Ebedeo 10
10
Moisesën chiampicpadombuenuidi matsesën natiapimbo icte chiaid
1Moises Nuquin Papan: Naden nata, quequin chiampid naden bëdiactsëc tantiamete nepanëdash. Nuquin Papan matses bëdambuen ismetequidquio chomendac, quequin chiaid tantiamete nepanëdash. Adquid icnubi setan setanquien Nuquin Papan Moises chiampicpaden nuquin matsesën Nuquin Papa bëdambuen ismenuen nëish iua dadpen cuessunneshun pichicadennepampic. Aden nabanaidën Nuquin Papa tantiate bunquido nuquin matses: Nëbi icsambuen naisa nebi, quetiapimbo icpampic. 2Aidënquio Moisesën chiacpaden nëish iuan intac daseccaquin matses icsambuen naisa icmiac nëish iua padpiden pichicanun cuessunnenquio ictsempampic. Adecbidi: Icsambuen naquid nebi, quenquio matses ictsempampic. 3Adquid icnubi: Icsambuen naquid nebi, quequin tantiameuanuen setan setanquien nëish iua cuessunneshun pichicadennepanëdash. 4Aden baca bënëbëta cabada bënë cuessunnetanquin aidën intac bedshun daseccaidën matsesën icsambuen naid bedshuntiapimbo iquec.
Matses cuidmenquio icnuec Esus uënësaid chiaid
5Padnuen Esuquidistu nidaidënshun tishac caniash Nuquin Papa chiec:
Mibi bëdambuen ismenuen matsesën nëish iua cuessunneshun pichicatebëta ambi menete utsi iste bunenquio mibi iquec, Papa.
Adec bunenquio icquin mimbi tantiacpadombuen matsesën tishaid nebi, Papa.#10.5 Chotaquën onqueten dada uaid Cuëd. 40.6 ista.
6Ambi icsambuen naid mibi bëshunmenuen matsesën nëish iua cuessunneshun pichicatebëta
ambi menete utsi iste bunenquio mibi iquec, Papa.
7Adquid icsho issun nidaidën choshon mibi chiec:#10.7 Esuquidistu onquec nec.
Në iquebi.
Mimbi ubi chuiquin dada uamiampicpadombuen naimbi, Papa.
Mibi bunacpadombuen naimbi,
quequin chiaid dada uapampic.#10.7 Chotaquën onqueten dada uaid Cuëd. 40.6-8 isquin aden nëid dada uapanëdash. Aid isbanta.
8Aden chiampid icnuc nëidba nuqui tantiec. Nuquin Papan: Naden nata, quequin chiampicpadombuen nabanquimbi matsesën ambi icsambuen naid Nuquin Papa bëshunmenuen nëish iua cuessunneshun pichicatebëta abi menete utsi iste bunenquio Nuquin Papa iquec. Aden Ambi: Naden nata, quequin chiampid tantiaquin matsesën nashobi Nuquin Papan: Bëdambo iquec, catiapimbo iquec, quequin chiampid nuqui tantiec. 9Nadentsen Esusën chuite chuiquin dada uapampic: Në iquebi. Mibi bunacpadombuen naimbi, Papa, quequin Esusën chuipampic. Adoac nëish iua cuessunneshun pichicatequid ënmequin utsi chuca uain Nuquin Papan Aton Madombo namepanëdash. 10Adoac Nuquin Papa bunacpaden: Ma matsesën ubi uënës uanu, quiash padpidec uënësenquio icnush abentsequi abided cuidadec Nuquin Papa matses cuidmenquio icnuec Esuquidistu uënëspanëdash. Aid tantiaquido icsho issun Nuquin Papan: Cuna nec, caido yec aton iuabo nuqui nendac.
11Adnuc nuquin matses isadaidbon nëish iua cuessunneshun pichicaquidon badiadquidën badiadquidënquien abi nëish iua cuessunneshun pichicadednepec. Aden naidën matsesën icsambuen naid bedshuntiapimbo iquec. 12Esuquidistuen Nuquin Papa matses bëdambuen ismenuec abided cuidadec abentsequi uënësash padpidec cuidadec uënëstiapimbo iquec. Adec uënësash uincuenash aton Papa yacnombo nidash aidën dayun abiucquio tsadtuidpanëdash.#10.12 Adec aidën dayun abiucquio tsadec, quequin Nuquin Papabëdi abitedishun Icbombo nec, capec. 13Ambo tsadquin: Ma Nuquin Papan ubi chieshënquido dëniacmequin namenquio icnu, quequin cainec.#10.12-13 Chotaquën onqueten Cuëd. 110.1, 4 tantiaquin nëid dada uapanëdash. 14Adec abided cuidadec abentsequi uënësquin abi tantiaquido Nuquin Papa bëdambuen ismequin icsaisabimbuecnuc icmequin uënëstiapimbo ictequido icmepanëdash.
