Mt 13

VII. LI XSEERAQ' LI JESUS SA' JALJOOKIL RU AATIN (13,1-52)

Li jaljookil ru aatin chirix laj awinel

(Mk 4,1-9; Lk 8,4-8)

1Sa' li kutan a'an ki'elk li Jesus sa' kab'l ut koxk'ojlaaq chire li palaw. 2Naab'aleb' li tenamit koxe'xch'utub' rib' rik'in: jo'kan naq ki'ok sa' jun li jukub', kik'ojlaak, ut chixjunileb' li tenamit xaqxookeb' chire li ha'. 3Ut naab'al li na'leb' kixye reheb' sa' jaljookil ru aatin. Kixye chi jo'ka'in:

“Ki'elk jun aj awinel chi awk. 4Ut naq yo chi awk, wan iyaj kinaqk chire li b'e: ke'chalk li kok' xul ut ke'xwa'. 5Wan chik iyaj kinaqk sa' pek ru b'arwi' jay ru li ch'och', ut sa' junpaat kimoqk xb'aan naq jay ru li ch'och'; 6ab'an, naq kichalk li saq'e, kik'atk ut kichaqik xb'aan naq maak'a' li xxe'. 7Wan ajwi' iyaj kinaqk sa' k'ix ru ut, naq kichamo'k li k'ix, kinat'e'k li iyaj xb'aan. 8Wan chik iyaj kinaqk sa' chaab'il ch'och' ut ki'uuchink; wan kixk'e o'k'aal, wan oxk'aal ut wan chik lajeeb' xka'k'aal. 9Ani wank xxik, chi'ab'inq”.

K'aru aj e li jaljookil ru aatin

(Mk 4,10-12; Lk 8,9-10)

10Eb' li xtzolom li Jesus ke'jilok chi xk'atq ut ke'xye re: “K'a'ut naq nakawaatinaheb' sa' jaljookil ru aatin?”. 11Kixsumeheb' ut kixye: “K'eeb'il eere laa'ex xnawb'al xyaalal eb' li muqmuukil na'leb' chirix li xnimajwal wankilal li choxa, ab'an ink'a' k'eeb'il reheb' a'an. 12Xb'aan naq ani wank k'aru re, ruk' chik taak'eemanq re ut taa'ela'anq chiru; ut ani maak'a' wank re, a' ajwi' li k'aru wank re taamaq'manq chiru. 13Jo'kan naq neke'waatina sa' jaljookil ru aatin. Xb'aan naq neke'ilok ut ink'a' neke'ril, neke'ab'ink ut ink'a' neke'rab'i, chi moko neke'xtaw ru. 14Ut rik'ineb' a'an natz'aqlok ru li xyehom li propeet Isaías:

«Rik'in leexik tex'ab'inq ut ink'a' teetaw ru;

teek'e eech'ool chi ilok ut maak'a' teeril.

15Xb'aan naq kawujenaq li xch'ool li tenamit a'in,

jipeb' sa' xxik ut xe'xmutz' li ruheb'.

Mare anchal te'iloq rik'ineb' li ru,

te'ab'inq rik'ineb' li xxik,

te'xtaw xyaalal sa' xch'ooleb' ut te'xjal xk'a'uxeb',

ut laa'in teb'ink'irtasi».#13,14-15 Is 6,9-10.

16“Ab'an us xaq reheb' xsa' leeru xb'aan naq neke'ilok; us xaq reheb' leexik xb'aan naq neke'ab'ink. 17Relik chi yaal ninye eere naq naab'aleb' li propeet ut li tiikeb' xch'ool ke'xrahi rilb'al li nekeril laa'ex ut ink'a' ke'ril; ke'xrahi rab'inkil li nekerab'i laa'ex ut ink'a' ke'rab'i.

Li xyaalalil li jaljookil ru aatin chirix laj awinel

(Mk 4,13-20; Lk 8,11-15)

18“Anaqwan ab'ihomaq xyaalal li jaljookil ru aatin chirix laj awinel. 19Chixjunileb' li neke'rab'i li aatin chirix li xnimajwal awab'ejihom li Yos ut ink'a' neke'xtaw ru, nachalk li maa'us rik'ineb' ut nokolxsaapu li awb'il sa' xch'ooleb': a'an a'in li ki'awmank chire li b'e. 20Li ki'awmank sa' pek ru, a'an li narab'i li Aatin ut naxk'ul chi junpaat chi sa sa' xch'ool; 21ab'an maak'a' xxe' rik'in ut ink'a' najt naxkuy. Ut naq nachalk junaq raaxiik' malaj rahob'tesiik sa' xk'ab'a' li Aatin, sa' junpaat nach'inank xch'ool. 22Li ki'awmank sa' li k'ix ru a'an li narab'i li Aatin, ab'an li k'oxlak chirix li k'a'aq re ru wank sa' ruuchich'och' ut li nab'alaq'ink wi' li b'ihomal naxnat' li Aatin, ut ink'a' chik na'uuchink xb'aan. 23Li ki'awmank sa' chaab'il ch'och' a'an li narab'i li Aatin ut naxtaw ru; a'an na'uuchink: wan naxk'e o'k'aal, wan oxk'aal ut wan chik lajeeb' xka'k'aal li junjunq chi iyaj”.

