Mt 10

V. XTZOLB'ALEB' LI APÓSTOL (10,1—11,1)

Xtaqlankileb' li Kab'laju

(Mk 3,13-19; Lk 6,12-16)

1Li Jesus kixb'oqeb' li xkab'laju chi tzolom ut kixk'eheb' xwankil sa' xb'eeneb' li tz'ajn aj musiq'ej re naq te'risiheb', jo' ajwi' re naq te'xk'irtasi chixjunil li yajel ut chixjunil li rahilal.

2Li xk'ab'a'eb' li kab'laju chi apóstol a'aneb' a'in: xb'een, laj Simón, aj Pedro nayeemank re, ut laj Andrés li riitz'in; laj Santiago, ralal laj Sebedeo, jo'wi' laj Jwan li riitz'in; 3laj Felipe ut laj Bartolomé; laj Tomás ut laj Mateo laj titz'ol toj; laj Santiago, ralal laj Alfeo, ut laj Tadeo; 4laj Simón aj Kanahán ut laj Judas Iskariote, a' li kiq'axtesink re.

5Eb' li kab'laju a'in ke'taqlaak xb'aan li Jesus, naq ak ke'chaq'rab'iik chi jo'ka'in: “Mexxik sa' xna'ajeb' li jalaneb' xpaab'aal chi moko tex'ok sa' xtenamiteb' laj Samaria. 6Us b'an texxik rik'ineb' li karneer sachenaqeb' sa' li tenamit Israel. 7Ut naq yooqex chi xik, puktesiiq resil naq li xnimajwal wankilal li choxa ak xnach'ok chaq. 8Chek'irtasiheb' li yaj, chewaklesi chi yo'yo eb' li kamenaq, chek'irtasiheb' li saqlep rixeb' ut cherisiheb' li maa'us aj musiq'ej. Chi maatan xek'ul, ut chi maatan ajwi' teek'e.

9“Mexk'amok oor, chi moko plaat, chi moko eetumin sa' xk'aamal eesa'. 10Meek'am xna'aj leewa re leeb'e, chi moko ka'kab'aq leeraq', chi moko eexaab', chi moko eexuq', xb'aan naq laj k'anjel xk'ulub' naq taak'ehe'q xtzekemq.

11“Sa' li tenamit malaj k'aleb'aal toxex'okaq wi', patz'omaq aran ani xk'ulub' ula'aniik ut chexkanaaq aran toj reetal tex'elq chaq. 12Ut naq toxex'okaq sa' li kab'l, chek'e xsahilaleb' xch'ool. 13Wi li junkab'al xk'ulub' ula'aniik, chikub'eeq sa' xb'een leetuqtuukil usilal; ab'an, wi ink'a' xk'ulub' ula'aniik, leetuqtuukil usilal taasutq'iiq chaq eerik'in. 14Ut wi junaq ink'a' texk'ul chi moko taarab'i leeraatin, naq tex'elq sa' li kab'l a'an malaj tenamit, chechiq'aq li pojtz' wank cheroq. 15Relik chi yaal ninye eere: sa' xkutankil li raqb'a aatin kotzkooq b'ayaq li rahilal tixk'ul Sodoom ut Gomoor chiru li tixk'ul li tenamit a'an.

Resil li rahilal chaalel sa' xb'eeneb' li Kab'laju

(Lk 10,3; Mk 13,9-13; Lk 21,12-19)

16“Chek'e reetal, laa'in texintaqla jo'eb' li karneer sa' xyanqeb' laj xojb'. Chiwanq b'i' eena'leb' jo'kaqex eb' li k'anti', ut tuulanaqex jo'kaqex eb' li mukuy. 17Chekolaq eerib' chiruheb' li tenamit, xb'aan naq texq'axtesiiq sa' ruq'eb' li xninqal ru aj raqol aatin ut texrapje'q sa'eb' li xch'utleb'aal kab'l. 18Texk'ame'q chiruheb' li awab'ej ut eb' li ninqeb' xwankil sa' ink'ab'a' re naq teech'olob' li yaal chiruheb' jo'wi' chiruheb' li maak'a'eb' xpaab'aal. 19Ab'an, naq texq'axtesiiq, mixik eech'ool chi xk'oxlankil chanru malaj k'aru teeye, xb'aan naq taak'ehe'q eere sa' li honal a'an k'aru teeye. 20Moko laa'ex ta tex'aatinaq, a' b'an li xMusiq' leeYuwa' taa'aatinaq chi xtz'uumal eere.

