuni i teitei? Era sa qai lako ga mai vei na kau ca?’ 28Sa qai kaya vei ira o koya, ‘E sa cakava na ka oqo e dua na meca.’ Era sa mani kaya vua na nona tamata, ‘O ni vinakata me keimami sa la'ki cavuraka tani na kau ca?’ 29Sa qai kaya o koya, ‘Me kakua mada, de dou cavuraka talega na witi ena nomudou cavuraka tiko na kau ca. 30Laiva mada ga me rau tubu vata ruarua me yacova na cava ni yabaki. Ni sa cava na yabaki, au na qai kaya vei ira na dautatamusuki, ‘Dou kumuna vata mada e liu na kau ca ka vauvauci ira vata me ra vakamai, ka qai kumuna vata mai na witi ki na noqu lololo.’ ”

Na Vosa Vakatautauvata ni Sore ni Musita

(Mari 4.30-32; Luke 13.18-19)

31Sa qai tukuna vei ira o Jisu e dua tale na vosa vakatautauvata, ka kaya, “Sa tautauvata na matanitu vakalomalagi kei na dua na sore ni musita e taura e dua na tamata ka tea ena nona i teitei; 32sa ka lailai duadua vei ira na sore ni kau kecega; ia ni sa tubu cake, sa ka levu duadua vei ira na kau lalai; ka sa yaco me kau dina, ka ra lako mai kina na manumanu vuka ka caka sova rawa ena veitabana.”

Na Vosa Vakatautauvata ni i Vakatubu

(Luke 13.20-21)

33A sa qai tukuna vei ira o koya e dua tale na vosa vakatautauvata, ka kaya, “Na matanitu vakalomalagi sa vaka na i vakatubu sa taura e dua na yalewa ka wakia ki na tolu na i vakarau falawa me yacova na gauna sa vakatubura kina na falawa taucoko sara.”

Na Nona Vakayagataka na Vosa Vakatautauvata o Jisu

(Mari 4.33-34)

34Sa tukuna na veika kece oqo o Jisu vei ira na lewe vuqa ena vosa vakatautauvata; ka sa sega ni tukuna e dua na ka vei ira me sega ni vakadewataki ena vosa vakatautauvata. 35A sa vakayacori oqo me vakayacori kina na vosa ni yalayala ni parofita, ni sa kaya:

“Au na vosa ga ena vosa vakatautauvata niu vosa vei ira;

ka'u na tukuna na veika sa vuni tu mai na gauna ka buli kina o vuravura.”#Same 78.2

Vakamacalataka o Jisu na Vosa Vakatautauvata ni Kau Ca

36Sa qai biuti ira na lewe vuqa ka curu ki vale. E ratou sa qai lako mai vua na nona tisaipeli ka kaya, “Ni vakamacalataka mada vei keitou na vosa vakatautauvata ka baleta na kau ca ena i teitei.”

37Sa qai sauma o Jisu ka kaya vei ira, “O koya e kaburaka na i tei ni kau vinaka, sai koya na Luve ni Tamata; 38na i teitei sa dusia na vuravura; na i tei vinaka sai ira na luve ni matanitu ni Kalou; na kau ca sai ira era sa nona na vunica; 39na meca e kaburaka na i tei ni kau ca sai koya na tevoro; na cava ni yabaki sai koya na i vakataotioti kei vuravura; kei ira na dautatamusuki sai ira na agilosi. 40Me vaka ga ni sa kumuni vata na kau ca ka visa ena buka, ena vaka talega kina ena i vakataotioti kei vuravura. 41Ena talai ira yani na nona agilosi na Luve ni Tamata ka ra na soqona vata mai na nona matanitu na veika kecega e dau veivakacalai, kei ira ka dau caka ca, 42ka ra na biuti ira ki na lovo buka; era na dau tagi kina ka vakasequruquru bati. 43Era na qai cila na yalododonu me vaka na matanisiga ni Matanitu nei Tamadra. O koya e vakadaligana, me rogoca sara.

Na Vosa Vakatautauvata ni Yau ka Vuni Tu

44“Sa tautauvata na matanitu vakalomalagi kei na dua na i yau sa vuni tu ena dua na i teitei. Ni sa kunea e dua na tamata, sa qai la'ki vunitaka tale, ka sa lako yani ena marau levu ka volitaka na veika kecega sa taukena, a sa qai lesu tale ka volia na i teitei o ya.

Na Vosa Vakatautauvata ni Mataniciva

45“E dua tale, sa tautauvata na matanitu vakalomalagi kei na dua na tamata dauveivoli ka vakasaqara voli na mataniciva totoka, 46ni sa kunea e dua na mataniciva talei sara, sa la'ki volitaka na veika kecega ka tu vua, ka volia na mataniciva o ya.

Na Vosa Vakatautauvata ni Lawa ni Ika

47“E dua tale, sa tautauvata na matanitu vakalomalagi kei na lawa ni yavi, sa viritaki ki wai, ka tagava mai na ika ena kena veimataqali kecega; 48ni sa sinai, era sa qai yavia ki matasawa, ka ra dabe, ka tawana na ka vivinaka ki na nodra basikete, ka biuta tani na kena ka ca. 49Ena vakakina ena i vakataotioti kei vuravura; era na lako mai na agilosi ka tawasei ira tani na tamata ca mai vei ira na yalododonu, 50ka biuti ira laivi tu ki na lovo buka; era na dau tagi kina ka vakasequruquru bati.

Na i Yau Vou kei na i Yau Makawa

51“Dou sa kila tiko li na veika oqo?”

E ratou sa kaya vua, “Io.”

52Sa qai kaya vei iratou o koya, “O koya oqo, era sa vakatautauvatataki kina o ira na daunilawa sa yaco me ra tisaipeli ni matanitu vakalomalagi kei koya na i taukei ni vale sa kauta mai na nona rumu ni maroroi i yaya na i yau vovou kei na i yau makawa.”

Sega ni Vinakati o Jisu mai Nasareci

(Mari 6.1-6; Luke 4.16-30)

53Ni sa vakaotia o Jisu na veivosa vakatautauvata oqo, sa qai lako tani mai kea, 54ka lesu tale ki na nona koro. A sa ia na veivakatavulici ena nodra valenilotu, ka ra sa kurabui kina, ka kaya, “E rawata mai vei na tamata oqo na vuku kei na veika mana oqo? 55E sega li ni luve i koya na matai? E sega beka ni yaca i tinana o Maria, ka ratou sega ni tacina o Jemesa, kei Iosefo, kei Saimoni, kei Jutasa? 56E sega li ni ratou tiko oqo vata kei keda na ganena kece? Sa qai rawata beka ga mai vei na tamata oqo na veika kece oqo?” 57Era sa qai sega kina ni ciqomi koya.

Ia, sa qai kaya vei ira o Jisu, “Sa dau dokai na parofita ena veivanua kece sara ka vakavo ga ena nona koro kei na nona matavuvale.”#Joni 4.44 58E a sega ni cakava kina mai kea o koya e levu na cakacaka mana ena vuku ni nodra tawa vakabauta.

Currently Selected:

Maciu 13: FNVDC12

Highlight

Copy