Mt 18

IX. XSEERAQ' LI JESUS CHIRIX LI KOMONIL (18,1-35)

Ani li q'axal nim xwankil

(Mk 9,33-37; Lk 9,46-48)

1Sa' li honal a'an eb' li xtzolom ke'nach'ok rik'in li Jesus ut ke'xye re:

—Ani pe' li q'axal nim xwankil sa' li xnimajwal wankilal li choxa?

2Li Jesus kixb'oq jun li ch'ina'al, kixk'e sa' xyiheb' 3ut kixye:

—Relik chi yaal ninye eere: wi ink'a' teejal eena'leb' ut wi ink'a' jo'kaqex li kok'al, ink'a' tex'ok sa' li xnimajwal wankilal li choxa. 4Jo'kan utan, ani tixkub'si rib' jo' li ch'ina'al a'in, a'an li q'axal nim xwankil sa' li xnimajwal wankilal li choxa.

K'aru naluktesink ch'oolej

(Mk 9,42-48; Lk 17,1-2)

5“Ani taak'uluq re junaq ch'ina'al jo' a'in sa' ink'ab'a', laa'in tinxk'ul. 6Ab'an ani taaluktesinq xch'ool junaq reheb' li kok' a'in li neke'paab'ank we, jwal us raj cho'q re naq taat'uyub'aaq chi xkux junaq xpekul li ke'leb' li neke'xsurisi eb' li b'uur, ut taasub'e'q sa' xchamal li palaw. 7Ra chaalel sa' xb'een li ruuchich'och' xb'aan li luktesink ch'oolej! Xb'aan naq tento taachalq li luktesink ch'oolej, ab'anan ra chaalel sa' xb'een li taachalq wi' li luktesink ch'oolej!

8“Wi laawuq' malaj laawoq nak'ehok aawe chi maakob'k, yok' ut tz'eq: us cho'q aawe naq tat-ok sa' li yu'am chi ch'otol laawuq' malaj laawoq chiru naq tatkute'q sa' li xam li ink'a' nachupk chi wanq xkab'ichal laawuq' malaj laawoq. 9Ut wi xsa' laawu nak'ehok aawe chi maakob'k, isi ut tz'eq: us cho'q aawe naq tat-ok sa' li yu'am chi junaq xsa' laawu chiru naq tatkute'q sa' li xxamlel li xb'alb'a chi wanq xkab'ichal xsa' laawu.

10“Chek'ehaq reetal, meetz'eqtaana junaq reheb' li kok' a'in, xb'aan naq ninye eere naq eb' li x'ánjel sa' choxa junelik neke'ril ru linchoxahil Yuwa'.#18,10 Li raqal 11: Xb'aan naq li K'ajolb'ej xk'ulunk chi xkolb'al li k'aru kisachk, moko tz'aqal xcha'al ta li Evangelio, a'an b'an yal xtiqb'al aj chik li raqal 10 sa' xk'ab'a' Lk 19,10.

Li karneer sachenaq

(Lk 15,3-7)

12“K'aru nekeye? Wi junaq winq wanq o'k'aalaq xkarneer ut taasachq ta junaq chiru, ma ink'a' tab'i' tixkanab' li b'eleelaju ro'k'aal chiru tzuul ut taaxik chi xsik'b'al li sachenaq? 13Ut wi tixtaw chaq, relik chi yaal ninye eere naq q'axal taasaho'q xch'ool rik'in li jun a'an chiruheb' li b'eleelaju ro'k'aal li ink'a' xe'sachk. 14Jo'kan ajwi' moko rajom ta xch'ool leechoxahil Yuwa' naq taasachq junaq reheb' a kok'eb' a'in.

Xtenq'ankil li namaakob'k

(Lk 17,3)

15“Wi laawas aawiitz'in taamaakob'q chawu, ayu ut, naq wanqex eejunes, chaq'usaq. Wi nakatrab'i, xakol laawas aawiitz'in. 16Ab'an wi ink'a' nakatrab'i, k'am chaq junaq malaj wiib'aq aawochb'een re naq rik'in raatineb' wiib' malaj oxib' chi testiiw chich'olaaq ru chixjunil.#18,16 Dt 19,15; 1 Ti 5,19. 17Ut wi ink'a' naraj rab'inkileb', ye re li Iklees; ab'an wi ink'a' ajwi' naraj rab'inkil li Iklees, chikanaaq chawu jo' li maak'a' xpaab'aal malaj jo' jun aj titz'ol toj.

