Mt 15

Li xchaq'rab' li Yos ut li xna'leb'eb' laj Pariseey

(Mk 7,1-23)

1Toja' naq ke'wulak rik'in li Jesus jun ch'uuteb' aj Pariseey ut aj tz'iib', ke'chalk chaq Jerusalén, ut ke'xpatz' re:

2—K'a'ut naq eb' laatzolom neke'xq'et li k'utb'il chiqu xb'aaneb' li qaxe' qatoon? Xb'aan naq ink'a' neke'xch'aj li ruq'eb' naq neke'wa'ak.

3Ut a'an kixsumeheb' ut kixye:

—K'a'ut naq nekeq'et ajwi' laa'ex li xchaq'rab' li Yos sa' xk'ab'a' li najteril na'leb' kanab'anb'il chaq eere? 4Xb'aan naq li Yos kixye: «Chawoxloq'i laana' laayuwa'»,#15,4a Ex 20,12; Dt 5,16. ut: «Ani tixmajewa li xna' xyuwa', kamsinb'ilaq».#15,4b Ex 21,17; Lv 20,9. 5A'ut laa'ex nekeye: «Wi junaq tixye re li xna' xyuwa': Tatintenq'a raj, ab'an li k'aru we ak xinmayeja chik re li Yos, 6li winq a'an ink'a' chik teneb'anb'il sa' xb'een roxloq'inkil li xna' xyuwa'», chankex laa'ex. Ut chi jo'kan xesach xwankil li Raatin li Yos xb'aan leenajteril na'leb'. 7Ex aj ka'pak'al u, yaal li kixye laj Isaías cherix laa'ex:

8«Li tenamit a'in rik'in xtz'uumal reheb' nikine'roxloq'i,

a'ut li xch'ooleb' najt wank wik'in.

9Maak'a' aj e naq nikine'roxloq'i,

xb'aan naq li k'aru neke'xk'ut chiruheb' li tenamit

yal xtaqlahomeb' li winq».#15,8-9 Is 29,13.

10Chirix chik a'an li Jesus kixb'oqeb' li tenamit ut kixye reheb':

—Ab'ihomaq ut chetaw xyaalal. 11Maawa' li k'aru naxtzeka li junjunq natz'ajnink re, a' b'an li k'aru na'elk chaq sa' re: a'an natz'ajnink re.

12Toja' naq eb' li xtzolom ke'jilok chi xk'atq ut ke'xye re:

—Ma nakanaw naq eb' laj Pariseey ra xe'reek'a naq xe'rab'i laawaatin?

13Li Jesus kixsumeheb':

—Chixjunil li awimq ink'a' awb'il xb'aan linchoxahil Yuwa' taamich'manq. 14Kanab'omaqeb' xb'aan naq mutz'eb' ut aj b'eresihom mutz'eb'. Ut wi junaq mutz' naxb'eresi junaq rech mutz'il, chi xkab'ichaleb' te't'ane'q sa' jul.

15Toja' naq ki'aatinak laj Pedro:

—Ch'olob' chiqu xyaalal li jaljookil ru aatin, chan re.

16Kixye li Jesus:

—Ma toj maak'a' ajwi' eena'leb' laa'ex? 17Ma ink'a' neketaw ru naq chixjunil li naxtzeka li junjunq naxik sa' li sa'ej ut natz'eqmank sa' li tz'eqleb'aal mul? 18Ut li k'aru na'elk chaq sa' ehej, nachalk chaq sa' li ch'oolej, ut a'an li natz'ajnink re li poyanam. 19Xb'aan naq sa' li ch'oolej na'elk chaq li ink'a' usil na'leb': li kamsink, muxuk sumlaak, ko'b'eetak yumb'eetak, elq'ak, yoob'ank aatin, majewank. 20Eb' a k'a' re ru a'in neke'tz'ajnink re li poyanam; a'ut li wa'ak chi ink'a' ch'ajb'ilaq li uq'ej, ink'a' natz'ajnink.

