Mt 9

Kik'irtasiik jun li sik

(Mk 2,1-12; Lk 5,17-26)

1Naq kitaqe'k li Jesus sa' jun li jukub', kinume'k junpak'al li palaw ut kiwulak sa' li xtenamit. 2Tikto ke'xk'am chaq rik'in li Jesus jun li sik, yokyo sa' xch'aat. Ut naq kiril li xpaab'aaleb', kixye re li sik:

—Kawaq aach'ool, at walal, kuyb'il sachb'il chik laamaak.

3Toja' naq wankeb' aj tz'iib' ke'xye sa' xch'ooleb': “A'in yo chi xmajewankil li Yos”. 4Ab'an li Jesus naxnaw li xk'a'uxeb'; jo'kan naq kixye reheb':

—K'a'ut naq nekek'oxla li ink'a' us sa' leech'ool? 5B'ar wank li ink'a' ch'a'aj xyeeb'al: «Kuyb'il sachb'il chik laamaak», malaj: «Waklin ut b'een»? 6Ab'anan re teenaw naq li K'ajolb'ej wank xwankil sa' ruuchich'och' re kuyuk sachok maak -kixye re li sik: Waklin, xok laach'aat ut ayu sa' laawochoch.

7Kiwakliik li sik ut koho sa' rochoch. 8Naq ke'ril a'in li tenamit, ke'xiwak ut ke'xnima xloq'al li Yos li kik'ehok li nimla wankilal a'in reheb' li winq.

Kib'oqe'k laj Mateo

(Mk 2,13-17; Lk 5,27-32)

9Naq yo chi numeek li Jesus aran, kiril jun li winq k'ojk'o sa' titz'leb'aal toj, aj Mateo xk'ab'a', ut kixye re:

—Taaqehin.

Ut laj Mateo kixaqliik ut kixtaaqe.

10Naq wan chaq li Jesus sa' meex sa' rochoch laj Mateo, naab'aleb' laj titz'ol toj ut eb' laj maak ke'wulak aran, wankeb' sa' meex rochb'een, rochb'eeneb' ajwi' li xtzolom. 11Naq eb' laj Pariseey ke'ril a'an, ke'xye reheb' li xtzolom li Jesus:

—K'a'ut naq laj tzolol eere nawa'ak rik'ineb' laj titz'ol toj ut eb' laj maak?

12Li Jesus kirab'i a'an ut kixye:

—Ink'a' neke'raj aj b'anonel li kaweb', a'eb' b'an li yaj neke'ajok re. 13Ayuqex chi xtzolb'al xyaalal a'in: «Uxtaanank nawaj, ink'a' mayejak».#9,13 Os 6,6. Xb'aan naq ink'a' xinchalk chi xb'oqb'aleb' li tiikeb' xch'ool, a'eb' b'an laj maak.

Li Jesus kixch'olob' xyaalal li ayuun

(Mk 2,18-22; Lk 5,33-39)

14Toja' naq eb' li xtzolom laj Jwan ke'wulak rik'in li Jesus ut ke'xpatz' re:

—K'a'ut naq laa'o ut eb' laj pariseey nokoo'ayuunik, ut eb' laatzolom laa'at ink'a' neke'ayuunik?

15Kixye li Jesus reheb':

—Ma truuq tab'i' te'wanq chi raheb' sa' xch'ool li b'oqb'ileb' rik'in sumlaak wi toj wank li b'eelomej rik'ineb'? Ab'an taawulaq xkutankil naq taamaq'e'q li b'eelomej chiruheb': toja' naq te'ayuuniq.

16“Maajun nak'ehok junaq ak' xiitil chiru li q'eel t'ikr, xb'aan naq li ak' xiitil tixq'uy li aq'ej ut taanimanq li xq'ichilal. 17Chi moko nak'eemank li ak' b'iin sa' q'eel tz'uum-kuk. Wi ta jo'kan, te'puk'e'q li tz'uum-kuk, taahoye'q li b'iin ut eb' li tz'uum-kuk te'oso'q. Li ak' b'iin nak'eemank sa' ak' tz'uum-kuk, ut chi jo'kan neke'kole'k chi xkab'ichaleb'”.

