Mt 12

Li K'ajolb'ej a'an aj eechal re li sábado

(Mk 2,23-28; Lk 6,1-5)

1Sa'eb' li kutan a'an, sa' jun li sábado, kinume'k li Jesus sa'eb' li awimq. Ke'tz'okaak eb' li xtzolom ut ke'ok chi xch'otb'al ut chi xk'uxb'al ru li triiw. 2Ut naq ke'ril a'an eb' laj Pariseey, ke'xye re:

—Chak'e reetal, eb' laatzolom yookeb' chi xb'aanunkil li ink'a' naru xb'aanunkil sa' sábado.#12,2 Cf. Ex 34,21.

3Kichaq'ok li Jesus ut kixye reheb':

—Ma ink'a' eerilom sa' li Santil Hu k'aru kixb'aanu laj David, naq kitz'okaak a'an ut eb' li rochb'een, 4chanru naq ki'ok sa' rochoch li Yos ut ke'xtzeka li mayejanb'il wa li ink'a' naru tixwa' a'an chi moko eb' li rochb'een, ka'ajwi' eb' laj tij?#12,3-4 1 S 21,2-7; Lv 24,5-9. 5Malaj ink'a' eerilom sa' li xChaq'rab' laj Moisés naq eb' laj tij maak'a' xmaakeb' naq ink'a' neke'roxloq'i li hilob'aal kutan rik'in k'anjelak sa' sábado sa' rochoch li Yos? 6A'ut laa'in ninye eere naq li wank arin jwal nim xwankil chiru li rochoch li Yos. 7Wi ta xetaw ru li aatin a'in: «Uxtaanank nawaj, ink'a' mayejak»,#12,7 Os 6,6. ink'a' raj neketeneb' maak sa' xb'eeneb' li maak'a'eb' xmaak. 8Xb'aan naq li K'ajolb'ej a'an aj eechal re li sábado.

Li winq chaqi ruq'

(Mk 3,1-6; Lk 6,6-11)

9Naq laj Jesus ki'elk chaq aran, koho sa' li xch'utleb'aaleb'. 10Aran wank jun li winq chaqi jun li ruq'. Ut ke'xpatz' re li Jesus yal re xjitb'al:

—Ma us k'irtasink sa' li sábado?

11Ut a'an kixye reheb':

—Wi junaq eere laa'ex wank ta ka'ajwi' junaq xkarneer, wi taat'ane'q sa' jul sa' sábado, ma ink'a' tab'i' toxrisi chaq? 12Ma ink'a' tab'i' numtajenaq xloq'al jun li winq chiru junaq karneer? Jo'kan naq naru xb'aanunkil li us sa' sábado.

13Toja' naq kixye re li winq:

—Ye' laawuq'.

A'an kixye', ut li ruq' kik'iraak kama' li jun chik. 14Naq ke'elk aran eb' laj Pariseey, ke'xch'utub' rib' chi k'uub'ank chirix li Jesus re xsachb'al li xyu'am.

Li Jesus a'an laj k'anjel sik'b'il ru xb'aan li Yos

(Mk 3,7-12)

15Ab'an li Jesus, naq kixnaw a'in, ki'elk aran. Ut kitaaqeek xb'aaneb' naab'al li tenamit, ut kixk'irtasiheb' chixjunil. 16Kixq'useb' chi kaw naq ink'a' te'xye chi kutankil, 17re naq chitz'aqloq ru li xyehom li propeet Isaías:

18“A'an a'in laj k'anjel chiwu li sik'b'il ru inb'aan;

a'an ninra ut rik'in a'an nasaho'k linch'ool.

Tink'e linMusiq' sa' xb'een

ut tixye resil li raqb'a aatin reheb' li tenamit.

19Ink'a' taawech'inq chi moko tixjap re;

maa'ani taa'ab'inq re xyaab' xkux sa' b'e.

20Ink'a' tixtoq li kaxlan'aj ak jorol,

chi moko tixchup xsaqenkil li noq' toj nab'utz'utz'nak,

toj reetal tixxaqab' xwankil li tiikilal chi junajwa.

21Ut rik'in a'an xaqxooq royb'enihomeb' li tenamit”.#12,17-21 Is 42,1-4.

Li Jesus ut laj Beelsebul

(Mk 3,20-30; Lk 11,14-23; 12,10)

22Toja' naq kik'ame'k rik'in li Jesus jun li winq eechaninb'il xb'aan laj tza, mutz' ut mem. Ut li Jesus kixk'irtasi: li winq a'an ki'ok chi aatinak ut chi ilok. 23K'ajo' naq ke'sachk xch'ool chixjunileb' li tenamit, yookeb' chi xyeeb'al: “Malaj a'an ta a'in li Ralal laj David?”

