Maciu 12

Na Taro me Baleta na Siga ni Vakacecegu

(Mari 2.23-28; Luke 6.1-5)

1Ena gauna o ya sa qai lako o Jisu ena loma ni veiloga ni sila ena dua na Siga ni Vakacecegu. E ratou sa viakana na tisaipeli, ka vakatekivu doloka na veisola ni sila, ka kania.#Vrua 23.25 2Ni ra sa raica o ira na Farisi era sa qai kaya vua, “Raica, e ratou cakava tiko na nomu tisaipeli na ka e sega ni tara me caka ena Siga ni Vakacecegu.”

3Ia sa qai kaya vei ira o koya, “Dou sa sega beka ni wilika na ka sa cakava o Tevita ni sa viakana o koya kei iratou ka tiko vata kaya?#1Samu 21.1-6 4E a curu ki na vale ni Kalou ka kania na veibuli madrai tabu, na ka e sega ni vakatarai vei koya me kania, se vei ira ka tiko vata kaya, ia vei ira duadua ga na bete?#Vsoro 24.9 5Se dou sa sega beka ni wilika ena Lawa i Mosese na nodra dau vakacacana o ira na bete ena Valenisoro ena veisiga ni vakacecegu na vakatatabu ni Siga ni Vakacecegu, ka ra sa sega ni cala kina?#Tiko 28.9,10 6Au sa kaya vei kemudou ni sa tu eke e dua sa uasivi vakalevu mai na Valenisoro. 7Ia, kevaka dou sa kila na i balebale ni vosa oqo, ‘Au vinakata ga na yaloveivosoti ka sega na i soro,’ ke dou a sega beka ni vakacacani ira era sa tawa cala.#Maciu 9.13; Osea 6.6 8Ni sa Turaga ni Siga ni Vakacecegu na Luve ni Tamata.”

Na Tamata ka Mate e Dua na Ligana

(Mari 3.1-6; Luke 6.6-11)

9Sa qai lako tani mai kea o Jisu ka curu ki na nodra valenilotu. 10E tiko kina e dua na tamata ka mate tu e dua na ligana. Era sa qai tarogi koya, ka kaya, “E tara li me caka na veivakabulai ena Siga ni Vakacecegu?” Era sa taroga o ya me rawa ni ra beitaki koya kina.

11Sa qai kaya vei ira o Jisu, “O cei vei kemudou sa dua na nona sipi, ka mani lutu ki na dua na qara ena Siga ni Vakacecegu, ena sega li ni la'ki taura ka vueta mai?#Luke 14.5 12Sa qai wacava li na uasivi cake ni tamata mai na sipi! Sa i koya oqo e tara kina me caka na ka vinaka ena Siga ni Vakacecegu.” 13Sa qai kaya vua na tamata o ya, “Dodoka mai na ligamu.”

Sa qai dodoka yani, ka mani vakabulai me vaka na ligana kadua. 14Era sa qai curu ki tautuba na Farisi ka la'ki bosei koya me ra vakamatea.

Na Tamata Digitaki ni Kalou

15Ni sa kila o Jisu, sa lako tani sara mai kea, ka ra muri koya na lewe vuqa, ka sa vakabulai ira kecega. 16Sa vakarota matua vei ira me ra kakua sara ni tukuni koya, 17me vakayacori sara kina na vosa ka tukuna o Aisea na parofita, ka kaya,

18“Raica, na noqu tamata, o koya au sa digitaka,

Na noqu daulomani, sa vinakati koya dina na yaloqu.

Au na solia vua na Yaloqu, ka na vunautaka na

Lewa dodonu vei ira na veimatanitu tani.#Aisea 42.1-4 (LXX)

19Ena sega ni veileti se kaila,

Se vosavosa e cake ena saqata ni koro.

20Ena sega ni musuka na gasau sa vakalairoro,

Se bokoca na cina sa waqa lailai sara.

Ena gumatua tikoga me yacova ni sa vakatauci na lewa dodonu.

21Era na vakanuinui ki na yacana o ira na kai veimatanitu tani.”

O Jisu kei Pielisepupi

(Mari 3.20-30; Luke 11.14-23)

22Eso na tamata era sa qai kauta mai vei Jisu e dua na tamata mataboko ka sa galu tu baleta ni curumi koya tu e dua na tevoro. A sa vakabulai koya o Jisu, ka sa vosa rawa kina ka rai rawa talega. 23Era sa qoroqoro na lewe vuqa, ka kaya, “Sa i koya beka oqo na Luve i Tevita?”

24Ia, ni ra sa rogoca o ira na Farisi, era sa qai kaya, “E vakasavi ira tiko na tevoro na tamata oqo ena kaukauwa duadua ga i Pielisepupi na nodra i liuliu na tevoro.”#Maciu 9.34; 10.25

25Ni sa kila na nodra vakasama o Jisu, sa qai kaya vei ira, “Na matanitu e veisei tu vaka i koya ena dau rusa ga, kei na koro se vale ga e veisei tu vaka i koya ena sega ni tu dei. 26Ia kevaka e vakasavi Setani o Setani, sa qai veisei vaka i koya; ena tu dei vaka e vei na nona matanitu? 27Ia, kevaka au dau vakasavi ira tani na tevoro ena kaukauwa i Pielisepupi, ia ena kaukauwa ga i cei era vakasavi ira tani kina o ira na luvemudou. Ena vuku ni ka oqo, era sa na qai nomudou turaganilewa ga kina. 28Ia kevaka ga au dau vakasavi ira tani na tevoro ena kaukauwa ni Yalo ni Kalou, sa qai yacovi kemudou dina mai na Matanitu ni Kalou.

