Ebedeo 11
11
V. CHIESHTOENQUIO ICQUIN NUQUIN PAPA TANTIATE CHIAID
(11.1—12.13)
Nuquin Papan naindac, quequin tsusedpabon tantiampid chiaid
1Nuquin Papan: Naden naindambi, quequin chiampid tantiaquin matsesën: Ai, adombuen naindac, quequin cainendac. Adembidi tantiaquidën: Umbi isacmaid abi iquec, quequin tantiendac. 2Nuquin tsusedpabon: Abimbo caic, queshun abi tantiec tabadsho Nuquin Papan bëdambuen ispampic.
3Adembidi: Nuquin Papan: Adquid icta, quequin chuiquinuidtsëqui abubëta nidaid uashun aidën icquidtedi uapampic, quequin nuqui tantiaidquio nec. Aden isadenquiocbuedi nuqui isaidtedi uapampic.#11.3 Ene. 1.1-27 isbanshun Chotaquën onqueten dada uaid Cuëd. 33.6, 9 isbanta.
4Ëndenquimbo Abedën Nuquin Papa tantiaquin: Mibi bunacpadombuen cun nëish iua cuessunneshun pichicanu, quequin bëdambuen chuishun pichicasho issun Nuquin Papan bëdambuen isaidquio Abed icpampic. Aton buchi Cainien ambi chiacpadombuen nainquiocquin tiedën icquid pichicasho issun Nuquin Papan icsambuen isaid icpampic. Abed uënësampid icnubi Abedën Nuquin Papa tantiaquioquin nampid chiannetequidquio abi iquec.#11.4 Abedbëta Cain chiaid iste bunquin Ene. 4.3-7 isbanta.
5Adembidi abi tantiaquidquio icsho Enoc uënësambobi Nuquin Papan buampampic. Aden buanacsho nibënquin Enoc istuidambo icpampic. Nuquin Papan Ambi Chiaid dada uamiampid nad iquec: Enoc Abi tantiaquidquio icsho bëdambuen isquin buampampic.#11.5 Ene. 5.21-24 tantiaquin nëid dada uapanëdash. 6Padnuen abi tantienquiocquin naquid icsho isash: Umbi bëdambuen isaidquio nec, quetiapimbo Nuquin Papa iquec. Adquid icnubi Nuquin Papa tantiaquid icte bunebi, quequid nadtsiash: Nuquin Papa abi iquec. Abi tantiaquido bëdambuen nashunquidquio nec, quequin abi tantiaquid icsho ambi bëdambuen isaidquio nec.
7Adembidi abi tantiaquidquio icsho Nuquin Papan Noe naden chuipampic: Mimbi isacmaidquio naimbique. Cano dapa nacnenta, capampic. Adoac: Adquid isambo iquembi. Nibëdtsiash, quenquio icquin: Nuquin Papan chiacpadombuen aton shubun icquido: Acte nëuebudnushe, queshun buannuen cano dapa nacnempampic. Adembidi Abi tantiaquin: Cun matses Ambi Chiaid tantiesa icsho Nuquin Papan: Cuidac uënëstequid iquec, quequin Noen tantiapampic. Aden tantiaquidquio icsho Nuquin Papan bëdambuen isquin nashunaidquio Noe icpampic.#11.7 Noe chiaid iste bunquin Ene. 6.9—9.17 isbanta.
8Adembidi abi tantiaquidquio icsho Abadauan chiec: Nidaid utsi mibi menembique. Nidtan, Nuquin Papan cac ambi isacmanombo Abadauan nidpampic.#11.8 Aden Nuquin Papan Abadauan chiaid iste bunquin Ene. 12.1-9 isbanta. 9Adembidi abi tantiaquidquio icsho ambi isacmanombo chuiquin Nuquin Papan: Aid nidaid mibi menendambi, cacno nidash: Cun nidaid iquendac, quiashi utsin nidaidbimbuecnuc quenenenquio yec ambi shubumpi daëdcaid buan buanash aid nidaidën tabadcuennepampic. Adecbidi aton mado Isactsen: Nëid nidaid menendambi, quequin Nuquin Papan chiac adecbidi aid nidaidëntsen tabadcuenneuapampic. Adecbidi Isaquën mado Acobotsen: Nëid nidaid menendambi, quequin Nuquin Papan chuiuapampic. Adoac adecbidi aid nidaidëntsen tabadcuenneuapampic.#11.9 Aden chiaid iste bunquin Taecquiobi nëidtedi ista. Ene. 23.4 issun Ene. 26.3 ista. Ene. 35.12-27 ista. 10Nadembidi Abadauanën tantiapampic: Abi yacnoshon Nuquin Papan ambi tantiacpadombuen chimeshadtiapimbo icnuc shubu uaquin dadpen nacnenaidën tabadebi, quequin tantiaquin cainquid nepampic.
