Aoǁnâ-aob 5
5
Gā-aisib tsî ǃoabas
1Sa ǂaide Elob ommi ǃoats ga ǃgûo ǃûi îts ǀgū, tsî gâre khoen, ǂkhabasen ra dī ǃkhaisa ǀūse ra ǁguiba ǀgaus ais ose, xawe ǃgâ tsî nî ǁkhāǁkhāsense sī re.
2Tā ǃhae ǃhoas ǃaroma,
tā Elob aiǃâ ǃnoesase mîmâina dī.
Eloba ǀhommi ǃnâ
tsîts satsa ǃhūbaib ai hâ
xuige a di sa mîde ǀoro.
3ǁHapodi ǂgui ǂhansendi ǀkha ra ǃgûǁares ǁkhās khamin
ge gâre ǃhoaxūna ǂgui mîde ūhâ.
4Elobats ga mîmâiba, o tā ǁîsa dīǀoaǀoas ǀkha ǀhabe. ǁÎb gâre khoen ǃnâ ǃgâiǃgâibasensa ūhâ tama xuige sa nūsa dīǀoaǀoa.#Psa. 66:13-14 5ǃGâi i ge a mî tama isa, mîmâi tsîs nî dīǀoaǀoa tama is xa. 6Tā di sa ǂhunuma mîde ǁore kai tsi î ǁkhāti tā sîsabeba dīsāts go ti mîba. Tare-i ǃaromab Eloba sa dommi tsî ǃomkha âts di sîsenna nî hîkākā? 7ǂGui ǁhapodi, ǂganǃgâsin tsî mîdi ge hâ, xawe satsa Eloba ǃao re.
Ûib ge a ǁau
8ǀGâsan ra ǁgâiǀāhe tsî ǂhanu-aise tsî ǂhanuse sîsenūhe tama ǃkhaisats ga mû, o tā ǁnāti īn xa buru. Mâ-i hoa-i ge nau-i ǂamai hâ tsî-i ǁî-i ǂamai ǀnî-e hâ xuige.
9Xawe harebes ǃhūb dis ge a nē: Gao-aob ge ǃhūba ǁîb tsîn ǁnāpaxu ǃgâiba nî ǀamase ra ǂgaeǂgui.
10Mari-ets ga ǀnam ots ge tātsēs tsîna ǂâu tama hâ,
tsî ǃkhūsiba ǀnam-i ge tātsēs tsîna ǁî-i hōǂgās ǀkha ǂkhî tama hâ.
Nēs tsîn ge a harebeoǃnâ.
11ǃKhūsib ra ǀarosen
khamin ge khoen ǁnāpaxu nî ǀamana ra ǀarosen.
Nēsa mâ harebesa i ǀhonkhoe-e ūba hâ,
mûdi â-i ǀkha ǃkhūsib â-e ǂans ǀguis osesa?
12Sîsenao-i ge ǂkharise iga ūhâs,
ǃnāǂamsasib ǃnâ iga ūhâs hoasa sâsase ra ǁom.
Xawe ǃnāǂamsasib ǃkhū hâ khoe-i dib
ge ǁî-e ǂomsa ra ǀgara.
13ǁNāpa ta ge ǁkhōǁkhōsa ǂkhaba-i ǃhūbaib ai hâ-e ge mû:
ǃKhūsib ǀhonkhoe-i di tsūǃōb ase ra sâuhe ǃkhaisa.
14Tsîb ge nē ǃkhūsiba ǂhanu tama ǂharuguǃnôa-i ǃnâ-u ra ǂoaǃnâhe,
tsî i ge ǁî-i ga ǀgôa-e a hō,
o nē ǀgôa-e xū-e ǁnāpaxu ra hō tama i.
15ǀŌǀkhāse i ge ǃhūbaib ai hās ǁkhās khami i ge nîra ǁaru,
tsî-i ge ǀgui xū-i ǁî-i ǀhupub di-i tsîna ǃomǁae ūhâ tide.#Job 1:21; Psa. 49:17; 1Tim. 6:7
16Nēb tsîn ge a ǁkhōǁkhōsa ǂkhaba:
Khoe-i ge hā-i ge khami nî oa.
ǀHupub â-i ge ǂoaba sîsenbas khami ī.
17Tsî-i ge khoe-e ûib â-e ǃkhaenab ǃnâ ǂû,
kaise ǁaixa tsî nî ǀaesen.
18Tita ge nēsa ge mûǂan: ǂÛ, ā tsî i khoe-e Elob ge ûib ǃnâ mā da hoaraga sîsenni ǃnâ nî ǃgâiǃgâisen ǃkhaisa. Ûib ǃnâ ǃgâiǃgâisens ge a Eloba xu hâ ǀkhae. 19Elob ga khoe-e ǃkhūsib tsî ūhâxūna mā ǁîn ǃnâ i nî ǃgâiǃgâisense, o i ge ǁî-e ganganxa tsî ǁîna i ge sîsenba xūn di ǃgâiba nî ǀama. Elob huib ose i ge khoe-e nē ǀkhaega ǀama, ǁîn di mādawa-amde ūǃoa tamas ka io amab ǃnâ ǁîn di sîsenni ǃnâ ǃgâiǃgâisen ǁoa. 20Amabes ǃnâ i ge khoe-e kaise ǂkhari ǁaerob nē xūnǀî-i nî kō-oaba ra ūhâ, Elob ra ǃnāsa ǁaeb ǃgâiaǂgaos diba mā xui-ao.
Currently Selected:
Aoǁnâ-aob 5: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