29“Ena sega ni rawa vua e dua na tamata me curuma yani na nona vale na tamata qaqa me la'ki kovea tani mai kina na nona i yaya ka vakavo duadua ga kevaka me vesuki koya taumada na tamata qaqa o ya e liu; ena qai kovea rawa kina na nona i yaya.#Tb 8.3

30“O koya e sega ni tovata kei au sa noqu meca, kei koya e sega ni kumuna vata kei au sa veibiuyaka.#Mari 9.40 31O koya oqo au sa kaya kina vei kemudou, ena bokoci rawa vei ira na tamata na i valavala ca kecega kei na vosa vakacaca kecega, ia ena sega ga ni bokoci rawa na vosa vakacacataka na Yalo Tabu. 32O koya e vosa vakacacataka na Luve ni Tamata ena rawa ni vosoti; ia o koya e vosa vakacacataka na Yalo Tabu ena sega ni vosoti, ena gauna oqo se na gauna mai muri.#Luke 12.10

Na Kau kei na Vuana

(Luke 6.43-45)

33“Dou lewa ga mai, se e kau vinaka ka vinaka talega kina na vuana, se e kau ca ka ca talega kina na vuana; ni sa dau kilai na kau ena vuana.#Sr 27.6; Maciu 7.20; Luke 6.44 34Dou kawa ni gata! Dou sa tukuna rawa vakacava na ka vinaka ni dou tamata ca tu? Ni sa dau tukuna na gusuda na ka ga sa sinai tu kina na lomada.#Maciu 3.7; 23.33; Luke 3.7; Maciu 15.18; Luke 6.45 35Sa dau kauta mai na ka vinaka na tamata vinaka mai na nona lololo vinaka, ka sa dau kauta mai na tamata ca ena veika ca mai na nona lololo ca.

36“Au sa kaya vei kemudou ni ra na tarogi na tamata ena siga ni lewa ena vuku ni vosa vakatani kece era sa cavuta; 37ni o na vakadonui ena vuku ni nomu vosa, o na cudruvi talega ena vuku ni nomu vosa.”

Na Vinakati ni Dua na Caka-Mana

(Mari 8.11-12; Luke 11.29-32)

38Era sa qai vosa eso na Farisi ka kaya, “Na i Vakavuvuli, keimami via raica e dua na i vakatakilakila mai vei iko.”#Maciu 16.1; Mari 8.11; Luke 11.16

39Sa qai sauma o koya ka kaya vei ira, “Sa dau vakasaqara e dua na i vakatakilakila na i tabatamata ca ka dauyalewa, ia, ena sega ni soli kina e dua na i vakatakilakila, na i vakatakilakila ga i Jona na parofita.#Maciu 16.4; Mari 8.12 40Me vaka ga ni a siga tolu ka bogi tolu o Jona ena kete ni ika levu, ena siga tolu ka bogi tolu vaka talega kina na Luve ni Tamata ena loma ni qele.#Jona 1.17 41Era na tucake ena veilewai na kai Ninive kei na i tabatamata oqo ka beitaka, ni ra a veivutuni ena vunau i Jona, ia, sa tu oqo e dua e levu cake vei Jona.#Jona 3.5 42Ena tucake mai na Ranadi ni Sipa ena veilewai kei na i tabatamata oqo ka beitaka, ni a lako mai o koya mai na i yalayala sara kei vuravura me mai rogoca na vuku i Solomoni, ia, sa tu oqo e dua e levu cake vei Solomoni.#1Tui 10.1-10; 2Vei 9.1-12

Na Lesu Tale Mai ni Yalo Velavela

(Luke 11.24-26)

43“Ni sa takali mai vua na tamata na yalo velavela, sa na veilakoyaki voli ena vanua veitalasiga, me vaqara i vakavakacegu, ia ka sega ni kunea. 44Sa qai kaya, ‘Au na lesu tale ki na noqu vale ka'u a lako mai kina.’ Sa qai kunea ni sa lala tu, ka samaki tu ka tuvani vinaka tu. 45Sa qai lako o koya ka kauta mai e vitu tale na tevoro ca cake mai vua, ka ratou curu ka tiko kina; ka mani yaco e muri me ca cake sara na tamata o ya mai na nona bula e liu. Ena yaco vaka talega kina ki na i tabatamata ca oqo.”

Na Tinai Jisu kei Iratou na Tacina

(Mari 3.31-35; Luke 8.19-21)

46Ni sa vosa tikoga o Jisu vei ira na lewe vuqa, sa tu e tautuba na tinana kei iratou na tacina, ka ratou via vosa tiko vua. 47Sa qai kaya vua e dua, “Raica, e ratou tu e tautuba na tinamu kei iratou na tacimu, e ratou via vosa vei iko.”

48A sa sauma o Jisu ka kaya, “O cei na tinaqu? O cei o iratou na taciqu?” 49Sa qai dusi iratou na nona tisaipeli, ka kaya, “Raica! Sa i iratou oqo na tinaqu kei ira na taciqu! 50O koya ga sa vakayacora na loma i Tamaqu mai lomalagi, sai koya oqo na taciqu, kei na ganequ, kei na tinaqu.”

Currently Selected:

Maciu 12: FNVDC12

Highlight

Copy