11Adembidi: Abi tantiaquidquio icsho Nuquin Papan namiac Abadauan tsësiombo icquimbi aton chido Sada machobudash bacuë tishtiapimbocshobi Nuquin Papan uidënquio icmiac aton mado tishmepampic.#11.11 Aid chiaid iste bunquin Ene. 15.6; 17.19 issun Ene. 18.11-14 isbanta. Adembidi Ene. 21.2 ista. 12Adoac Abadauan uënëste anoentsëqui yannubi aton tsiuecquid dadpen uispatedi yantequido icpampic. Adecbidi acte dapa cuëman masi icquid tambantiapimbo yactedi yanuatequid icpampic.#11.12 Aden chiaid iste bunquin Taecquiobi nëidtedi ista. Nëidic Ene. 15.5. Nëidic Ene. 22.17. Nëidic Ene. 32.12. Aidtedi chiaid iquec.
13Aden umbi chuibuedotedi caidacsho Nuquin Papan: Mibi nidaid menendambi, quequin chiampicpaden aid bedambobi uënësbudnepampic. Aidon Nuquin Papan Chiaid tantiaquid icquin uannoshon isacbimbuen isec cuishonquequin tantiaquin naden chuipampic: Nëid nidaidën tabadec quenenenquio iquendabi, quequin tantiapampic. 14Aden tantiaquin: Quenenec tabadte bunquiebi, quequin tantiaquin adec tabadte nibëmpampic. 15Ambo quenenash tabadec: Ubi tishondacnobidi niduaibi, quiash aucbidi chotsempampic. 16Adenquio yec: Nuquin Papa yacno bëdamboshë yacno tabadte bunquiebi, quesho tantiashun: Cun matses nec. Aidon Papa nebi, quequin chuishun abi yacno abëd tabadte Nuquin Papan icmiaid shubu dadpen icquid abi iquec.#11.16 Buan. 3.6 issun Buan. 3.15 ista.
17-18Min mado Isaquën tsiuecquido dadpenquioshë iquendac, quequin Nuquin Papan Chiaid abimbo iquec, quequin Abadauanën tantiaquiopampic. Aden abi tantiaquidquio icsho: ¿Umbi Chiaid tantiaquidquiobida Abadauan neque? Isnu, queshun: Min mado abentsëcquidi Isac cuessunneshun ubi tantiaquin pichicatan, Nuquin Papan cac pichicanuen Abadauanën aton mado seshunetsempampic.#11.17-18 Nëid tantiashun nëid chuipampic. Ene. 21.12 isbanta. 19Aden Nuquin Papa tantiaquid icquin: Nuquin Papa nadatiambocquid yec uënësaido uincuenmequidquio nec, quequin tantiaquin aton mado seshunnetsempampic. Adosho issun Nuquin Papan: Padi, caid yec aton mado uincuenmiacbimbuecquid icpampic. Aden nampid tantiaquin nuquin matses tantiametequidquio nec.#11.19 Aid chiaid iste bunquin Ene. 22.1-19 isbanta.
20Adembidi Nuquin Papa tantiaquidquio icquin Isaquën aton mado Acobobëta Esau tantiaquin: Nuquin Papan mibi bëdambo icmendac, quequin chuipampic.#11.20 Adquid chiaid iste bunquin Ene. 27.27-40 isbanta.
21Adembidi Nuquin Papa tantiaquidquio icquin Acobo tsësiobudash uënëstiadtsëcquio yanquimbi Nuquin Papan ambi chiacpadombuen bëdambo icmete chiaid Osen mado daëd abi bëdambo icmete Acobon chuipampic. Adotanquin aton cueste bedash shuebudshun: Mibi bëdamboshë iquec, quequin Nuquin Papa chuipampic.#11.21 Ene. 47.31—48.20 tantiaquin nëid dada uapanëdash. Aid isbanta.
22Adembidi Nuquin Papa tantiaquidquio icquin Osen Equipito yacno tabadec uënësnun aton matses isadaidbo chiec: Nuquin Papan: Min matses nidaid menendambi, quequin chiampid tantiequi uënësebique. Adec ubi uënësan mibitedi aid nidaid yacno nidquin cun canite chicshun buanta, quequin Osen chuipampic.#11.22 Osen canite buante chiaid istiadquio icquin Ene. 50.24-25 issun Buan. 13.19 ista.
