1 Kolinte 7
7
Vihula a kwambata
1Kukumbulula a vin̄anda vije mwanjisonekelele. Mwamuvwa munalume kesi ambate.#7:1 MWAMUVWA MUNALUME KESI AMBATE: Nambe, mwendeka ngweni mwamuvwa munalume kesi ambate. 2Oloni omwo kuli vupangala manene, munalume woshe napande kukala na munakazi wendi, na munakazi woshe napande kukala na munalume wendi. 3Munalume alinge na munakazi wendi vije vyamupande, na munakazi lalo alinge mumolika na munalume wendi, co voshe vanapande kushulisa vizango vya umo na mukwavo. 4Munakazi kesi na moko ya a muvila wendi embwe, oloni munalume wendi, mu ngila eyi lalo, munalume kesi na moko ya a muvila wendi embwe, oloni munakazi wendi. 5Kesi mulikanangane umo na mukwavo, kuvanga akulivanga mulizivasane akati keni a simbu imo ngeci mukale na simbu yakulombela, oloni mulikumbasane lalo mu vulo vweni, kutewa Satana amyeseka omwo kumwasa kulinyunga yeni vavenya.
6Njimileka evi kesi ngwe kumishika, oloni ngwe kumitava. 7Nameme ngoco njishaka ngwange muva voshe mufwe ngwe yange, oloni munu na munu ali na vwana vuje vwanamwana Njambi, ou na vwana vwendi, mukwavo lalo na vwana vweka.
8Ololo, njilinakwendeka kuli vazike na kuli vifwile ngwange mwamuvwa kukala eni lika ngwe yange. 9Oloni nga kuwasa kulinyunga ku mashungu ove, co ambata, mwamuvwa kwambata kutuvakana kukala na mashungu.
10 #
Mat 5:32; 19:9; Mak 10:11-12; Luk 16:18 Oloni vaje vali ku malo njivashika, kesi ngwe yange vavenya oloni Mwene, munakazi kesi atunde kuli munalume wendi, 11oloni nga atunda kuli munalume wendi napande kukala vuzike nambe kwiluka kuli munalume wendi, co lalo munalume kapandele kukondola munakazi wendi.
12Oloni veka njivaleka ngwange (yange njinendekamo, kesi Mwene embwe), nga munalume muka-Yesu ali na munakazi kesi muka-kukulaela, co munakazi atava kukala nendi amo, munalume kapandele kumukondola. 13Co nga munakazi muka-Yesu nashomboka kuli munalume uje kesi muka-kukulaela, co munalume atava kukala nendi amo, co munakazi kapandele kumuvyana. 14Omwo uje munalume wakujeneka kukulaela vanamujelesa kuli Njambi akulikumbasana na munakazi wendi, na munakazi uje wakujeneka kukulaela vanamujelesa kuli Njambi akulikumbasana na munalume wendi muka-Yesu. Nga kucapwile ngacije, nga vana vavo vapwile ngwe vana va vaka-kujeneka kukulaela, oloni ololo vanapu vakujela. 15Oloni nameme ngoco, nga uje kesi muka-kukulaela ashaka kutundako kuli uje muka-Yesu, mweceleni atundeko. A vin̄anda vya ngacije muka-Yesu uje nakala amo nendi, nambe munalume nambe munakazi, napatuka. Omwo Njambi natusanen kwoloka. 16Ove munakazi muka-Yesu wazivuka vati ngwove wasa kwovola munalume wove? Nambe wazivuka vati ove munalume muka-Yesu ngwove wasa kwovola munakazi wove?
Kuyoya ngwe mwanakusanena Njambi
17Ngwe omo Mwene naana vwana ku munu na munu mukemwo mwanavasanena ngeci vendelemo. Eli likelyo lishiko linjikalongesa mu vikungulukilo vyoshe. 18Nga munu vamusanene kuli Njambi ikeye watuuka laja, co kapandele lalo apwe ngwe wakujeneka kutuuka, nga munu vamusanene kuli Njambi ikeye kanda atuuke, co kapandele kutuuka embwe. 19Omwo kutuuka nambe kujeneka kutuuka kucilingi cimo, cuma cakama kwononoka mashiko a Njambi. 20Munu woshe akale ngwe muje mwakele laja omo Njambi wamusanene. 21Nga omo Njambi wakusanene wapwile u ndungo, co kesi wakeko mbunge, nga ushaka kupwa wakupatuka, lingamo. 22Omwo ndungo uje ivanasana kuli Mwene napu munu wa Mwene wakupatuka, mu ngila imo vene, uje munu wakupatuka ivanasana kuli Kilistu napu ndungo yendi. 23Njambi namilanda na ndando yakama, ngecivene, kesi mupwe mu vindungo va vanu. 24Ngecivene, vavusamba vange, munu na munu napande kulitombola amo na Njambi ngwe muje mwakele omo vamusanene.
