Mt 16

Ke'xtz'aama jun li eetalil taachalq sa' choxa

(Mk 8,11-13; Lk 12,54-56)

1Eb' laj Pariseey ut eb' laj Saduseey ke'jilok chi xk'atq li Jesus yal re xyalb'al rix, ut ke'relaji ru naq chixk'ut junaq eetalil taachalq sa' choxa.

2A'ut a'an kixsumeheb' ut kixye: “Naq na'ewuuk, laa'ex nekeye: «Chaab'ilaq li kutan, xb'aan naq kaq ru li choxa»; 3ut naq nasaqewk: «Hab'aq hoon, xb'aan naq kaqmoyink ru li choxa». Nekenaw b'i' xk'eeb'al reetal ru li choxa, ab'an ink'a' nekexruhank xtawb'al xyaalal li reetalil eb' li kutan a'in. 4Jun tenamit ink'a' us xch'ool ut aj muxunel naxsik' junaq eetalil; ab'an maajun eetalil taak'ehe'q re, ka'ajwi' li reetalil laj Jonás”.

Toja' naq kixkanab'eb' ut koho.

Li xch'amaleb' laj Pariseey ut laj Saduseey

(Mk 8,14-21)

5Ke'wulak eb' li xtzolom junpak'al li ha' ut ke'sachk sa' xch'ooleb' xk'amb'al xwaheb'. 6Toja' naq li Jesus kixye reheb':

—Chek'ehaq reetal, chekolaq eerib' chiru li xch'amaleb' laj Pariseey ut eb' laj Saduseey.

7Eb' a'an ke'ok chi xyeeb'al chirib'ileb' rib':

—Naxye a'in xb'aan naq ink'a' xqak'am chaq qawa.

8Ab'an li Jesus kixk'e reetal a'an ut kixye:

—Ex winq kach'in leepaab'aal, k'a'ut naq yookex chi xyeeb'al cherib'il eerib' naq maak'a' eewa? 9Ma toj maji' neketaw xyaalal? Ma ink'a' najultiko'k eere li oob' chi wa reheb' li oob' mil, ut jarub' chakach li rela' xexok?#16,9 Mt 14,17-21. 10Chi moko eb' li wuqub' chi wa reheb' li kaahib' mil, ut jarub' ninqi chakach li rela' xexok?#16,10 Mt 15,34-38. 11K'a'ut naq ink'a' neketaw xyaalal naq moko chirix ta wa xexwaatina? Chekolaq eerib' chiru li xch'amaleb' laj Pariseey ut eb' laj Saduseey.

12Toja' naq ke'xtaw ru naq ink'a' kixye naq chiru li xch'amal li wa tento te'xkol rib'eb', chiru b'an li xk'utumeb' laj Pariseey ut eb' laj Saduseey.

Laj Pedro kixye naq li Jesus a'an li Kriist

(Mk 8,27-30; Lk 9,18-21)

13Naq kiwulak li Jesus sa' xteepal Cesarea re Filipo, kixpatz' reheb' li xtzolom:

—Ani li K'ajolb'ej naq neke'xye eb' li tenamit?

14Ke'xye:

—Wan neke'yehok naq a' laj Jwan aj kub'sihomha'. Wankeb' chik neke'yehok naq laj Elías, ut wankeb' wi' chik neke'yehok naq a'an laj Jeremías malaj junaq reheb' li propeet.

15—Ut laa'ex, anihin laa'in naq nekeye? chan li Jesus reheb'.

16Kichaq'ok laj Simón Pedro ut kixye:

—Laa'at li Kriist, li Ralal li yo'yookil Yos.

17Toja' naq li Jesus kixye re:

—Us xaq aawe, a Simón, ralalat laj Jonás, xb'aan naq moko a' ta li tz'ejwalej chi moko li kik'elej#16,17 Li tz'ejwalej ut li kik'elej a'an li winq li wank sa' li xch'och'el xsululel, sa' xmajelal li xk'a'uxl, sa' xmajelal li xmetz'ew xjunes rib'. xk'utuk chawu a'in, a' b'an linchoxahil Yuwa'. 18Ut laa'in ninye aawe: Laa'at aj Pedro ut sa' xb'een li pek a'in#16,18 Pedro (Sefas nayeemank re sa' aatinob'aal arameo) sa' raatinob'aal li Jesus naraj naxye: Pek. tink'ojob' linIklees, ut li xwankil li xb'alb'a ink'a' taanumtaaq sa' xb'een. 19Tink'eheb' aawe li xlaawil li xnimajwal wankilal li choxa: li taab'ak' sa' ruuchich'och', b'ak'b'ooq ajwi' sa' choxa, ut li taahit sa' ruuchich'och', hithooq ajwi' sa' choxa.#16,19 B'ak'ok ut hitok naraj naxye: xk'eeb'al sa' tojb'amaak ut xyeeb'al naq maak'a' xmaak.

20Toja' naq li Jesus kixchaq'rab'iheb' li xtzolom naq maa'ani che'xye wi' naq a'an li Kriist.

Xb'een resil li xkamik li Jesus

(Mk 8,31-33; Lk 9,22)

21Chalen utan li Jesus kixtikib' xk'utb'al chiruheb' li xtzolom naq tento taaxik Jerusalén ut naab'al li rahilal tixk'ul sa' ruq'eb' li cheekel winq, li xb'eenileb' aj tij ut eb' laj tz'iib'; kixye ajwi' naq taakamsiiq ut taawakliiq chi yo'yo sa' rox li kutan. 22Toja' naq aj Pedro kirisi xjunes li Jesus ut ki'ok chi xq'usb'al:

—Maajaruj ta xaq, at Qaawa'! Ink'a' taxaq taak'ul chi jo'kan, chan re.

23A'ut a'an kixsutq'isi rib' ut kixye re laj Pedro:

—Elen chiwu, at aj tza! Laa'at aj luktesinel ch'ool cho'q we, xb'aan naq laak'a'uxl moko re ta li Yos, reheb' b'an li winq.

Xtaaqenkil li Qaawa' Jesus

(Mk 8,34—9,1; Lk 9,23-27; Jn 12,25-26)

24Toja' naq li Jesus kixye reheb' li xtzolom:

—Wi ani naraj intaaqenkil, mixra rib', chixchapaq li xkrus ut chinxtaaqehaq. 25Xb'aan naq ani naraj xkolb'al li xyu'am, taasachq chiru; ut li ani taasachq li xyu'am chiru sa' ink'ab'a', a'an tixtaw xyu'am. 26K'a' put ru tixra junaq winq naq taareechani chixjunil li ruuchich'och', wi taasachq li xyu'am chiru? Malaj k'aru tixk'e cho'q reeqaj li xyu'am? 27Xb'aan naq li K'ajolb'ej yooq chaq chi chalk sa' li xnimal xloq'al li xYuwa' rochb'eenaqeb' chaq li x'ánjel; toja' naq tixq'ajkamu li junjunq a' yaal chanru li xb'aanuhom. 28Relik chi yaal ninye eere naq wankeb' sa' eeyanq li ink'a' te'kamq toj reetal te'ril li K'ajolb'ej yooq chaq chi chalk sa' li xnimajwal wankilal.

Currently Selected:

Mt 16: QQC

Highlight

Copy