Li xk'irajik li xko' jun li ixq aj Kanahán

(Mk 7,24-30)

21Ki'elk li Jesus aran ut koho sa' xteepal Tiro ut Sidón. 22Ut jun li ixq aj Kanahán ki'elk sa' li na'ajej a'an, japjo re chi xyeeb'al:

—At Qaawa', ralalat laj David, chawuxtaana wu! Linko' k'ajo' naq rahob'tesinb'il xb'aan laj tza!

23A'ut li Jesus ink'a' kixsume. Ut eb' li xtzolom ke'jilok chi xk'atq ut ke'relaji ru:

—B'aanu usilal re, xb'aan naq japjo re chiqix, chankeb'.

24Kixye li Jesus:

—Maab'ar taqlanb'ilin chaq, ka'ajwi' rik'ineb' li karneer sachenaq, a'eb' laj Israel.

25Kichalk li ixq, kixwiq'ib' rib' chi xloq'oninkil ut kixye:

—Qaawa', tenq'ahin!

26Kichaq'ok li Jesus:

—Moko us ta xmaq'b'al xwaheb' li alal k'ajolb'ej re xk'eeb'al reheb' li kok' tz'i', chan re.

27—Yaal, Qaawa' -chan li ixq-, ab'an eb' li kok' tz'i' neke'xwa' ajwi' li xk'aj li wa nat'ane'k rub'el xmeexeb' laj eechal reheb'.

28Ut li Jesus kixye re:

—At ixq, nim laapaab'aal; chi'uxq aawe jo' nakawaj.

Ut sa' ajwi' li honal a'an kik'iraak li xko'.

Naab'aleb' ke'k'irtasiik

29Ki'elk li Jesus aran ut kiwulak chire li palaw re Galilea; kitaqe'k chiru tzuul ut kik'ojlaak aran. 30Ut naab'aleb' li tenamit ke'wulak rik'in: wankeb' chaq yeq, toqol, mutz', mem ut naab'aleb' chik xkomon. Kole'k'ehe'q chi roq li Jesus ut a'an kixk'irtasiheb'. 31Jo'kan naq eb' li tenamit nalaje'sachk xch'ool chi rilb'al naq eb' li mem neke'aatinak chik, li toqoleb' k'irajenaqeb', li yeqeb' neke'b'eek ut eb' li mutz' neke'ilok chik. Ut ke'xnima xloq'al li xYos aj Israel.

Naq ke'wa'ak li kaahib' mil

(Mk 8,1-10)

32Li Jesus kixb'oqeb' li xtzolom ut kixye:

—Nintoq'ob'a ruheb' li tenamit a'in, xb'aan naq ak oxib' kutan xchalikeb' wik'in ut maak'a'eb' xwa; ut ink'a' nawaj xchaq'rab'inkileb' chi maji' neke'wa'ak: mare anchal te'lub'q sa' b'e.

33Ut eb' li xtzolom ke'xye re:

—B'ar taaqataw li wa arin, sa' junesal na'ajej, re xk'ojob'ankil xch'ooleb' li k'iila tenamit a'in?

34Kixye li Jesus reheb':

—Jarub' chi wa wank eerik'in?

—Wuqub', ut wiib' oxib' li kok' kar, chankeb'.

35Toja' naq kixtaqlaheb' li tenamit chi hilank chiru ch'och', 36kixchap li wuqub' chi wa ut eb' li kar, kiyoxink, kixjachi, yo chi xk'eeb'al reheb' li xtzolom ut eb' li xtzolom ke'xjek'i reheb' li tenamit.

37Ke'wa'ak chixjunileb' ut ke'k'ojlaak xch'ool; ke'xxok li rela' li wa: wuqub' ninqi chakach nujenaqeb' chi wa. 38Ut eb' li ke'wa'ak kaahib' mil chi winq, ink'a' k'eeb'ileb' sa' ajl eb' li ixq ut eb' li kok'al. 39Chirix chik a'an kixchaq'rab'iheb' li tenamit, ki'ok sa' li jukub' ut koho sa' xteepal Magadán.

Currently Selected:

Mt 15: QQC

Highlight

Copy