21“Li asb'ej tixq'axtesi chi kamsiik li riitz'in, li yuwa'b'ej a' li ralal; ut eb' li alalb'ej te'wakliiq chi xkamsinkil xna' xyuwa'. 22Chixjunileb' xik' te'iloq eere sa' ink'ab'a'; ab'an li tixk'e xch'ool toj sa' roso'jik, a'an taakole'q. 23Naq te'raj eerahob'tesinkil sa' li tenamit a'in, elelinqex ut ayuqex sa' jalan chik; ut wi aran te'raj ajwi' xb'aanunkil eere chi jo'kan, ayuqex sa' jalan chik. Relik chi yaal ninye eere: maji'aq teechoy xb'eeninkileb' li tenamit sa' xsutam Israel naq tol'elq li K'ajolb'ej.#10,23 Li aatin a'in kitz'aqlok ru naq kisache'k li tenamit Jerusalén xb'aaneb' laj Roma sa' li chihab' 70 (cf. 16,28; 24).

24“Li toj yo chi tzolok moko naxq'ax ta xwankil laj tzolol re, chi moko laj k'anjel naxq'ax xwankil laj eechal re. 25Tz'aqalaq cho'q re li toj yo chi tzolok naq jo'aq laj tzolol re, ut laj k'anjel jo'aq laj eechal re. Wi aj Beelsebul kiyehe'k re laj eechal kab'l, ma toja' ta chik li wankeb' sa' li rochoch?

Mexxiwak

(Lk 12,2-7)

26“Jo'kan utan mexxiwak chiruheb', xb'aan naq maak'a' wank chi moymo li ink'a' ta taa'elq chi kutankil, chi moko wank k'aru chi muqmu li ink'a' ta taanawmanq. 27Li k'aru ninye eere sa' aak'ab', cheye chi kutankil; ut li nekerab'i chi hasb'anb'il sa' eexik, chepuktesi resil sa' xb'een kab'l. 28Meexiwaheb' ru li neke'kamsink re li tz'ejwalej, ab'an ink'a' neke'ruhank xkamsinkil li aanmej; chexiwa b'an ru li ani wank xwankil chi xsachb'al sa' xb'alb'a li aanmej ut li tz'ejwalej.

29“Ma ink'a' tab'i' nak'ayimank wiib'aq li kok' xul chi jun sentaaw? Ut maajun reheb' taat'ane'q sa' ch'och' chi ink'a' ta traj leeYuwa'. 30Ut laa'ex, toj ajlanb'ileb' chixjunil li rismal leejolom! 31Mexxiwak b'i': q'axal terto eetz'aq chiru naab'aleb' li kok' xul.

32“Yalaq ani taayehoq chiruheb' li tenamit naq naxnaw wu, tinye ajwi' laa'in naq ninnaw ru chiru linchoxahil Yuwa'. 33Ab'an li taatz'eqtaananq we chiruheb' li tenamit, tintz'eqtaana ajwi' laa'in chiru linchoxahil Yuwa'.

Xraqik li xtzolb'aleb' li Kab'laju

(Lk 12,51-53; 14,26-27; Mk 9,37, 41)

34“Meek'oxla naq xinchalk ta sa' ruuchich'och' chi xk'eeb'al li tuqtuukil usilal. Ink'a' xinchalk chi xk'eeb'al li tuqtuukilal, a'an b'an li ch'iich'. 35Xb'aan naq xinchalk chi xjachb'al li winq rik'in li xyuwa', li ko'b'ej rik'in li xna' ut li alib'ej rik'in li alib'om re; 36ut eb' li xik' te'iloq re li junjunq, a'anaqeb' ajwi' li wankeb' sa' li rochoch.#10,36 Mi 7,6.

37“Li q'axal naxra li xna' malaj li xyuwa' chiwu laa'in, a'an moko xk'ulub' ta wank cho'q intzolom. Ut ani q'axal naxra li ralal xk'ajol chiwu laa'in, a'an moko xk'ulub' ta wank cho'q intzolom. 38Ani ink'a' naxchap li xkrus ut tinxtaaqe, a'an moko xk'ulub' ta wank cho'q intzolom. 39Ani naraj xkolb'al li xyu'am, taasachq chiru; a'ut li tixsach li xyu'am sa' ink'ab'a', a'an tixtaw li junelik yu'am.

40“Ani nak'uluk eere, laa'in nikinxk'ul; ut li nak'uluk we, naxk'ul li kitaqlank chaq we. 41Ani taak'uluq re junaq propeet xb'aan naq propeet, xq'ajkamunkil propeet tixk'ul. Ut ani taak'uluq re junaq tiik xch'ool xb'aan naq tiik xch'ool, xq'ajkamunkil tiik xch'ool tixk'ul. 42Ani taak'ehoq jun sek'aq chi kela' re junaq li kok'eb' a'in xb'aan naq intzolom, relik chi yaal ninye eere naq ink'a' taakanaaq chi maak'a' ta xq'ajkamunkil”.

Currently Selected:

Mt 10: QQC

Highlight

Copy