Ebedeo 12

Mëyanaqui chieshtoenquio icquin Nuquin Papa tantiate chiaid

1Aden Nuquin Papa tantiaquidombo yec uënësampidën dacuenadec tabadquin isacbimbuec nuqui tabadec. Aidon nampid tantiaquin Nuquin Papa tantiate bunquioquin: Cun dashcute iuëmbocquid chictanec cumapenec titinquetannu, quiacbimbuen nuqui icsambuen nabanaid ënnuna. Adembidi dayacquiocquin Nuquin Papan chiacpaden nabanec tabadnuna. 2Esuquidistu tantiaquionona. Aidëmbi Nuquin Papa tantiameshun abi bëdambuen tantiamequioquin nuqui bëdambuec tabadmequid icquin bëdambocquido icmendac. Aidi nadec onquepanëdash: Cuishonquequin ubi yacno matses iuedembi, quiash matsesacsho icsambuen naquidbimbuecnuc cuidquin mëyanquin ubi cueste napotiaidën dectanendac, quiash dacuëdenquio yec uënësacsho uincuenmiac nidash aton tsadte dapan Nuquin Papa tsadacno aidën dayun abiucquio abitedishun Icbombo yec tsadtuidpanëdash.#12.2 Chotaquën onqueten dada uaid Cuëd. 110.1 tantiaquin nëid dada uapanëdash. 3Naden tantiaquin Esusquio tantiata. Nuquin Papan Chiaid niacquin icsambuen naquidon natiamequin mëyanaqui chieshtoenquiocquid Esuquidistu icpanëdash, quequin aid tantiec ma mibitedi uidënquio yec chieshtoenquio icpanuna.

4Mimbi icsambuen naid ënnuec mëyadec intac nua chiuidec mibitedi uënësabi iqueque. Chieshtoenquio icquin Esus tantiata. 5Naden chiaid mibitedi bëshunac: Cun bacuëbo nec, quequin Nuquin Papan bëdambuen chiaid chuiquin dada uampid mibi bëshunaid nad iqueque. Tantia:

Mimbi icsambuen nasho issun Nuquin Papan: Aden nainda, quequin tantiamiac chieshenda.

Adembidi: Icsambuen tantiaquin mimbi nabaneque.

Bëdambuen tantiaquin nata, cac chieshtoenquio yec dayacquio yec bëdambuec tabadta.

6Ambi tantiaidquio icsho Nuquin Papan: Naden nata, quequin mibi tantiamendac.

Adembidi ambi: Cun bacuëbo nec, caido icshobi bëdambuen namenuen natiamendac,

quequin chuipampic.#12.6 B.T.Ch. 3.11-12 tantiaquin nëid dada uapanëdash.

7Nëbi Nuquin Papan ambi cun bacuëbo caido icshobi mimbi icsambuen naid ënmenuen mibi natiamendac. Adembidi ambi natemaid ënmenuen aton papan aton bacuëbo ¿natiamenquioda icpec? Ai aden natsiash. 8Aden aton bacuëbo icsho ambi icsambuen naid ënmenuen natiamiacpadembidi Nuquin Papan mimbi icsambuen naid ënmenuen natiamec. Adoenquio yac ambi: Cun bacuëbo nec, caidpenquio mibitedi ictsiac. 9Aton bacuëbo icsho nuquin pabëtan nuquin tan nuqui icsambuen nasho ënmenuen nuqui natiamepadennec. Adoaqui: Nuqui tishmequid nuquin tabëta nuquin pa nuqui bëdambuen ispadennec. Adombuembidi Nuquin Papa tantiaquid icquin aidën chiacpadombuen nanuna abi yacno ënëdenquio yec tabadnuen. 10Aden nuquin pabëtan nuquin tan nëid nidaidën tabadquin nuqui caniabicsho ambi tantiacpaden: Naden namiac cun bacuëbon bëdambuen natsiash, quequin nuqui icsambuen naid ënmenuen natiamepadennec. Padnuen Nuquin Papan: Ubipadquid bëdamboshëcquid icmenu, quequin nuqui icsambuen naquin ënmequin natiamendac. 11Aden ambi icsambuen naid ënmenuen natiamequin paëmbo icmiac: Bëdambo iquebi, quetiapimbo nuqui iquec. Aden natiamiaqui bëdambuen tantiabenshun ambi icsambuen naid ënec utsibobëd chieshënnanenquio yec bëdambuec tabadendac.#12.11 Chotaquën onqueten dada uaid M.I.Ch. 8.5 tantiaquin nëid dada uapanëdash. Adembidi min onqueten dada uaid Sam.2. 7.14 tantiaquin nëid dada uapanëdash.

