Aoǁnâ-aob 4

1ǃAruǀî ta ge ǁkhāti ǂhanuoǃnâsigu nē ǃhūbaib ai ra īga ge mû.

ǁGâiǀāhe hân ge gere ā

tsî-i ge khoe-i ǁîna nî hui-e a ǀkhai,

ǁgâiǀā-aon di ǀgaiba nî mâǃoa khoe-i ǀkhai xui-ao.

2Tsî ta ge ǁnān ǀnai ǁō hâna ǃgâiǃgâse ra ǃgapaǀî,

ǁnān ûitsama an ǃgâ-ai.

3ǁNān hîa ganupe ǃnae taman

ge ǁō hân tsî ûitsaman, ǁgâiǀāb ǃnaka hân ǃgâ-ai a ǃgâiǃgâ,

ǁîn ǂkhabab hîan khoena ǁîǃnābe ra dība noxopa mû tama xui-ao.

4Sîsenǁkhāsib hîan khoena ra hōb ge naun ǀkha ǀnûgusa xu ra hâ. Nēs tsîn ge harebeoǃnâ tsî ǂoaba saurus khami ī.

5Gâb ge ǃkhōnǃom

tsî ǁî-aitsama ra hîkākāsen.

6ǃOms ǀoa-i hîa ǃnōsasib ǃnâ ra hōhe-i

ge ǀgam ǃomra ǀoa-i,

ǀhupub tsî ǂoaba saurus ǃnâs khami ra hōhe-i ǃgâ-ai a ǃgâi.

7ǁKhāti ta ge ǁkhawa ǀnî xū-i harebeoǃnâ a-e ge mû:

8Khoeb ǀguri hâb, ǀgôa-i tamas ka io ǃgâsa-e ūhâ tamaǃâ

ra kaise ǀhupub ge hâ.

Xaweb ge ǃkhūsib âb xa ǂâu tama hâ tsî ra dîsen:

“Tari-e ǀhupuba

tsî ta kha nēs ǀkha ǃhūbaib di ǃgâiaǂgaoba ra ǂoaǃnâkaisen?”

Nēs tsîn ge a harebeoǃnâ tsî ǂoaba saurus khami ī.

9ǀGam khoen ge ǀgui-i ǃgâ-ai a ǃgâi.

Mâ-i hoa-i ge nau-e xu a domdore ǁkhā.

10ǀGui-i ga ǁnā,

o-i ge nau-i xa a huikhâihe ǁkhā.

Xawe i ge kaise a ǃoaǃoaxa ǁnā khoe-i hîa ǁnā-i ka,

o nî huikhâi-i khoe-e ūhâ tama-i ǃaroma.

11ǁKhātin ge ǀgamna ǀguipan ga ǁgoe o ra ǀgam,

o mâti i ǁnâi ǀguri ǁgoe-e a ǃnae ǁkhā?

12Tsî ǀguri hâ-i ga ǁnāǂam tsî danhe

xawen kom ǀgamse hâna a ǁkhauhuigu ǁkhāo.

ǃNonaǃnâgu ǁapa-i ǀkha kurusa tsurib ge supuse ǃgâu tama hâ.

13-14ǀGâsa xawe gā-ai ǂkham khoe-i ge kaira tsî gâ gao-ao-i, ǀapemāhesa ūǃoa ǂgao tama-i ǃgâ-ai a ǃgâi. 15Hoaraga khoen, ǃhūbaib ai hân di tsēkorobe ûiba ta ge ge kō tsî ta ge ǁkhāti ǀnî ǂkham khoe-i ǁnāpa mâ-e ge mû. 16ǂGui ǃgôab di khoen, aiǃâ ge hâ i tsî hā nî ǁaeǃgâdi dina, xawe i ge ǁîn ǃnâ ǀgui-i xare-i, ǁnā ǂkham khoe-e ra ǃgôaǃgâ-e ge ǀkhai i.

Currently Selected:

Aoǁnâ-aob 4: KKG20

Highlight

Copy