24Ab'anan eb' laj Pariseey, naq ke'rab'i a'an, ke'xye: “Ch'olch'o naq a'in narisiheb' laj tza rik'in xwankilal laj Beelsebul, li xyuwa'ileb' laj tza”.

25A'ut li Jesus naxnaw li xk'a'uxeb', jo'kan naq kixye reheb': “Wi li x'awab'ejihom junaq nim xwankil jachjo chirib'il rib', taa'oso'q. Ut chixjunil li tenamit malaj junkab'al jachjo chirib'il rib', ink'a' truuq taakanaaq chi xaqxo. 26Wi laj tza narisi laj tza, a'an jachjo chirib'il rib': chan put ru naq xaqxooq li xwankilal chi jo'kanan? 27Wi ut laa'in sa' xk'ab'a' laj Beelsebul nawisiheb' laj tza, ani sa' aj k'ab'a' neke'isink maa'us aj musiq'ej leeralal eek'ajol? Jo'kan naq eb' a'an ajwi' te'raqoq aatin sa' eeb'een. 28Ab'an, wi rik'in xMusiq' li Yos nawisiheb' laj tza, naraj naxye naq li xnimajwal awab'ejihom li Yos xol'elq eerik'in.

29“Chanru naq taa'ok junaq sa' rochoch li winq kaw rib' re xmaq'b'al li k'aru wank re, wi ink'a' ta xb'enwa tixb'ak' li kaw rib'? Toja' naq tixjuk'i xsa' li rochoch.

30“Ani ink'a' na'okenk chiwix, xik' nikinril; ut li ink'a' naxokok wochb'een, pajink naxb'aanu.

31“Jo'kan naq ninye eere: yalaq k'aru li maak ut majewank taakuymanq taasachmanq chiruheb' li winq, ab'an li xmajewankil li Musiq'ej ink'a' taakuymanq taasachmanq. 32Ut li ani taayehoq junaq aatin re xxik'b'al rilb'al li K'ajolb'ej, taakuymanq taasachmanq li xmaak; ab'an li tixb'aanu chi jo'kan re xxik'b'al rilb'al li Santil Musiq'ej, ink'a' taakuymanq taasachmanq li xmaak sa' li ruuchich'och' a'in, chi moko sa' li toj chaalel.#12,32 Li Yos naxkuy naxsach xmaakeb' chixjunileb'. Ab'anan wi junaq kristiyan ink'a' naraj xpaab'ankil li xb'aanuhom li Santil Musiq'ej, a'an xjunes rib' naq narisi rib' sa' xrahom li Yos. Us ta yeechi'inb'il re li xnimal xkuyum li Qaawa', ab'an a'an ink'a' naraj naq taakuye'q xmaak: a'an chanchan junaq okeb'aal tz'aptz'o, li naxram li kutan saqenk chi ok chisa'.

Li che' ut li ru

(Lk 6,43-45)

33“Wi chaab'il li che', chaab'il ajwi' li ru tixk'e; ut wi ink'a' us li che', ink'a' ajwi' us li ru tixk'e: xb'aan naq rik'in li naruuchin, li che' nanawe'k ru. 34Ex ral q'anb'olay, chan ta wi' ru naq teeye chaab'il aatin, naq moko usex ta? Xb'aan naq rik'in li xnumnujenaqil li ch'oolej na'aatinak li xtz'uumal re li winq. 35Li chaab'il winq narisi chaq li us sa' li xch'ool xb'aan naq li chaab'ilal wank rik'in; ut li ink'a' usil winq narisi chaq li ink'a' us sa' li xch'ool xb'aan naq li maa'usilal wank rik'in. 36Ninye eere naq chixjunil li aatin tixye li junjunq chi maak'a' rajb'al, toxq'axtesi sa' xkutankil li raqb'a aatin: 37xb'aan naq sa' xk'ab'a'eb' laawaatin tatyehe'q naq tiik laach'ool, ut xb'aaneb' laawaatin taateneb'aaq rahilal sa' aab'een”.

Li reetalil laj Jonás

(Mk 8,12; Lk 11,29-32)

38Wankeb' aj tz'iib' ut aj Pariseey, naq ke'rab'i a'in, ke'xye re:

—At Tzolonel, naqaj taak'ut chiqu junaq eetalil, chankeb'.