12Aden tantiec mëdantebëd dannësh uinmabudacbimbuec icbuedi uidënquio yanquin Nuquin Papa tantiaquiec tabadta. 13Aden Nuquin Papa tantiec podqued cuembo icnuc antiacbimbuec bëdambuec tabadta. Aden antiedën nidec tadquëdenquio yec nidacbimbuen icsambuen nainquio yec bëdambuec tabadta.

VI. ESUS TANTIAQUIDO TABADTE CHIAID

(12.14—13.19)

Chieshtoenquio icquin Nuquin Papa tantiata, caid

14Umbi aden chiaid tantiec utsibobëd chushcananenquio yec bëdambuec tabadta. Aden Nuquin Papan chiacpadombuen nanuna. Aidën chiaid niaquec tabadquin Nuquin Icbo bëisenquio nuqui ictsiandac.#12.14 Chotaquën dada uaid D.N.Ch. 11.45 dada uampidbimbuen nëid dada uapanëdash. Adembidi Cuëd. 34.14 dada uacbimbuen nëid dada uapanëdash. 15Nuquin Papan bëdambuen isaid icquimbi chieshtoshon icsambuen nasho issun: Mibi icsambuec tabadeque. Adec tabadquin ismequin cute podo icsa chodcashun acmiacbimbuen mimbi utsibo icsambuen nametsiaque. Padi. Aden naic tabadenda, quequin chuiban.#12.15 M.I.Ch. 29.18 tantiaquin nëid dada uapampic. Aid isbanta. 16Nuquin Papan Chiaid niacquin min chidopenquio chudenda. Chidon min bënëpenquio chudmenda. Mimbi chudtemaidi chudenda. Aden naquidon Nuquin Papan Chiaid niaquendac. Adembidi Esaun aton papan bëyucquid icsho abi chuitequidi chieshëmpampic. Bundoshon pete bunquin aton utsi chiec: Nuquin pan ubi bëyucquid icsho bëdambuen chuitequid chienquio icquin mibimbo ma chuinu. Pete bec cho, quequin icsambuen tantiaquin pete bedpampic.#12.16 Ene. 25.29-34 tantiaquin nëid dada uapanëdash. 17Aden Esaun nampid mimbi tantiec. Ambi chiacpadombuen abi chuitequidi aton papan Acobo chiacsho tantiashun: Ubitsen mimbi bëdambo icmete chiaid utsi chui, papa, cac: Uesquin min utsi chiombi, quequin aton papan chiac Esau shubiquiopampic.#12.17 Ene. 27.30-40 tantiaquin nëid dada uapanëdash. Aid isbanta.

18Ënden: Nuquin Papabëd onquenu, queshun nuquin tsusedpabon nampicpadombuen mibitedishun nambo iquec. Aido ambi isaid macuësh tapa yacno chopampic. Aid macuësh nuamboshë nëdënquedopampic. Adec nëdënquenubi cuencuempambo yec inchëshquio icnubi cunquequid tapatsen icpampic. 19Adembidi shoncaten nuambo shoncaidbëta Nuquin Papa cumapenec onquesho mimbi tantiambo iquec. Adec onquesho tantiaquidon nadopampic. Papa, Padi. Aden ubitedi chienda. Dacuëdmianec mibi onqueque, quequin chuipampic. 20Ënden Nuquin Papan: Macuësh tincainda. Aden matsesbëtan nëish iuan tincasho issun cuënoten seshunnetequid nendac. Aden tincaquid utsi cudan seshunnetequid nendac, quequin chuipampic. Aden dacuëdampambuen chuisho tantiashumbi aidën chiacpaden natiapimbo icpampic tsusedpabon.#12.20 Buan. 12—13 tantiaquin nëid chuipanëdash. 21Aden Nuquin Papan nadatiambocquin nabansho isash Moises: Dacuëdampambo icnuc dacuëdec uëdëquebi, quepampic.#12.18-21 Buan. 19.16-22 tantiaquin nëid chuipanëdash. Adembidi Buan. 20.18-19 isbanta.

