Popular Bible Verses from Ebedeo 12

Share

Aden Nuquin Papa tantiaquidombo yec uënësampidën dacuenadec tabadquin isacbimbuec nuqui tabadec. Aidon nampid tantiaquin Nuquin Papa tantiate bunquioquin: Cun dashcute iuëmbocquid chictanec cumapenec titinquetannu, quiacbimbuen nuqui icsambuen nabanaid ënnuna. Adembidi dayacquiocquin Nuquin Papan chiacpaden nabanec tabadnuna. Esuquidistu tantiaquionona. Aidëmbi Nuquin Papa tantiameshun abi bëdambuen tantiamequioquin nuqui bëdambuec tabadmequid icquin bëdambocquido icmendac. Aidi nadec onquepanëdash: Cuishonquequin ubi yacno matses iuedembi, quiash matsesacsho icsambuen naquidbimbuecnuc cuidquin mëyanquin ubi cueste napotiaidën dectanendac, quiash dacuëdenquio yec uënësacsho uincuenmiac nidash aton tsadte dapan Nuquin Papa tsadacno aidën dayun abiucquio abitedishun Icbombo yec tsadtuidpanëdash.

Aden ambi icsambuen naid ënmenuen natiamequin paëmbo icmiac: Bëdambo iquebi, quetiapimbo nuqui iquec. Aden natiamiaqui bëdambuen tantiabenshun ambi icsambuen naid ënec utsibobëd chieshënnanenquio yec bëdambuec tabadendac.

Umbi aden chiaid tantiec utsibobëd chushcananenquio yec bëdambuec tabadta. Aden Nuquin Papan chiacpadombuen nanuna. Aidën chiaid niaquec tabadquin Nuquin Icbo bëisenquio nuqui ictsiandac.

Naden tantiaquin Esusquio tantiata. Nuquin Papan Chiaid niacquin icsambuen naquidon natiamequin mëyanaqui chieshtoenquiocquid Esuquidistu icpanëdash, quequin aid tantiec ma mibitedi uidënquio yec chieshtoenquio icpanuna.

Adoaid Nuquin Papa ambi namiacno abi tantiaquidobëd tabadte ishcunquin nibëdanmetiapimbo ictequid nec, quequin Nuquin Papan nabanaid tantiec aid bunacpaden: Nuquin Papa bëdamboshë iquec, quequin aidquio tantiec tabadnuna.

Nëbi Nuquin Papan ambi cun bacuëbo caido icshobi mimbi icsambuen naid ënmenuen mibi natiamendac. Adembidi ambi natemaid ënmenuen aton papan aton bacuëbo ¿natiamenquioda icpec? Ai aden natsiash.

Nadatiambocquid yec cute nëdënquequin abitedi nibëdquiecnuc pichicaquidbimbuecquid Nuquin Papa neque. Aidquio tantianuna.

Aden nuquin pabëtan nuquin tan nëid nidaidën tabadquin nuqui caniabicsho ambi tantiacpaden: Naden namiac cun bacuëbon bëdambuen natsiash, quequin nuqui icsambuen naid ënmenuen natiamepadennec. Padnuen Nuquin Papan: Ubipadquid bëdamboshëcquid icmenu, quequin nuqui icsambuen naquin ënmequin natiamendac.

Mimbi icsambuen naid ënnuec mëyadec intac nua chiuidec mibitedi uënësabi iqueque. Chieshtoenquio icquin Esus tantiata.