Maciu 14

Na Mate i Joni na Dauveipapitaisotaki

(Mari 6.14-29; Luke 9.7-9)

1Ena gauna o ya, sa qai rogoca o Eroti na tui na i tukutuku kei Jisu; 2ka qai kaya vei iratou na nona turaga, “Oqo o Joni na Dauveipapitaisotaki, sa vakaturi cake tale mai na mate; sai koya ga sa cakava kina na veika mana oqo.”

3Ni a sa tauri Joni mada o Eroti, ka vesuki koya ena valeniveivesu ena vuku i Erotiasa, na wati Filipe na tacina,#Luke 3.19,20 4ni a kaya vua o Joni, “Sa sega sara ni dodonu vei iko mo tauri koya.”#Vsoro 18.16; 20.21 5E dina ga ni a via vakamatei koya sara, ia sa rerevaki ira ga na tamata ni ra nanuma tu ni parofita o Joni.

6Ena soqo ni siga ni sucu i Eroti, a sa meke ena matadra kece na tamata era tiko kina na luve i Erotiasa yalewa. Sa ka levu na marau i Eroti 7ka sa vosa ni yalayala kina vua ka kaya, “Au sa yalataka me'u na solia vei iko na ka ga o vinakata!”

8Ni sa vakatura cake mai o tinana, sa qai kaya, “Mo ni solia mai vei au na ulu i Joni na Dauveipapitaisotaki ena dua na veleti ena gauna sara ga oqo!”

9Sa qai rarawa na tui, ia ena vuku ga ni vosa bubului sa cavuta e matadra na nona vulagi, sa mani lewa ga me vakayacori na nona kerekere. 10A sa talatala yani me tamusuki na ulu i Joni ena valeniveivesu, 11ka me kau mai na uluna ena dua na veleti ka mai soli vua na goneyalewa, ka la'ki solia sara na goneyalewa vei tinana. 12E ratou sa qai lako mai na tisaipeli i Joni ka kauta na yagona, ka buluta; ka ratou sa qai la'ki tukuna vei Jisu.

Sa Vakani ira na Lewe Levu o Jisu

(Mari 6.30-44; Luke 9.10-17; Joni 6.1-14)

13Ni sa rogoca o Jisu, sa qai soko lo tani mai kea ena dua na waqa ki na dua na vanua lala, ia ni ra sa rogoca na lewe vuqa era sa qai taubale e vanua ka muri koya mai na veikoro. 14Ni sa sobu yani e matasawa o Jisu ka raica na levu ni tamata, a sa tubu vakalevu na nona lomani ira, ka sa vakabulai ira era sa tauvimate.

15Ni sa yakavi mai, e ratou sa qai lako mai vua na nona tisaipeli, ka kaya, “Oqo na vanua lala, ka sa kala na siga; mo ni vakatalai ira na lewe vuqa, ka me ra bau lako ki na veikoro lalai ka volia kina na kedra.”

16Ia, sa qai kaya vei iratou o Jisu, “E sega ni yaga me ra lako, dou solia oi kemudou eso na ka me ra kania.”

17E ratou sa qai kaya vua, “E sega ni tu eke vei keitou e dua na ka, ia e lima walega na i buli madrai kei na rua na ika.”

18Sa qai kaya o Jisu, “Dou kauta mai vei au.” 19Ni sa vakaroti ira oti na lewe vuqa me ra tiko sobu ena veico, a qai taura o koya na i buli madrai e lima kei na ika e rua, ka tacake ki lomalagi, ka vakavinavinaka, ka dovidovia na madrai ka solia vei iratou na nona tisaipeli, ka ratou tauca yani na tisaipeli vei ira na lewe vuqa. 20Era sa qai kana kece ka mamau. Eratou sa qai kumuna vata na tisaipeli e tinikarua na basikete sisinai ena i vovo ni kakana. 21E rauta ni ra lewe 5,000 na tagane era sa kana oqo, ka sega ni okati kina o ira na yalewa kei ira na gone.

Lako Voli e Dela ni Wai o Jisu

(Mari 6.45-52; Joni 6.15-21)

22Sa qai vakaroti iratou sara na nona tisaipeli me ratou vodoka na waqa, ka liu yani ki tai kadua, ni sa vakasukai ira tiko mada na lewe vuqa o koya. 23Ni sa vakatalai ira yani na lewe vuqa, sa qai cabe taudua o koya ki na veidelana me masu. 24Ni sa yakavi mai sa tiko duadua ga o koya e kea. Ia na waqa sa tiko yawa sara yani mai vanua, ka suaigelegele sara ena ua, ni saqati iratou tiko yani na cagi.

25Ena maliwa ni tolu kei na ono ena mataka, e sa qai lako mai vei iratou o Jisu, ka lako voli mai e dela ni wai. 26Ni ratou sa raici koya na tisaipeli ni sa lako voli e dela ni wai, e ratou sa rere vakalevu, ka kaya, “E dua na yalo!” E ratou sa qoqolou ni ratou sa rere.

27A sa mani vosa yani kina vei iratou o Jisu, ka kaya, “Dou vakacegu! Sa i au ga. Dou kakua ni rere!”

28Sa qai vosa vua o Pita ka kaya, “Kemuni na Turaga, kevaka sai kemuni dina oqori, ni vakaroti au me'u lako yani vei kemuni e dela ni wai.”

29A sa kaya yani o Jisu, “Lako mai!” Sa qai kalawa sobu mai waqa o Pita ka tekivu me lako e dela ni wai kivei Jisu. 30Ia ni sa raica na kaukauwa ni cagi, sa qai rere ka vakatekivu me lutu sobu ki loma ni wai, ka sa qai kacivaka yani, “Kemuni na Turaga, ni vakabulai au!”

31A dodoka yani vakatotolo na ligana o Jisu ka tauri koya, ka kaya vua, “Tamata lailai na nomu vakabauta! Na cava tale o vakatitiqa kina?”

32Ia ni rau sa vodo ki waqa, sa ruru na cagi. 33E ratou sa qai lako mai na tiko e waqa ka mai cuva vua, ka kaya, “Sa i kemuni dina ga na Luve ni Kalou.”

Sa Vakabulai Ira na Tauvimate mai Kenisereti o Jisu

(Mari 6.53-56)

34Ni ratou sa lako ki tai kadua, e ratou sa yaco yani ki na vanua o Kenisereti. 35Era sa kilai koya o ira na tamata mai na vanua o ya, ka ra sa qai talatala ki na yasayasa kecega e vakavolivolita, me ra kauta mai vei koya na tauvimate kecega. 36Era sa kerei koya me ra bau tara walega na tutu ni nona i sulu; ia, o ira kecega era tara, era sa vakabulai.

Currently Selected:

Maciu 14: FNVDC12

Highlight

Copy