Mt 11

1Naq kiraqe'k li Jesus chi xchaq'rab'inkileb' li xkab'laju chi tzolom, ki'elk aran ut koho chi xpuktesinkil li Chaab'il Esilal jo'wi' chi xtzolb'aleb' li tenamit chi xsutam Judea.

VI. XB'AANUHOM LI JESUS (11,2—12,50)

Eb' li xtaql laj Jwan

(Lk 7,18-35)

2Naq wan chaq laj Jwan sa' tz'alam, kirab'i resil li xninqal xb'aanuhom li Kriist. Toja' naq kixtaqlaheb' li xtzolom chi xyeeb'al re: 3“Ma laa'at li tento taak'ulunq, malaj taaqoyb'eni jalan chik?”.

4Kichaq'ok li Jesus ut kixye reheb': “Ayuqex ut yehomaq re laj Jwan li nalajeerab'i ut nalajeeril. 5Eb' li mutz' neke'ilok ut eb' li yeq neke'b'eek, eb' li saqlep rix neke'k'irtasiik ut eb' li tz'ap xik neke'ab'ink, eb' li kamenaq neke'ajk ru ut eb' li neb'a' neke'rab'i li Chaab'il Esilal. 6Us xaq re li ink'a' taaluktaaq xch'ool inb'aan”.

7Naq yookeb' chi xik eb' a'an, li Jesus ki'ok chi raatinankileb' li tenamit chirix laj Jwan: “K'aru koxeeril chaq sa' li chaqich'och'? Ma jun li kaxlan'aj na'eek'asiik xb'aan li iq'? 8K'a' put ru koxeeril chaq? Ma jun li winq tiqto rik'in chaab'il aq'ej? Eb' li tiqtookeb' chi chaab'il, sa' rochocheb' li awab'ej wankeb'. 9K'aru kex'elk chi rilb'al? Ma junaq propeet? Yaal naq jo'kan; ut ninye eere naq a'an naxq'ax chik ru propeet. 10A'an a'in li tz'iib'anb'il resil sa' li Santil Hu:

«K'e reetal, tintaqla lintaql chawu

li taatuqub'anq re li b'e chawu».#11,10 Mal 3,1.

11Relik chi yaal ninye eere naq maajun reheb' li yo'lajenaq rik'in ixq naxq'ax ru laj Jwan aj kub'sihomha'. Ab'an li q'axal kach'in sa' li xnimajwal wankilal li choxa, a'an nim chik chiru a'an.

12“Chalen chaq xk'ulunik laj Jwan aj kub'sihomha' toj anaqwan, li xnimajwal wankilal li choxa natawmank rik'in li yalok q'e; ut eb' li kaweb' xch'ool, a'aneb' neke'eechanink re: 13xb'aan naq chixjunileb' li Propeet ut li Chaq'rab' toj rik'in laj Jwan xe'xye resil li chaalel. 14Ut wi teeraj xk'ulub'ankil, a'in laj Elías, a' li tento taak'ulunq. 15Ani wank xxik, chi'ab'inq.

Li Jesus naraqok aatin sa' xb'een li xtenamit

(Lk 7,31-35)

16“Ani ta raj tinjuntaq'eetaheb' wi' li tenamit a'in? Chanchaneb' li kok'al chunchuukeb' sa'eb' li k'ayiil, neke'xjap re chi xyeeb'al reheb' li junch'ol chik: 17«Xooxolb'ik cho'q eere ut ink'a' xexxajok; xqab'icha rahil b'ich ut ink'a' xexyaab'ak». 18Xk'ulunk laj Jwan li ink'a' nawa'ak chi moko na'uk'ak, ut xe'xye: «Aj tza wank rik'in». 19Xk'ulunk li K'ajolb'ej li nawa'ak na'uk'ak, ut neke'xye: «Wahi' jun li winq junes wa'ak, junes uk'ak naxb'aanu, ramiiweb' laj titz'ol toj ut eb' laj maak», chankeb'. Ab'anan xk'utunk xyaalalil ut li xchaab'ilal li choxahil na'leb' rik'ineb' li xb'aanuhom”.#11,19 Eb' laj Judiiy ink'a' neke'xk'ulub'a li Raatin li Yos puktesinb'il xb'aan li Jesus. Ab'an eb' li xninqal xb'aanuhom li Yos neke'xk'ut naq tz'aqal yaal li k'uub'k'u chaq xb'aan li xnimal choxahil na'leb'.