Li jaljookil ru aatin chirix li pim sa' li triiw

24Jun chik jaljookil ru aatin kixye reheb': “Li xnimajwal wankilal li choxa chanchan jun li winq kiraw chaab'il iyaj sa' li xch'och'. 25Ab'anan, naq yookeb' chi wark chixjunileb', kik'ulunk li xik' na'ilok re, kolraw li yib' aj pim sa' xyanq li triiw ut koho. 26Ut naq kimoqk li awimq ut ki'ok chi uuchink, kik'utunk ajwi' li yib' aj pim. 27Ke'wulak eb' laj k'anjel rik'in laj eechal kab'l, ke'xye re: «Qaawa', ma ink'a' tab'i' chaab'il li iyaj xawaw sa' laach'och'? B'ar put xchalk li yib' aj pim li wank chisa'?». 28Kichaq'ok a'an ut kixye: «Jun li winq xik' na'ilok we, a'an xb'aanunk re a'in». Ut eb' laj k'anjel ke'xye re: «Ma taawaj naq tooxik chi xmich'b'al li yib' aj pim?». 29«Ink'a' -chan reheb'-. Mare anchal sa' xmich'b'al li yib' aj pim teemich' ajwi' li triiw. 30Kanab'omaqeb' wan chi k'iik chi xkab'ichaleb' toj sa' li q'olok. Ut sa' xq'ehil li q'olok tinye reheb' laj q'olonel: Xokomaq xb'enwa li yib' aj pim, ut b'ak'omaq chi joob' re k'ate'k; ut li triiw ch'utub'omaq sa' li k'uuleb'aal»”.

Li jaljookil ru aatin chirix li riyajil mostaas

(Mk 4,30-32; Lk 13,18-19)

31Jun chik li jaljookil ru aatin kixye reheb': “Li xnimajwal wankilal li choxa chanchan jun t'orol li mostaas#13,31 Li mostaas a'an jun li che'. li kixxok jun li winq ut kiraw sa' li xch'och'. 32A'an q'axal kach'in chiruheb' chixjunil li iyaj; ab'an, naq nak'iik, nim nawulak chiruheb' li awimq, tz'aqal juntoon chi che', toj reetal naq eb' li xul li neke'rupupik chiru choxa neke'xik chi sukub'k sa'eb' li ruq'”.

Li jaljookil ru aatin chirix li xyu li xq'emal li kaxlan wa

(Lk 13,20-21)

33Jun chik li jaljookil ru aatin kixye reheb': “Li xnimajwal wankilal li choxa chanchan kach'in xyu li kaxlan wa. Jun li ixq kichapok re ut koxk'e sa' jun aroow chi k'aj, toj reetal kisipook chixjunil”.

K'a'ut naq li Jesus na'aatinak sa' jaljookil ru aatin

(Mk 4,33-34)

34Chixjunil a'in kixye li Jesus reheb' li tenamit sa' jaljookil ru aatin, ut maak'a' naraatinaheb' wi' chi maak'a' ta jaljookil ru aatin. 35Chi jo'kan kitz'aqlok ru li xyehom li propeet:

“Tin'aatinaq sa' jaljookil ru aatin,

tinye chi kutankil li k'a'aq re ru muqmu

chalen chaq sa' xk'ojlajik li ruuchich'och'”.#13,35 Sal 78,2.

