Popular Bible Verses from Ebedeo 11

Share

Nuquin Papan: Naden naindambi, quequin chiampid tantiaquin matsesën: Ai, adombuen naindac, quequin cainendac. Adembidi tantiaquidën: Umbi isacmaid abi iquec, quequin tantiendac. Nuquin tsusedpabon: Abimbo caic, queshun abi tantiec tabadsho Nuquin Papan bëdambuen ispampic.

Padnuen abi tantienquiocquin naquid icsho isash: Umbi bëdambuen isaidquio nec, quetiapimbo Nuquin Papa iquec. Adquid icnubi Nuquin Papa tantiaquid icte bunebi, quequid nadtsiash: Nuquin Papa abi iquec. Abi tantiaquido bëdambuen nashunquidquio nec, quequin abi tantiaquid icsho ambi bëdambuen isaidquio nec.

Adembidi: Nuquin Papan: Adquid icta, quequin chuiquinuidtsëqui abubëta nidaid uashun aidën icquidtedi uapampic, quequin nuqui tantiaidquio nec. Aden isadenquiocbuedi nuqui isaidtedi uapampic.

Adembidi abi tantiaquidquio icsho Abadauan chiec: Nidaid utsi mibi menembique. Nidtan, Nuquin Papan cac ambi isacmanombo Abadauan nidpampic. Adembidi abi tantiaquidquio icsho ambi isacmanombo chuiquin Nuquin Papan: Aid nidaid mibi menendambi, cacno nidash: Cun nidaid iquendac, quiashi utsin nidaidbimbuecnuc quenenenquio yec ambi shubumpi daëdcaid buan buanash aid nidaidën tabadcuennepampic. Adecbidi aton mado Isactsen: Nëid nidaid menendambi, quequin Nuquin Papan chiac adecbidi aid nidaidëntsen tabadcuenneuapampic. Adecbidi Isaquën mado Acobotsen: Nëid nidaid menendambi, quequin Nuquin Papan chuiuapampic. Adoac adecbidi aid nidaidëntsen tabadcuenneuapampic.

Adembidi abi tantiaquidquio icsho Nuquin Papan Noe naden chuipampic: Mimbi isacmaidquio naimbique. Cano dapa nacnenta, capampic. Adoac: Adquid isambo iquembi. Nibëdtsiash, quenquio icquin: Nuquin Papan chiacpadombuen aton shubun icquido: Acte nëuebudnushe, queshun buannuen cano dapa nacnempampic. Adembidi Abi tantiaquin: Cun matses Ambi Chiaid tantiesa icsho Nuquin Papan: Cuidac uënëstequid iquec, quequin Noen tantiapampic. Aden tantiaquidquio icsho Nuquin Papan bëdambuen isquin nashunaidquio Noe icpampic.

Adembidi abi tantiaquidquio icsho Enoc uënësambobi Nuquin Papan buampampic. Aden buanacsho nibënquin Enoc istuidambo icpampic. Nuquin Papan Ambi Chiaid dada uamiampid nad iquec: Enoc Abi tantiaquidquio icsho bëdambuen isquin buampampic.

Ëndenquimbo Abedën Nuquin Papa tantiaquin: Mibi bunacpadombuen cun nëish iua cuessunneshun pichicanu, quequin bëdambuen chuishun pichicasho issun Nuquin Papan bëdambuen isaidquio Abed icpampic. Aton buchi Cainien ambi chiacpadombuen nainquiocquin tiedën icquid pichicasho issun Nuquin Papan icsambuen isaid icpampic. Abed uënësampid icnubi Abedën Nuquin Papa tantiaquioquin nampid chiannetequidquio abi iquec.

Adembidi: Abi tantiaquidquio icsho Nuquin Papan namiac Abadauan tsësiombo icquimbi aton chido Sada machobudash bacuë tishtiapimbocshobi Nuquin Papan uidënquio icmiac aton mado tishmepampic.

Nadembidi Abadauanën tantiapampic: Abi yacnoshon Nuquin Papan ambi tantiacpadombuen chimeshadtiapimbo icnuc shubu uaquin dadpen nacnenaidën tabadebi, quequin tantiaquin cainquid nepampic.