22Padnuen mibitedi dacuëdenquio yec Macuësh Sion cashumbic Edusaden Bëdambocquid abuc icquidën Nuquin Papa uënëstiapimbocquid tabadacno choacbimbuecquido mibi nec. Ambo Nuquin Papabëd icquido tambantiapimbo yec dadpenquioshë nadec onquec: Nuquin Papa bëdamboshë iquec, quec cuëdëncuededec tabadec. 23Adec tabadnuc abi yacno choash Esus tantiaquidotedi Nuquin Papan: Cun bacuë bëyucquido nec, quequin tantiaquiacbimbuen tantiaidombo yec abi yacno iccuededquido isec anoentsëqui choacbimbuecquido mibi nec. Aido Nuquin Papa yacnoshon abi cuëmëdquid dada uac. Adembidi Nuquin Papa abitedishun naid tantiaquid icquin: Nëid bëdambuen naquid nec. Nëid icsambuen naquid nec, caquid yacno choacbimbuecquido mibi nec. Adecbidi abi tantiaquid bëdambocquido ënden uënësaido Nuquin Papan bëdambuec tabadquidouidquio icmiaido yacno choacbimbuecquido mibi nec. 24Adecbidi Esus yacno choacbimbuecquido mibitedi nec. Aidi Nuquin Papan Ambi Chiaid chuca namiaid icquin Nuquin Papa matses bëdambuen ismequid nec. Esus abided cuidadec uënësaid intaquën matsesën icsambuen naid ucacbimbuen bëshunmequin Nuquin Papa nuquitedi bëdambuen ismec. Padnuen Abed intac chiquidiquec uënësaidën Nuquin Papa matses bëdambuen ismetiapimbo icpampic. Esus abided cuidadec uënësaidëmbien Nuquin Papa matses bëdambuen ismendac.#12.24 Abedbëta aton buchi Cain chiaid istiadquio icquin Ene. 4.1-16 isbanta.

25Aden umbi chuisho tantiashun naden tantiata. Nuquin Papan chiacpadombuen nainquio icmane, queshun aidën chuisho tantiata. Ënden Nuquin Papan: Umbi chuisho tantiata, cac matsesën abi chieshënquin ambi chiacpadombuen nainquiocsho cuentiapimbocnoc Nuquin Papan cuidpampic. Adembidi nëbi abi yacno abucshun chuimesho tantiashumbi ambi chiacpadombuen nainquiocsho Nuquin Papan cumapenen cuiduaindac. 26Ënden Macuësh Sinai yacnouësh Nuquin Papa onquenuc nidaiduidtsëqui ishcudpampic. Nëbiembi padpidembuen ishcudmequin nidaidbëta abu ishcudmendac, quec Nuquin Papa.#12.26 Nëidtedi tantiaquin nëidtedi dada uapanëdash. Nëidic Buan. 19.18. Nëidic Aqueo 2.6 Nëidic chotaquën onqueten dada uaid Isa. 13.13. Aidi isbanta. 27Aden: Padpidembuen ishcudmendac, quequin chiaid tantiashun nuqui naden tantiec: Ambi uaidtedi ishcunac mannëdtequid icsho nibëdanmequin ishcunuaindac. Adoac mannëdtiapimbo icquiduidtsëqui yanendac.

28Adoaid Nuquin Papa ambi namiacno abi tantiaquidobëd tabadte ishcunquin nibëdanmetiapimbo ictequid nec, quequin Nuquin Papan nabanaid tantiec aid bunacpaden: Nuquin Papa bëdamboshë iquec, quequin aidquio tantiec tabadnuna. 29Nadatiambocquid yec cute nëdënquequin abitedi nibëdquiecnuc pichicaquidbimbuecquid Nuquin Papa neque. Aidquio tantianuna.#12.29 M.I.Ch. 4.24 Aidbimbuec nëid dada uapanëdash. Aid ista.

Currently Selected:

Ebedeo 12: mcfNT

Highlight

Copy