Xch'olob'ankil xyaalal li pim sa' li awimq

36Toja' naq li Jesus kixchaq'rab'iheb' li tenamit ut kiwulak sa' kab'l. Ut eb' li xtzolom ke'jilok chi xk'atq: “Taach'olob' chiqu xyaalal li jaljookil ru aatin chirix li yib' aj pim sa' li awimq”, chankeb'. 37Kixsumeheb' ut kixye: “Li na'awok re li chaab'il iyaj a'an li K'ajolb'ej. 38Li ch'och' a'an chixjunil li ruuchich'och'; li chaab'il iyaj a'aneb' li ralal xk'ajol li xnimajwal wankilal li choxa; li yib' aj pim a'aneb' li ralal xk'ajol li maa'us; 39laj xik'il uuchinel a'an laj tza li ki'awok re li pim. Li q'olok a'an li roso'jik li ruuchich'och', ut eb' laj q'olonel a'aneb' li ánjel. 40Kama' naq naxokmank li pim ut nak'atmank sa' xam, jo'kan ajwi' taak'ulmanq sa' roso'jik li ruuchich'och'. 41Li K'ajolb'ej tixtaqlaheb' chaq li x'ánjel, ut eb' a'an tole'xxok ut tole'risi sa' li x'awab'ejihom chixjunileb' laj luktesinel ch'oolej ut eb' laj b'aanuhom maa'usilal, 42ut te'kute'q sa' li tiqwal na'ajej: aran taawanq li yaab'ak ut li k'uxuxink ruuch e. 43Toja' naq eb' li tiikeb' xch'ool te'lemtz'unq ruheb' kama' li saq'e, sa' li xnimajwal awab'ejihom li xYuwa'eb'. Ani wank xxik, chi'ab'inq.

Li b'ihomal ut li lemtz'il q'ol

44“Li xnimajwal wankilal li choxa chanchan jun nimla b'ihomal muqmu sa' ch'och' li kitawe'k xb'aan jun li winq. A'an kixmuq wi' chik ut, xb'aan xsahil li xch'ool, koho, koxk'ayi chaq chixjunil li k'aru wank re ut kixloq' li ch'och' a'an.

45“Jo'kan ajwi' li xnimajwal wankilal li choxa chanchan jun aj yakonel li naxsik' chaab'il q'ol nalemtz'unk. 46Ut naq kixtaw jun li q'ol nalemtz'unk q'axal terto xtz'aq, koho, koxk'ayi chaq chixjunil li k'aru wank re ut kixloq' li q'ol.

Li jaljookil ru aatin chirix li yooy

47“Jo'kan ajwi' li xnimajwal wankilal li choxa chanchan jun li yooy li kikutmank sa' palaw ut kixch'utub' k'iila paay chi kar. 48Ut naq kinujak, ke'risi chaq chi ch'och'el, ut ke'chunlaak: ke'xxok li chaab'il kar ut ke'xk'e sa' chakach, a'ut eb' li ink'a' us ke'xtz'eq. 49Jo'kan ajwi' taak'ulmanq sa' roso'jik li ruuchich'och': tole'elq eb' li ánjel, te'risi li ink'a' useb' sa' xyanqeb' li tiikeb' xch'ool 50ut te'kute'q sa' li tiqwal na'ajej: aran taawanq li yaab'ak ut li k'uxuxink ruuch e”.

Li chaab'il aj tz'iib'

51Toja' naq li Jesus kixpatz' reheb':

—Ma xetaw ru chixjunil a'in?

Ke'xsume:

—Hehe', xqataw ru, chankeb'.

52Ut a'an kixye reheb':

—Jo'kan naq chixjunil laj tz'iib' li x'ok cho'q xtzolom li xnimajwal wankilal li choxa chanchan jun li winq aj eechal kab'l li narisi chaq sa' li xk'uuleb'aal li k'aru ak' ut li k'aru q'eel.

VIII. XB'AANUHOM LI JESUS (13,53—17,27)

Li Jesus kitz'eqtaanaak sa' li xtenamit

(Mk 6,1-6; Lk 4,16-30)

53Naq kiraqe'k li Jesus chi xyeeb'al eb' li jaljookil ru aatin a'in, ki'elk aran. 54Ut naq kiwulak sa' li xtenamit, ki'ok chi xtzolb'aleb' sa' li ch'utleb'aal kab'l li wank aran. Ut eb' a'an nalaje'sachk xch'ool chi rab'inkil ut neke'xye:

—B'ar naxtaw li xnimal na'leb' a'in jo'wi' li xnimal xwankilal? 55Ma maawa' tab'i' a'in li ralal laj peech'? Ma ink'a' tab'i' xMaría xk'ab'a' li xna', ut eb' li riitz'in#13,55 Cf. 12,46. a'aneb' laj Santiago, laj José, laj Simón ut laj Judas? 56Ut eb' li ranab' ma ink'a' tab'i' wankeb' chixjunileb' sa' qayanq? B'ar put naxtaw chixjunil li k'a' re ru a'in?

57Ut ke'luktaak xch'ool xb'aan. Toja' naq li Jesus kixye reheb':

—Junaq propeet k'eeb'il xloq'al yalaq b'ar. Ka'ajwi' sa' li xtenamit ut sa' li rochoch ink'a' nak'ehe'k xloq'al.

58Ut ink'a' kixb'aanu k'iila sachb'ach'oolej aran, xb'aan naq maak'a' xpaab'aaleb'.

Currently Selected:

Mt 13: QQC

Highlight

Copy