Adembidi Nuquin Papa tantiaquidquio yec caniash Moises: Chuiquid tapa padaonën champin mado nebi, quequin chuite bunenquio icpampic. Adquid icquin naden tantiapampic: Cun matses isadaidbo Nuquin Papan Cun matses caido nec. Aidobëta padaonën mëyanaid icte bunebi, quepampic. Nuquin Papa tantiesabobëd mamënquin icsambuen nate bunenquio iquebi, quepampic. Iuecshun Nuquin Papa yacno iuedac bëdambo iquendabi, quequin tantiaquin Equipito yacnocquidon bëdamboshëcquid meniaid isuidpampic naden tantiaquin: Nuquin Papan Quidistu Mesias caid chomiacsho matsesën icsambuen chuishunte yacpadombuembidi ma matsesën nëbi ubi icsambuen chuishunnu, quequin tantiec: Nuquin Papan cun matses caidobëd mëyamëdebi, quepampic. Adembidi Nuquin Papa tantiaquidquio yec: Cun matses buanec nidnu, quianec Equipito yacnouësh puduanec nidsho isash chuiquid tapan nëishshun cuessunnetsiashi, quequin dacuëdënenquio yec Nuquin Papa isadenquiocquidi isbanacbimbuen aton matses buanec Moises nidpampic.

Min mado Isaquën tsiuecquido dadpenquioshë iquendac, quequin Nuquin Papan Chiaid abimbo iquec, quequin Abadauanën tantiaquiopampic. Aden abi tantiaquidquio icsho: ¿Umbi Chiaid tantiaquidquiobida Abadauan neque? Isnu, queshun: Min mado abentsëcquidi Isac cuessunneshun ubi tantiaquin pichicatan, Nuquin Papan cac pichicanuen Abadauanën aton mado seshunetsempampic.

Adembidi Nuquin Papa tantiaquid icquin Edico yacnocquido cuessunnenun isquido isadaidbo chosho issun piucquid bedec chudadquid Daba cuëmëdquidën isadaidbo aton shubun iuedquin ompopampic. Adoac ambi ompoaido aton matsesbëd choshon Dababëd icquido cuessunnenquio icpampic. Daban matses utsiboen Nuquin Papa tantiesa icsho cuessun secapampic.

Adembidi Nuquin Papa tantiaquido yec isadaidbo Equipito yacnouësh puduanec nidquin Acte Piu potec nidquid podquied nibëdbuedi Nuquin Papan tanunquio icnuc nac uesadmiaidën isadaidbon potepampic. Aden isadaidbon potenubi abëtambi potenuec abi chieshënquido Equipito yacnocquido niduidequi acte padpidec dëccuësquequin maboccac uënësbudnepampic.

Adecbidi Nuquin Papa tantiaquido yec isadaidbo Aidën chiacpadec matses utsibo tabadaid shubu dadpen icquid Edico caid tsicatiaid dacuenadtannepampic. Adec 6tedec ushec dacuenadtannenubi daquënë uaquin tsicatiaid tapa uebudpampic.

Adembidi Nuquin Papa tantiaquidquio icquin Moisesën: Ma cun matsesën mado bëyucquid uënësmenquio icnu, queshun penun obeca caniactsëc cuessunnepampic. Adembidi aidën intac bedshun aton shubu shëcuë cuëman abiuc daëdi abucbëta intaquën ëcseccabampampic. Nuquin Papan abëd icquid uënësmianquid caid budmiaidën: Ma Equipito yacnocquidën mado bëyucquido uënësmequimbi ma cun mado bëyucquid uënësmenquio icnu, quequin isadaidbotedishun napampic.

Adembidi Nuquin Papa tantiaquidquio icquin Osen Equipito yacno tabadec uënësnun aton matses isadaidbo chiec: Nuquin Papan: Min matses nidaid menendambi, quequin chiampid tantiequi uënësebique. Adec ubi uënësan mibitedi aid nidaid yacno nidquin cun canite chicshun buanta, quequin Osen chuipampic.

Adembidi Nuquin Papa tantiaquidquio icquin Acobo tsësiobudash uënëstiadtsëcquio yanquimbi Nuquin Papan ambi chiacpadombuen bëdambo icmete chiaid Osen mado daëd abi bëdambo icmete Acobon chuipampic. Adotanquin aton cueste bedash shuebudshun: Mibi bëdamboshë iquec, quequin Nuquin Papa chuipampic.

Adembidi Nuquin Papa tantiaquidquio icquin Isaquën aton mado Acobobëta Esau tantiaquin: Nuquin Papan mibi bëdambo icmendac, quequin chuipampic.