23Adembidi Nuquin Papa tantiaquidquio icquin Moisesën titan aton papabëtambi aton mado bëdapactsëcquio isadsho issun uëshë 3ted nidmequin ompopampic. Equipito yacnocquidon chuiquid tapan: Isadaidbon chidon dada bacuë tishacsho cuessun secata, quequin chiaid tantiashumbi dacuëdenquio icquin aton mado ompopampic.#11.23 Moises tishaidbëta ompoaid iste bunquin Buan. 1.22—2.4 isbanta.
24Adembidi Nuquin Papa tantiaquidquio yec caniash Moises: Chuiquid tapa padaonën champin mado nebi, quequin chuite bunenquio icpampic.#11.24 Buan. 2.10-12 tantiaquin nëid dada uapampic. 25Adquid icquin naden tantiapampic: Cun matses isadaidbo Nuquin Papan Cun matses caido nec. Aidobëta padaonën mëyanaid icte bunebi, quepampic. Nuquin Papa tantiesabobëd mamënquin icsambuen nate bunenquio iquebi, quepampic. 26Iuecshun Nuquin Papa yacno iuedac bëdambo iquendabi, quequin tantiaquin Equipito yacnocquidon bëdamboshëcquid meniaid isuidpampic naden tantiaquin: Nuquin Papan Quidistu Mesias caid chomiacsho matsesën icsambuen chuishunte yacpadombuembidi ma matsesën nëbi ubi icsambuen chuishunnu, quequin tantiec: Nuquin Papan cun matses caidobëd mëyamëdebi, quepampic. 27Adembidi Nuquin Papa tantiaquidquio yec: Cun matses buanec nidnu, quianec Equipito yacnouësh puduanec nidsho isash chuiquid tapan nëishshun cuessunnetsiashi, quequin dacuëdënenquio yec Nuquin Papa isadenquiocquidi isbanacbimbuen aton matses buanec Moises nidpampic.#11.27 Buan. 13.17—14.30 tantiaquid nëid dada uapanëdash. 28Adembidi Nuquin Papa tantiaquidquio icquin Moisesën: Ma cun matsesën mado bëyucquid uënësmenquio icnu, queshun penun obeca caniactsëc cuessunnepampic. Adembidi aidën intac bedshun aton shubu shëcuë cuëman abiuc daëdi abucbëta intaquën ëcseccabampampic. Nuquin Papan abëd icquid uënësmianquid caid budmiaidën: Ma Equipito yacnocquidën mado bëyucquido uënësmequimbi ma cun mado bëyucquid uënësmenquio icnu, quequin isadaidbotedishun napampic.#11.27-28 Isadaidbo equipito yacnouësh nidnun naid iste bunquin Buan. 12.21-30 isbanta.
29Adembidi Nuquin Papa tantiaquido yec isadaidbo Equipito yacnouësh puduanec nidquin Acte Piu potec nidquid podquied nibëdbuedi Nuquin Papan tanunquio icnuc nac uesadmiaidën isadaidbon potepampic. Aden isadaidbon potenubi abëtambi potenuec abi chieshënquido Equipito yacnocquido niduidequi acte padpidec dëccuësquequin maboccac uënësbudnepampic.#11.29 Equipito yacnocquido mentoadaid iste bunquin Buan. 14.21—15.21 isbanta.
30Adecbidi Nuquin Papa tantiaquido yec isadaidbo Aidën chiacpadec matses utsibo tabadaid shubu dadpen icquid Edico caid tsicatiaid dacuenadtannepampic. Adec 6tedec ushec dacuenadtannenubi daquënë uaquin tsicatiaid tapa uebudpampic.#11.30 Osue 6.12-21 isbanta.
31Adembidi Nuquin Papa tantiaquid icquin Edico yacnocquido cuessunnenun isquido isadaidbo chosho issun piucquid bedec chudadquid Daba cuëmëdquidën isadaidbo aton shubun iuedquin ompopampic. Adoac ambi ompoaido aton matsesbëd choshon Dababëd icquido cuessunnenquio icpampic. Daban matses utsiboen Nuquin Papa tantiesa icsho cuessun secapampic.#11.31 Daban naid iste bunquin Osue 2.1-21 issun Osue 6.22-23 ista.
