1 Kolinte 6
6
Kesi mulitwale kuli vaka-kusompa
1Nga akati keni ali umo ali na n̄anda na mukwavo muka-Yesu, vatijo aya kuli vaka-kusompa vaje vaka-kujeneka kukulaela kujeneka kuya ku vanu va Njambi ngeci vakenge ije n̄anda? 2Kuma kumwazivukile ngweni vanu va Njambi vakasompa vaka-kaye ndi? Co nga mukasompa vaka-kaye, kuma kumwasa kusompa vin̄anda vyavindondo ndi? 3Kumuzivuka ngweni tukasompa tungelo ndi? Kuma kutwasa kuhyana mukusompa vyuma vya mwonyo ou ndi? 4Nga muli na vin̄anda vimo, kuma muvitwala vakavishungamese kuli vanu vaje kuvesi na mwela mu cikungulukilo ndi? 5Shwamwa imikole! Mwa vushunga ali umo akati keni uje ali na mana asa kushungamesa n̄anda eyi akati ka vaka-Yesu. 6Oloni akati keni umo muka-Yesu aya ku mbanja nakusompesa mukwavo, co ecela vaka-kujeneka kukulaela vasompe ije n̄anda!
7Ngecivene, omwo yeni muli na vin̄anda akati keni cimwesa ngeci munonwa. Vika kumutavela vamilinge mwamuvi? Vika kumutavela ngeci vamivile? 8Oloni mulinakuliviisila yeni vavenya umo na mukwavo, nakulivila umo na mukwavo, nameme musamba wove vene! 9Mwa vushunga mwazivuka ngeci vaka-vuvi kuvakashwana Vumwene vwa Njambi. Kesi mulikwise yeni vavenya, vaka-vukwizi nambe vaka-kulemesa tumponya nambe vaka-vupangala nambe vaka-vundei 10nambe vaka-kwiva nambe vaka-cipululu nambe vaka-kupenda nambe vaka-kushaula nambe vezi, kuvakashwana Vumwene vwa Njambi. 11Vamo veni mwafwile ngacije. Oloni vanamijelesa ku vuvi, vanamikundika kuli Njambi, vanamipwisa vaka-vushunga ku mesho a Njambi ali Mwene Yesu Kilistu na ali Munzinzime wa Njambi yetu.
Pangeseni mivila yeni ku vumpau vwa Njambi
12 #
1 Koli 10:23
Umo endeka ngwendi, “Vananjitavesa kulinga vyuma vyoshe.” Eyo, oloni kesi vyuma vyoshe vinapu vyavivwa kuli yove embwe. Njasa kwendeka ngwange vananjitavesa kulinga vyuma vyoshe, oloni kunjitava ngeci cuma cimo cinjipwise ndungo embwe. 13Weka endeka ngwendi, “Vyakulya vyapwa vya lifu, co lifu lyapwa lya vyakulya.” Eyo, oloni Njambi akanyongesa vyoshe vivali. Muvila wa munu kuvapandele kuupangesa ku vupangala, oloni wapwa wakupangela Mwene, co Mwene aana vije vishakiwa ku muvila. 14Njambi wasangwile Mwene ku vatsi, co ikeye lalo akatusangula na nzili yendi.
15Mwazivuka ngweni mivila yeni inapu vilyo vya Kilistu. Kuma njasa kutundisa cilyo cimo ca muvila wa Kilistu nakucipwisa cilyo ca cikwizi ndi? Embwe kucitava! 16#Kut 2:24 Indi kumuzivuka ngweni woshe akumbasana muvila wendi na cikwizi alipwisa nendi muvila umo? Visoneka vyendeka ngwavyo, “Voshe vavali vakapwa muvila umolika.” 17Oloni uje alikumbasana na Mwene apwa mumolika nendi mu munzinzime.
18Teweni vupangala. Vuvi vwoshe vwalinga munu kuvuviisa muvila wendi, oloni woshe alinga vupangala alinakuvulumuna muvila wendi. 19#1 Koli 3:16; 2 Koli 6:16 Indi kumuzivuka ngweni mivila yeni yapwa njuvo ya Munzinzime Wakujela uje wakala muli yeni, uje wamyanene Njambi ndi? Co kumwakundamene kuli yeni vavenya, oloni munakundama kuli Njambi, 20Omwo wamilandele na ndando. Ngecivene, shangazaleni Njambi mu mivila yeni.
Currently Selected:
1 Kolinte 6: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006