18“Relik chi yaal ninye eere: chixjunil li teeb'ak' sa' ruuchich'och', b'ak'b'ooq ajwi' sa' choxa, ut chixjunil li teehit sa' ruuchich'och', hithooq ajwi' sa' choxa.

Tijok sa' komonil

19“Ninye ajwi' eere: wi wankeb' wiib'aq eere sa' ruuchich'och' te'xk'e rib' sa' aatin chirix yalaq k'aru te'xtz'aama, taa'uxq reheb' xb'aan linchoxahil Yuwa'. 20Xb'aan naq b'ar wankeb' wiib' oxib' ch'utch'uukeb' sa' ink'ab'a', aran wankin sa' xyiheb'”.

Xkuyb'al qamaak chiqib'il qib'

(Lk 17,4)

21Toja' naq laj Pedro kijilok chi xk'atq li Jesus ut kixye re:

—Qaawa', jar sut tento tinkuy xmaak li was wiitz'in li taamaakob'q chiwu? Ma toj wuqub' sut?

22Kichaq'ok li Jesus ut kixye re:

—Ink'a' ninye aawe naq wuqub' sut ajwi', lajeeb' xkaak'aal sut b'an chi wuqutq.

Jaljookil ru aatin chirix laj k'as li ink'a' kikuyuk

23“Jo'kan naq li xnimajwal wankilal li choxa chanchan jun li awab'ej li kiraj xpatz'b'al reheb' li xmoos li xk'aseb'. 24Naq kixtikib' xpatz'b'al, kik'ame'k chaq chiru jun li q'axal yo'oon li xk'as. 25Ab'an a'in maak'a' k'aru tixtoj wi'; jo'kan naq kixye li awab'ej naq chik'aymanq li winq a'an rochb'een li rixaqil, li ralal xk'ajol ut chixjunil li k'aru wank re, re xtojb'al li xk'as. 26Toja' naq li moosej a'an kixkut rib' chi roq li awab'ej, kixwiq'ib' rib', yo chi xyeeb'al: «Chinaakuy wan chik kach'inaq ut tintoj aawe chixjunil link'as». 27Kitoch'e'k xch'ool li awab'ej; jo'kan naq kirach'ab' chi xik ut kixsach reetalil li xk'as.

28“Naq ki'elk li moosej a'an, kixk'ul jun rech moosil li kach'in ajwi' li xk'as wank rik'in, ut kixchap chi xkux, yo chi xyatz'b'al: «Toj laak'as», chan re. 29Ut li rech moosil kixkut rib' chi roq, kirelaji ru: «Chinaakuy wan chik kach'inaq ut tintoj aawe chixjunil», chan. 30A'ut a'an ink'a' kiraj, koho b'an ut koxk'e sa' tz'alam toj reetal tixtoj li xk'as.

31“Naq eb' li rech moosil ke'ril li xk'ulmank, k'ajo' naq ke'raho'k xch'ool; koheb' ut koxe'xye re li awab'ej chixjunil li xk'ulmank. 32Toja' naq li moosej a'an kib'oqe'k xb'aan li awab'ej ut kiyehe'k re: «At aj maa'us aj k'anjel, chixjunil laak'as xinsach reetalil xb'aan naq xawelaji chiwu. 33Ma ink'a' raj xruuk naq xatoq'ob'a ru laawech moosil, jo' naq xintoq'ob'a aawu laa'in?». 34Ut k'ajo' naq kipo'k li awab'ej: kixq'axtesi sa' ruq'eb' laj rahob'tesinel toj reetal tixtoj chixjunil li xk'as.

35“Jo'kan ajwi' tixb'aanu eere linchoxahil Yuwa', wi ink'a' teekuy xmaakeb' leeras eeriitz'in chi anchal eech'ool chejunjunqal”, chan li Jesus.

Currently Selected:

Mt 18: QQC

Highlight

Copy