15Nadembidi aton Mayan Bëdan nuqui bëdambuen tantiamec:
16Chiaid utsi nëbi iquendac, quequin uëshë utsimbi chiaid chuca naden chiendambi:
Umbi: Naden nata, quequin chiaid nate bunmendambi.
Bëshunmenquio icquin tantiamendambi, quec Nuquin Icbo abi tantiaquido caic.
17Adecbidi:
Mimbi icsambuen naidtedi tantienquio yec bëshunendabi, queuaic Nuquin Icbo,
quequin chuipampic.#10.16-17 Ede. 31.33-34 tantiaquin nëid dada uapanëdash. 18Adec nuqui icsambuen naidtedi tantienquio yec bëshunash nëbi: Ubi bëdambuen ismenuen nëish iua cuessunneshun pichicata, quenquio Nuquin Papa iquec.
Chieshtoenquio icquin Esus tantiate chiaid
19Tantia, cun utsibo, Nuquin Icbo Esuquidistu aton intac chididiquec abided cuidadec uënësaid tantiaquid icquin naden nuqui tantiec: Nëbi Nuquin Papa umbi icsambuen naid tantienquio yec bëshunac, quiash dacuëdenquio yec abi tabadte shubun icquid quënë bëdamboshëcquidën puduedacbimbuen Nuquin Papa chiannequid nuqui nendac. 20Esus uënësnuc Nuquin Papa tabadte shubu dapa yacno utsi puduedenquio ictequid yacno dectanaid dashcute dapa abucuësh budec abitiombi canchedbudcuempanëdash. Adec uënësbuedi abi icquin aidënuidtsëqui chuca uaquin utsi yacbimbuecnuc icmiac Nuquin Papa chiannequid nuquitedi nendac. 21Nuquin Papa yacnombo icquin nuqui bëdambuen ismequid tapambo Esus nec. 22Adquid icnuc bëchish nibëdquiecnuc acten dapanacbimbuen nuqui icsambuen naid nibëdacbimbuecnuc Nuquin Papan nuqui bëdambuen isec. Adoac: Nuquin Papa tantiaquidquio nuqui nec. Adecbidi: Nuquin Papan ambi tantiacpadombuen naindac, quequin tantiaquidquio nuqui nec. Adquid yec Nuquin Papa chiannequid nuqui nendac. 23Nuquin Papa ambi chiampicpadombuen naquidquio nec, quequin tantiaquid yec: Aid yacnombo tabadtequid nebi, quequin cainquin chieshtoenquio icquin tantianuna. 24Aden tantiec abi tantiaquid utsibobëd tantiananquiec bëdambuec tabadec nashunnannuna. 25Aden nabanec: Nuquin Papa tantiaquid utsibobëd iccuededtiapimbo iquebi, utsi utsiec quenubi adenquio icnuna. Adec iccuededec: Nuquin Papan chiacpadquiec bëdambuec tabadnuna, quec chuinannuna. Cuidnuen matsesën naid chuibante uëshë nëbimbobi yanec, quiash adec baded badedquiec chuinannuna.#10.25 Nuquin Papan cuidte uëshë chiampid tantiatiadquiocquin matsesën onqueten Amos 5.18 istanquin chotaquën onqueten dada uaid Ese. 30.3 ista.