Ra chaalel sa' xb'eeneb' li tenamit li ink'a' ke'xxooto xmaakeb'

(Lk 10,13-15)

20Toja' naq li Jesus ki'ok chi xq'usb'aleb' chi kaw li tenamit b'arwi' kixb'aanu naab'al sachb'ach'oolej, xb'aan naq ink'a' ke'xyot' xch'ool, ink'a' ke'xjal xk'a'uxl. Kixye reheb' chi jo'ka'in: 21“Ra chaalel sa' aab'een, at Korasín! Ra chaalel sa' aab'een, at Betsaida! Xb'aan naq wi ta aran Tiro ut Sidón kilaj'uxmank li sachb'ach'oolej li xe'uxk sa' eeyanq, ak junxil raj neke'xjal xk'a'uxl, xe'xtiqib' raj rib' rik'in q'es ruhil t'ikr ut xe'xk'e raj cha sa' xb'eeneb'. 22A'ut laa'in ninye eere: kotzko b'ayaq li rahilal te'xk'ul Tiro ut Sidón chiru li teek'ul laa'ex sa' xkutankil li raqb'a aatin. 23Ut laa'at, Kafarnaúm, ma toj sa' choxa tab'i' tatwaklesiiq? Tatsob'e'q b'an toj sa' xb'alb'a!#11,23 Is 14,13-15. Xb'aan naq wi ta Sodoom kilaj'uxmank li sachb'ach'oolej li xe'uxk aawik'in, toj wank raj anaqwan. 24Ab'anan laa'in ninye eere: kotzko b'ayaq li rahilal te'xk'ul eb' laj Sodoom chiru li taak'ul laa'at sa' xkutankil li raqb'a aatin”.

Li Chaab'il Esilal k'eeb'il chi kutankil reheb' li q'uneb' xch'ool

(Lk 10,21-22)

25Sa'eb' li kutan a'an li Jesus ki'ok chi aatinak ut kixye: “Ninloq'on aawu, at inYuwa', laa'at aj eechal re li choxach'och', xb'aan naq xamuq a'in chiruheb' li wankeb' xna'leb' jo'wi' li seeb'eb' xch'ool, ut xak'ut chiruheb' li q'uneb' xch'ool. 26Yaal, at inYuwa', xb'aan naq jo'kan xwulak chawu.

27“Chixjunil q'axtesinb'il sa' wuq' xb'aan linYuwa', ut maa'ani nanawok ru li K'ajolb'ej, ka'ajwi' li Yuwa'b'ej; ut maa'ani nanawok ru li Yuwa'b'ej, ka'ajwi' li K'ajolb'ej ut eb' li taaraj wi' xk'utb'esinkil.

Chalqex wik'in

28“Chalqex wik'in chejunilex li lub'luukex ut tawajenaqex xb'aan leeriiq, ut laa'in texinhiltasi. 29Chek'ulub'a linchaq'rab' nink'e sa' eeb'een ut tzolomaq eerib' wik'in, xb'aan naq tuulanin ut q'un linch'ool, ut sa texwanq. 30Xb'aan naq li k'aru nekexintaqla wi' moko ra ta, ut li nink'e cheriiqani moko aal ta”.#11,28-30 Cf. Is 30,15; Jr 6,16; Eklo 6,24-30; 1 Jn 5,3.

Currently Selected:

Mt 11: QQC

Highlight

Copy