Li xrab'in laj Jairo ut li ixq li kixch'e' re li raq' li Jesus

(Mk 5,21-43; Lk 8,40-56)

18Naq yo li Jesus chi xyeeb'al a'an reheb', kiwulak jun aj jolominel reheb' laj Judiiy, kiwiq'laak ut kixhupub' rib' chiru, ut kixye re:

—Linrab'in toje' xkamk. K'e chaq laawuq' sa' xb'een ut taayo'laaq wi' chik.

19Kixaqliik li Jesus ut rochb'eeneb' li xtzolom koho chirix li winq a'an. 20Toja' naq jun li ixq yaj xb'aan naq nakub'eek xkik'el chalen chaq kab'laju chihab', kinach'ok chirix li Jesus ut kixch'e' re li raq', 21xb'aan naq kixye sa' xch'ool: “Us ta ka'ajwi' tinch'e' li raq', tinkole'q”. 22Ab'an li Jesus kixsutq'isi rib', kiril li ixq ut kixye re:

—Kawaq aach'ool, at inrab'in, laapaab'aal xkolok aawe. Ut chalen sa' li honal a'an kik'iraak li ixq.

23Naq kiwulak li Jesus sa' rochoch li xjolomileb' laj Judiiy, kirileb' laj xolb' ut li tenamit neke'xpoqoqi rib'eb', ut kixye reheb':

24—Elenqex, xb'aan naq li ixqa'al moko kamenaq ta, yal yo chi wark.

Ut eb' a'an ke'ok chi xse'enkil. 25A'ut naq ak xe'isiik li tenamit, ki'ok li Jesus, kixchap chi ruq' li ixqa'al, ut a'an ki'ajk ru. 26Ut ki'elk resilal a'in sa' chixjunil li na'ajej a'an.

Ke'k'irtasiik wiib' li mutz'

27Naq ki'elk li Jesus aran, wiib'eb' li mutz' ke'taaqenk re ut japjookeb' re chi xyeeb'al:

—At ralal laj David, chawuxtaana qu!

28Naq kiwulak li Jesus sa' kab'l, eb' li mutz' ke'jilok chi xk'atq:

—Ma nekepaab' naq tinruhanq chi xb'aanunkil a'in? chan li Jesus reheb'.

Ke'chaq'ok eb' a'an ut ke'xye:

—Hehe', Qaawa'.

29Toja' naq kixch'e' xsa' ruheb' ut kixye:

—Chi'uxq eere jo' chanru leepaab'ahom.

30Ut kitehonk li rilob'aaleb'. Toja' naq li Jesus kixchaq'rab'iheb' chi us:

—Ab'ihomaq chi us, maa'ani chinawoq re, chan.

31A'ut eb' a'an, ka'ajwi' ke'elk aran, ke'ok chi xpuktesinkil resil sa' chixjunil li na'ajej a'an.

Kik'irtasiik jun li mem

32Tojo' ajwi' yookeb' chi elk eb' li mutz' naq kik'ame'k chaq rik'in li Jesus jun li winq mem eechaninb'il xb'aan laj tza. 33Naq ki'isiik laj tza, ki'ok chi aatinak li mem, ut eb' li tenamit ke'sachk xch'ool chi rilb'al:

—Maajun wa x'ilmank a'in arin Israel, chankeb'.

34Ab'anan eb' laj Pariseey ke'xye:

—Rik'in xwankilal li xyuwa'ileb' laj tza narisiheb' laj tza.

Li Jesus naxtoq'ob'a ruheb' li tenamit

35Li Jesus kixb'eeni chixjunileb' li tenamit ut k'aleb'aal, yo chi xtzolb'aleb' sa'eb' li xch'utleb'aal kab'l. Kixpuktesi li xchaab'il esil li xnimajwal awab'ejihom li Yos ut kixk'irtasi chixjunil li rahilal ut chixjunil li yajel. 36Naq kirileb' li k'iila tenamit, kixtoq'ob'a ruheb' xb'aan naq ch'i'ch'i'inb'ileb' ut cha'chookeb', jo'keb' li karneer maak'a' aj ilol reheb'. 37Toja' naq kixye reheb' li xtzolom:

—Li q'olom naab'al, a'ut eb' laj k'anjel ink'a' k'iheb'. 38Chetz'aama b'i' chiru laj eechal q'olom naq xtaqlahaqeb' chaq aj k'anjel sa' li xq'olom.

Currently Selected:

Mt 9: QQC

Highlight

Copy