Mt 17

Kilemtz'uno'k xjunxaqalil li Jesus

(Mk 9,2-8; Lk 9,28-36)

1Waqib'aq kutan chik a'an, li Jesus kixb'oqeb' laj Pedro, laj Santiago ut laj Jwan li riitz'in, ut kixk'ameb' xjuneseb' sa' xb'een jun li tzuul najt xteram. 2Ut kilemtz'uno'k li xjunxaqalil chiruheb': li rilob'aal kilemtz'uno'k kama' li saq'e ut li raq' kisaqo'k kama' li saqenk. 3Ut xaqaamileb' laj Moisés ut laj Elías chiruheb', yookeb' chi seeraq'ik rik'in li Jesus. 4Kixtikib' aatinak laj Pedro ut kixye re li Jesus:

—Qaawa', us toowanq arin. Wi taawaj, tinyiib' arin oxib' chi muheb'aal: jun cho'q aawe, jun cho'q re laj Moisés, jun chik cho'q re laj Elías.

5Toj yo ajwi' chi aatinak laj Pedro, naq jun li choql nalemtz'unk kimuheelank reheb'. Aka' chik jun xyaab' kuxej kichalk sa' li choql ut kixye: “A'in li walal raaro inb'aan. Rik'in a'an nasaho'k inch'ool: a'an cherab'ihaq”.

6Naq ke'rab'i a'in eb' li xtzolom, ke't'ane'k chi hupu ut k'ajo' naq ke'xiwak. 7Li Jesus kijilok chi xk'atqeb', kixch'e'eb' ut kixye:

—Xaqlinqex, mexxiwak!

8Ut naq ke'xtaqsi li rilob'aaleb', maa'ani chik ke'ril ru, ka'aj chik li Jesus xjunes.

Li xk'ulunik laj Elías

(Mk 9,9-13)

9Naq yookeb' chaq chi kub'eek chiru tzuul, li Jesus kixchaq'rab'iheb' ut kixye:

—Maa'ani aj e cheye li b'arwan xeril toj reetal naq li K'ajolb'ej taawakliiq chi yo'yo sa' xyanqeb' li kamenaq.

10Ut eb' li xtzolom ke'xpatz' re:

—K'a'ut naq eb' laj tz'iib' neke'xye naq xb'enwa tento taak'ulunq laj Elías?

11Li Jesus kixsumeheb' ut kixye:

—Laj Elías tento taak'ulunq ut tolxk'e wi' chik chixjunil sa' xna'aj. 12A'ut laa'in ninye eere naq ak k'ulujenaq laj Elías ut ink'a' ke'xnaw ru, ke'xb'aanu b'an re jo'nimal li ke'raj. Jo'kan ajwi' li K'ajolb'ej rahilal tixk'ul sa' ruq'eb'.

13Toja' naq eb' li xtzolom ke'xtaw ru naq chirix laj Jwan aj kub'sihomha' yo chi aatinak.

Li xk'irajik li ch'ina'al aaq xyajel

(Mk 9,14-29; Lk 9,37-43)

14Naq ke'wulak wankeb' wi' li tenamit, jun li winq kinach'ok rik'in li Jesus, kolxwiq'ib' rib' chiru ut kixye:

15—Qaawa', chawuxtaana ru li walal xb'aan naq napohonk xyajel ut ra wank; naab'al sut nat'ane'k sa' xam ut k'iila sut sa' ha'. 16Xink'am rik'ineb' laatzolom, ab'an ink'a' xe'ruhank chi xk'irtasinkil.

17Kichaq'ok li Jesus ut kixye:

—Ex tenamit tik maak'a' eepaab'aal ut sachenaqex sa' li maak, jo' najtil chik tinwanq eerik'in? Jo' najtil chik texinkuy? K'amomaq chaq arin.

18Li Jesus kixq'us chi kaw li maa'us aj musiq'ej ut ki'elk rik'in. Ut sa' ajwi' li honal a'an kik'iraak li ch'ina'al.

19Toja' naq eb' li xtzolom li Jesus ke'jilok chi xk'atq ut ke'xye re xjunes:

—K'a'ut naq laa'o ink'a' xooruhank chi risinkil?

20Kixye reheb':

—Xb'aan naq kach'in leepaab'aal. Relik chi yaal ninye eere: wi ta li xnimal leepaab'aal a'an jo' jun t'orol chi mostaas, teeye raj re li tzuul a'in: «Elen arin ut q'axon le'», ut a'an taaq'axonq raj; ut maak'a' raj k'aru ink'a' truuq teeb'aanu.#17,20 Li raqal 21: Eb' li musiq'ej a'in maak'a' k'aru te'elq wi', ka'ajwi' rik'in tijok ut ayuun, moko tz'aqal xcha'al ta li Evangelio, a'an b'an yal xtiqb'al aj chik li raqal 20 sa' xk'ab'a' Mk 9,29.

Xkab' resil li xkamik li Jesus

(Mk 9,30-32; Lk 9,43-45)

22Naq wotz yookeb' chi b'eek sa' xteepal Galilea, li Jesus kixye reheb' li xtzolom:

—Li K'ajolb'ej taaq'axtesiiq sa' ruq'eb' li winq; 23taakamsiiq ut sa' rox li kutan taawakliiq chi yo'yo.

Ut eb' a'an k'ajo' naq ke'raho'k xch'ool.

Li toj cho'q re li rochoch li Yos

24Naq ke'wulak Kafarnaúm, eb' laj titz'ol toj ke'nach'ok rik'in laj Pedro ut ke'xye re:

—Ma ink'a' naxk'e li toj laj tzolol eere?

25—Naxk'e, chan laj Pedro.

Ut naq kox'okaq laj Pedro sa' kab'l, li Jesus xb'enwa ki'aatinak ut kixye re:

—K'aru nakak'oxla, a Simón? Li x'awab'ejeb' li ruuchich'och' aniheb' aj ik'in neke'k'uluk li toj? Ma rik'ineb' laj ral ch'och' malaj rik'ineb' laj ab'l tenamit?

26—Rik'ineb' laj ab'l tenamit, chan laj Pedro.

Toja' naq li Jesus kixye re:

—Jo'kan naq eb' laj ral ch'och' ink'a' neke'xk'e li toj. 27Ab'anan, re naq ink'a' taaluktaaq xch'ooleb' qab'aan, ayu sa' palaw, kut li luchb'aq, ut li kar li taa'elq xb'enwa, chap, te li re ut aran taataw jun tumin: xok ut k'e reheb' cho'q qatoj.

Currently Selected:

Mt 17: QQC

Highlight

Copy