32Adecbidi Nuquin Papa tantiaquid dadpen icsho abitedi nëbi chuitiapimbo icquimbi nëidtedtsëqui cuëmëdquid chuinu. Nëidic Edeon. Utsibic Badac. Utsibic Sanson. Utsibic Ecte. Utsibic Dabid. Utsibic Samued. Utsibic Nuquin Papan oncamiaidtedi. Aidtedtsëqui chiombi.#11.32 Edeonën naid chiaid iste bunquin C.Ch. 6.1—8.32 isbanta. Badaquën naid chiaid iste bunquin C.Ch. 4.6-24 isbanta. Sansonën naid chiaid iste bunquin C.Ch. 13.1—16.31 isbanta. Epeten naid chiaid iste bunquin C.Ch. 11.1—12.7 isbanta. Dabidën naid chiaid iste bunquin chiaid dadpenquioshë iquec. Nuquin Papan chuiquid tapa icmiaid iste bunquin Sam.1. 16.1-13 isbanta. Samuedën naid chiaid iste bunquin Sam.1. 1.1—25.1 isbanta. 33Adembidi Nuquin Papa tantiaquidquio icquin isadaidbo utsin utsinquien matses utsibon nidaid bedquin dëniacquin cuessun secapampic. Adembidi utsin utsinquien Nuquin Papan chiacpadombuen bëdambuec tabadmebampampic. Utsin utsinquien Nuquin Papan: Naden mibi menendambi, quequin chiampid bedpampic. Aden naquid icsho utsi bedshun: Bëdi dapa pemenu, quequin bëdi tabadacno buanshun nebudpampic. Adosho issumbi piantiapimbocnoc Nuquin Papan quiuëccac bëdin penquio icpampic.#11.33 Bëdi pemetsenaid iste bunquin Dan. 6.1-28 isbanta. 34Adembidi Nuquin Papa tantiaquidquio icsho chieshënquin: Cute nëdëncadoshon pichicanu, casho Nuquin Papan nac nëdënquequidën pichiquenquio icpampic. Adembidi abi tantiaquidquio icsho utsi utsien: Chështen senu, casho issun mënchicquin cuenmepampic. Adembidi tantiequi casenash uidënquio ictiapimbo icbuedi uidënquiocquid icmepampic. Adembidi Nuquin Papa tantiaquid icquin matses utsibon sondadobëd cuesnannuequido choacsho dëniacquin cuenmepampic.#11.34 Pichicatsenaid iste bunquin Dan. 3.1-30 isbanta.
35Adembidi chidobon abi tantiaquid icquin aton matses uënësaid icsho Nuquin Papan uincuenmeshunac bedpampic.
Adembidi tantiaquid utsibo: Nuquin Papa tantiesa nebi, camenu, quequin mëyanquiaqui chieshtoenquio icquin Nuquin Papa tantiec: Aid yacno nidebi, quiash uënëspampic.#11.35 Bacuë uënësbued uincuenmiaid daëd iste bunquin Ch.D.1. 17.17-24 istanquin Ch.D.2. 4.18-37 isbanta. 36Adembidi utsi utsien shocosh bucun mëtaneshun quënën tsadunmiacsho issun icsambuen chuishunquin mamënshunquimbi utsi utsien cueshcanten cacuespampic.#11.36 Naden Nuquin Papan oncamiaid cuidaid ista. Ch.D.1. 22.26-28 issumbic nëidtedi Edemiasën Chiaid ista. Nëidic Ede. 20.1-2. Nëidic Ede. 37.14-15. Nëidic Ede. 38.6. Aidtedi isbanta. 37Adembidi utsi utsien cuënoten sesequin cuessun secapampic. Adembidi utsi utsien tembi daëdquiocnoc sëmpampic. Adembidi utsi utsien chështen seshunnepampic. Utsi utsiec aton shubu nibëdquid yec nëish iua obeca bitsi nacnenaiduidi dasiuidash capucuennepampic. Utsi utsiec atona nibëdquid yec mëyadnubi utsi utsien mëyanaqui Nuquin Papa tantiaquidquio yec aido uënëspampic.#11.37 Matses cuënoten seshunniampid chiaid iste bunquin Chotaquën onqueten Cron.2. 24.20-21 ista. 38Aidotedi Nuquin Papa tantiesabon: Bëdambocquido nec, cainquiocquin chieshëmpampic. Aden chieshënquin cuenmiac utsi utsiec shubu nibëdacno capucuennepampic: Ambo nidebi, quenquio yec. Adecbidi utsi utsiec macuësh tapa yacno capucuennepampic. Adec capucuennec nidaid shëcuën tabadcuennepampic.#11.38 Nidaid shëcuën ompoaid iste bunquin Ch.D.1. 18.4 issumbic Edias cuenmiaid iste bunquin Ch.D.1. 19.1-9 isbanta.
39Aidotedi abi tantiaquidquio icsho Nuquin Papan: Nëido bëdambo iquec, quequimbi aido chuiquin: Naden mibi bëdamboshëcquid menendambi, ambi campicpadombuen aid bedambobi uënësbudnepampic. 40Aden Nuquin Papan aido tantiaquimbi ambi chiampicpadombuen meniambo icpampic. Aido ënden icquido uënësampidobëtabi nuquitedi bëdamboshëcquido icmequin icsambuen naisabo icmendac.
Currently Selected:
Ebedeo 11: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