39Ab'an li Jesus kixchaq'b'eheb' ut kixye:

—Jun tenamit ink'a' us xch'ool ut aj muxunel naxsik' junaq eetalil; ab'an maajun eetalil taak'ehe'q reheb', ka'ajwi' li reetalil li propeet Jonás.#12,39 Li Jesus naxye resil li xwaklijik wi' chik chi yo'yo: a'an li xnimal ru eetalil taak'eemanq. 40Jo' naq kiwank chaq laj Jonás sa' xsa' li nimla kar oxib' kutan ut oxib' q'oqyink,#12,40 Jon 2,1. jo'kan ajwi' taawanq li K'ajolb'ej sa' xch'ool li ch'och' oxib' kutan ut oxib' q'oqyink. 41Eb' laj Nínive te'wakliiq chaq sa' xkutankil li raqb'a aatin rochb'eeneb' li tenamit a'in ut te'xteneb' tojb'amaak sa' xb'eeneb', xb'aan naq eb' laj Nínive ke'xyot' xch'ool ke'xjal xk'a'uxl naq ke'rab'i li xpuktesihom laj Jonás; ut arin wank li naxq'ax ru laj Jonás.

42“Li xna' li tenamit li wank sa' rokeb'l iq' taawakliiq chaq sa' xkutankil li raqb'a aatin rochb'eeneb' li tenamit a'in ut tixteneb' tojb'amaak sa' xb'eeneb', xb'aan naq a'an kichalk chaq toj sa' xmaril li ruuchich'och' re rab'inkil li xnimal xk'a'uxl laj Salomón;#12,42 A'an li xna'eb' li tenamit Sabá (cf. 1 R 10,1-10; 2 Kr 9,1-12). ut arin wank li naxq'ax ru laj Salomón.

Xiwajel li xsutq'ijik laj tza

(Lk 11,24-26)

43“Naq na'elk li tz'ajn aj musiq'ej rik'in jun li winq, nalajnume'k sa'eb' li chaqi na'ajej, yo xsik'b'al b'ar taahilanq, ab'an ink'a' naxtaw. 44Toja' naq naxye sa' xch'ool: «Tinsutq'iiq wi' chik sa' li wochoch li xin'elk wi' chaq». Ut sa' xwulajik, yamyo, mesunb'il ut uutz'u'ujinb'il chik li xna'aj naq toxtaw. 45Toja' naq taaxik ut tixk'am chaq wuqub' chik chi musiq'ej, q'axal chik maa'useb' chiru a'an. Te'ok ut te'kanaaq aran; ut q'axal chik yib'ru taakanaaq wi' li winq a'an chiru naq xwank chaq xb'enwa. Jo'kan ajwi' tixk'ul li tenamit a'in li ink'a' useb' xna'leb'”.

Li xna' ut eb' li riitz'in li Jesus

(Mk 3,31-35; Lk 8,19-21)

46Naq toj yo chi aatinak li Jesus rik'ineb' li tenamit, li xna' rochb'eeneb' li riitz'in#12,46 Sa' raatinob'aal li Jesus jun ajwi' chi aatin wank re xyeeb'al li riitz'ineb' rib' (a'aneb' li ralal xk'ajol jun chi na'b'ej) jo' ajwi' li rech'alaleb' rib'. Moko jo' ta sa' qaatinob'aal: wank jun aatin re xyeeb'al tz'aqal li riitz'ineb' rib' ut jalan chik re xyeeb'al li rech'alaleb' rib'. Jo'kan utan, naq naqataw li aatin a'in sa' li Santil Hu (li riitz'in), tento xk'eeb'al reetal k'aru tz'aqal naraj naxye. Wan naraj naxye: tz'aqal iitz'inb'ej; wan naraj naxye: komon, ech'alal (cf. Gn 13,8; 14,16; Lv 10,4; 1 Kr 23,22); wan ajwi' naraj naxye: eb' laj paab'anel (cf. Mt 28,10; Hch 1,15; 6,3; 9,30). wankeb' chirix kab'l, te'raj raj raatinankil. 47Ut jun kiyehok re:

—Ab'i, laana' ut eb' laawiitz'in wankeb' chirix kab'l, ut te'raj aawaatinankil.

48Kichaq'ok li Jesus ut kixye re li yo chi aatinak:

—Ani linna' ut aniheb' li wiitz'in?

49Kixye' li ruq' wankeb' wi' li xtzolom ut kixye:

—A'aneb' a'in linna' ut eb' li wiitz'in. 50Xb'aan naq chixjunil li taab'aanunq re li rajom linchoxahil Yuwa', a'an li wiitz'in, li wanab' ut linna'.

Currently Selected:

Mt 12: QQC

Highlight

Copy