Vihula a vazike na vifwile
25Ololo, a vin̄anda vije mwasonekele ali vazike, kunjesi na lishiko lyakutunda kuli Mwene, oloni njimyana viyongola vyange ngwe umo uje a kutetela kwa Mwene napu muka-vushunga.
26Kumona a tuyando twa ololo, njayongola ngwange mwamuvwa munalume kukala ngacije vene. 27Uli na munakazi ndi? Kesi umusheke. Umuzike ndi? Kesi ushakezeke munakazi. 28Oloni nga wambata, kuwalingile vuvi, co lalo nga munakazi wa muzike ashomboka, kalingile vuvi. Oloni njinamitetela lika a tuyando twa a litangwa na litangwa tuje vakakala natwo vaka-malo.
29Evi vyalumbunuka ngeci, vavusamba vange, kukwesi simbu yakama yasalako, co kutunda a simbu ino kutwala kulutwe vaka-kwambata vanapande kuyoya ngwe kesi kuvesi na vanakazi, 30co vaje valinakulila, vapwe ngwe kuvesi na vusiwa, vaje valinakujola, vapwe ngwe kuvesi nakuvwaelela, vaje valinakulanda, vapwe ngwe kuvesi na vije vanalanda, 31vaje valinakupangela vufuko vwa ano a kaye, vapwe ngwe kuvavupangelele. Omwo kano kaye, ngwe mukalimo ololo, kukakakalako simbu yakama.
32Njishaka ngeci kesi mushote vimbunge. Muzike wa munalume ashota mbunge ku vipangi vya Mwene, omwo ashaka kuvwaelelesa Mwene. 33Oloni muka-kwambata ali na cishota-mbunge ku vyuma vya ano a kaye, omwo ashaka kuvwaelelesa munakazi wendi, 34co mbunge yendi ilinakumukokela mu vingila vivali. Muzike wa munakazi nambe mumbanda uje kanda alimone na munalume ali na cishota-mbunge ku vipangi vya Mwene, ngeci ajele ku muvila muvila na munzinzime, oloni munakazi wakushomboka ali na cishota-mbunge ku vyuma vya ano a kaye, omwo ashaka kuvwaelelesa munalume wendi.
35Njilinakwendeka evi omwo njishaka kumikwasa. Kunjishaka kumivindika. Oloni njishaka mulinge cuma cacivwa cakushungama, nakwaka vimbunge vyeni vyoshe ku vipangi vya Mwene kujeneka cuma cakumitangula.
36Nga munu nayongola ngwendi kesi nakulinga mwamuvwa kuli mumbanda uje yashaka kwambata, nga mashungu endi anapu akama, co ashaka kumwambata, napande kulingamo, kucapwile vuvi. 37Oloni nga munalume akujeneka kumusindiya, ikeye navyana kwambata uje mumbanda, co nakolesa viyongola vyendi, co nayongola mu mbunge yendi vije ashaka kulinga, co alinga mwamuvwa kujeneka kwambata uje mumbanda. 38Ngecivene, munalume uje ambata nalingi mwamuvwa, oloni uje kambata nalingi mwamuvwa manene.
39Munakazi wakushomboka kapatukile omo munalume wendi acili nakuyoya, oloni nga munalume wendi natsi, co napatuka asa kushomboka kuli woshe yashaka, oloni kuvanga muka-Yesu. 40Oloni avwaelela manene nga atumbama mu vuzike. Evi vinapu viyongola vyange lika, co njayongola ngwange nange lalo njili na Munzinzime wa Njambi.
Currently Selected:
1 Kolinte 7: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