26Nuqui icsambuen naid bedshunash abided cuidadec Esuquidistu uënëspanëdash, quequin abimbo chiaid chuibanac aid tantiabuedi: Adequi icsaic tabadnu, quequid: Nuquin Papa ubi bëdambuen ismetequid utsi iquec, quetiapimbo iquec. 27Aden Ambi Chiaid niactednequid icsho abitedi cuidte uëshë chonoc nëishshun dacuëdampambocquid icquin cumapenen chushcashun Nuquin Papan abi chieshënquido nibëdanmequin chian annëdënquiacno nësecaindac. 28Nuquin Papan: Naden nata, quequin Moises chiampid matsesën niacsho issun matses daëdshun adembidi 3tedshun: Isombi, quequin chiac niacquid cuidquin cuessunnemepampic: Uënësquio iquec, quenquio icquin.#10.28 Aden: Isombi, quequid chiampid iste bunquin M.I.Ch. 19.15 ista. 29Aden Moisesën chiampid niacquid cuidampid icnuc Nuquin Papan Aton Mado matsesën tantienquio yansho ¿cumapenen cuidenquioda icpatsiash? Aidon Nuquin Papan Mado Esus tintincacbimbuen chieshënec. Esus uënësaid caic: Matses yec abembi uënësaid nepanëdash, quepec. Adembidi aton intac nua chiuidec abided cuidadec uënësaid Esus tantiasho bëdambuen isquin bëdambuec tabadmendambi, quequin Nuquin Papan Chiaid chuca chieshënec. Adembidi Nuquin Papan Mayan Bëda matses bëdambuen iste bunquid icsambuen chuishunuaic. 30Nuquin Papa: Umbi chiaid niacsho cuidquidquio nebi, quequin chiampid nuqui tantiec. Adembidi: Cun matses caidombi ubi chieshënsho cuidendambi, quequin Nuquin Papan Chiampid iquec, quequin nuqui tantiauaic.#10.30 M.I.Ch. 32.35, 36 tantiaquin nëid dada uapanëdash. Adshumbic Chotaquën onqueten dada uaid Cuëd. 135.14 ista. 31Nuquin Papa uënëstiapimbocquid yec matses tibocamequid icquin icsambuen naquido cuidquidquio dacuëdampamboshë iquec.
32Tantia. Cun utsibo. Mibitedi chuinu. Esuquidistu tantiaquido mibitedi yanacsho chieshënquin natiamiaqui chieshtoenquio icquin Esus tantiec mibi bëdambuec tabadondaid bëshunenquio icquin tantiata. 33Aden Esus tantiasho mibitedi utsi utsien icsambuen chuishunquin mamënshunquin abitedi ismequin cuesquin mëyanquin natiamepanëdash. Aden natiamiacsho isash Esus tantiaquid utsibo aidobëd shubitiadquio yec natiec tabadpanëdash. 34Adecbidi mibitedi Esuquidistu tantiaquid utsi quënën tsadunaid icsho isash uënësquio icquin aid tantiaquin mimbi nashumpondac. Adecbidi mibi chieshënquidën mitsana bedacsho isash cuishonquepanëdac. Nuquin Papan abi yacnoshon cuna bëdamboshëcquid nibëdantiapimbo icquid bedtequid iquec, quequin tantiec: Bëdambo iquebi, quec mibi cuishonquepanëdac.
35Adquid icquin chieshtoenquio icquin: Nuquin Papa yacno tabadtequid nebi, quequin ënenquio icquin mibitedishun tantiata. Aden tantiaquid icsho Nuquin Papan abi yacnombo tabadmequin bedtequid bëdamboshëcquid mibi menetequid iquendac. 36Utsin mëyanquin natiamiaqui Nuquin Papan Chiaid chieshtoenquio icquin tantiadedneta. Adec tabadquin abi bunacpadombuen nabanacsho ambi chiampicpadombuen Nuquin Papan abi yacno mibitedi tabadmendac. 37Nuquin Papan Chiaid chuiquin dada uampid nad iquec:
Nëbimbobien mimbi cainaidquio choendac.
Ambi tantiacpadënquio choendac.
Ambi chiacpadënquio choenquio iquec, quetiapimbo iquec,
38Aid chote tantiec Ambi chiacpadec bëdambuec tabadquin abi tantiasho Nuquin Papan abëd tabadtequido icmendac.
Utsin chieshtoshon ubi tantienquio icsho
bëdambuen istiapimbo iquendabi,#10.37-38 Aba. 2.3-4 tantiaquin nëid dada uapanëdash.
quec Nuquin Papa,
quequin chuiquin dada uapampic. 39Padnuen nuquitedi chieshtoenquio icquin Esus tantiaquido nec. Utsiboen aid tantiaquid icbuedi chieshtoquid icsho Nuquin Papan cuidtequido yanec. Adoshombic Esus tantiaquido chieshtoenquio icsho Nuquin Papan nuquitedi bëdambuen isquin abi yacnombo tabadmendac.
Currently Selected:
Ebedeo 10: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.