MARIKA 13
13
Sa vakatakila ko Jisu na ca ena yaco ki Jerusalemi, kei na veika era na vosota ko ira sa dautukuna na lotu, 113; kei na ca ena yaco vei ira na kai Jutia, 1423. Sa qai tukuna na nona lako mai me ia na veilewai, 2437.
1Ia ni sa lako tani ko koya e na vale ni soro, sa kaya vua e dua vei ira na nona tisaipeli, Vakavuvuli, raica, na kenai rairai ni veivatu, kei na veivale oqo! 2A sa vosa ko Jisu, ka kaya vua, O sa raica na veivale lelevu oqo, ne? ena sega ni vo e dua na vatu me veitaqataqai, ena talaraki sobu kecega. 3Ia ni sa tiko ko koya mai na ulu-ni-vanua ni veiolive sa donuya na vale ni soro, eratou sa tarogi koya lo ko Pita kei Jemesa kei Joni kei Adriu, 4Mo ni tukuna mai vei keitou, se na yaco ninaica na veika oqo; ia ka cava na kenai vakatakilakila ni sa voleka ni yaco na ka kecega oqo. 5Sa qai vosa vei iratou ko Jisu, ka kaya, Raica vinaka de vakacalai kemudou e dua: 6Era lewe vuqa ena lako mai ka vakacavutaki au, ka kaya, Sai au; ia ka lewe vuqa era na vakacala. 7Ia ni dou na rogoca nai valu, kei nai rogorogo ni valu, dou kakua ni kidroa; ni sa kilikili me yaco; ia sa bera ga nai vakataotioti. 8Ni ra na veibolebolei na veivanua eso, kei na veimatanitu eso; ia ena tavuki na vanua e na veiyasana e vuqa, ena yaco talega na dausiga: oqo nai vakatekivu ga ni ka rarawa.
9Ia dou qarauni kemudou vinaka: ni dou na soli yani ki na mataveilewai, dou na vakanakuitataki e na veivale ni lotu: dou na kau talega ki na matadra na kovana, kei na tui, e na vukuqu, mei vakadinadina vei ira. 10Ia ena vunautaki dina mada eliu nai tukutuku-vinaka e na veivanua kecega. 11Ia ni dou sa kau yani, ka soli me lewai, dou kakua mada ni lomaocaoca se cava mo dou kaya, dou kakua talega ni vakanananu kiliu; ia na ka kecega ena soli vei kemudou e na tiki-ni-siga ko ya, sai koya ga mo dou vosataka: ni dou sa sega ni vosa koi kemudou, sa vosa ga na Yalo Tabu.
12Ia era na dui soli ira yani na veitacini me vakamatei, kei na tama ni gone ena solia na luvena; ia era na tu cake na gone vei ira na nodra qase, ka vakavuna na nodra mate. 13Ia era na cati kemudou ko ira na tamata kecega e na vuku ni yacaqu; ia ko koya ena vosota me yacova nai vakataotioti, ena vakabulai ko koya.
14Ia ni dou sa raica e na yasana sa tabu ni tu kina na ka vakasisila sa dauveivakarusai, o koya sa vosa kina ko Taniela na parofita, (me kila ko koya sa wilika,) me qai dro ki na veiulu-ni-vanua ko ira era sa tiko e Jutia; 15ia me kakua ni lako sobu ki vale ko koya sa tiko e delana, se curu kina, me kauta tani e dua na ka mai na nona vale; 16ia me kakua ni lesu tale ko koya sa tiko e na were, me kauta na nonai sulu. 17Ka na ca vei ira sa bukete, kei ira era sa vakasucuma na gone, e na gauna ko ya! 18Ia dou masu me kakua ni yaco na nomudou dro e na vula i liliwa. 19Ni na yaco na ka rarawa e na gauna ko ya; sa sega ni vakakina mai nai vakatekivu ni nona buli ka na Kalou ka yacova na siga oqo, ka na sega talega emuri. 20Ia kevaka sa sega ni vakalekalekataka na gauna ko ya na Turaga, sa sega na tamata me bula rawa: ia e na vukudra na digitaki, ko ira sa digitaka ko koya, sa vakalekalekataka ko koya na gauna ko ya. 21Kevaka ena qai kaya vei kemudou e dua, Raica, eke na Karisito; se, Raica, maikea; kakua ni dinata: 22ni na tubu mai na Karisito vakailasu eso, kei na parofita vakailasu eso, a ra na vakatakila mai na veivakatakilakila kei na veika e veivakurabuitaki, me vakacalai ira kina na digitaki, kevaka e rawa. 23Ia dou qarauni kemudou vinaka: raica, au sa tukuna eliu vei kemudou na ka kecega.
24Ia e na gauna ko ya, ni sa oti mada na ka rarawa ko ya, ena qai vakabutobutotaki na mata-ni-siga; ena sega talega ni cila na rarama ni vula; 25ka na lutu mai na veikalokalo ni lomalagi, ka na veitosoyaki na veika kaukauwa ni lomalagi: 26ia era na qai raica na Luve ni tamata ni sa lako mai e na veio, e na kaukauwa levu kei nai ukuuku. 27Ena qai talai ira na nona agilose ko koya, ka vakasoqoni ira vata na nona digitaki mai na mata ni cagi e va, mai nai yalayala kei vuravura kei nai yalayala kei lomalagi.
28Mo dou kila mada na vosa vakatautauvata ni lolo; Ni sa qai lavovou na tabana, a sa tubu na drauna, dou sa kila sa voleka na vula i katakata: 29me vaka talega kina koi kemudou, ni dou sa raica sa yaco na veika oqo, dou kila sa voleka ko koya, io mai katuba. 30Au sa kaya vakaidina vei kemudou, Ena sega ni takali nai tabatamata oqo, ena yaco mada eliu na ka kecega oqo. 31Ena takali ko lomalagi kei vuravura; ia na noqu vosa ena sega ni takali.
32Ia na siga ko ya kei na tiki-ni-siga ko ya sa sega e dua e kila, ko ira na agilose mai lomalagi e segai, se na Luvena, a Tamaqu duaduaga.
33Dou qarauni kemudou vinaka; dou vakatawa, ka masu: ni dou sa sega ni kila na kena siga. 34Sa vaka e dua na tamata e lako ki na vanua tani, ko koya sa biuta na nona vale, a sa lesia vei ira na nona tamata me ra lewa, ka lesia vei ira yadua na nodra cakacaka, a sa kaya talega vua nai vakatawa me vakatawa tiko. 35O koya mo dou qai vakatawa: ni dou sa sega ni kila na tiki-ni-siga ena lako mai kina nai taukei ni vale; se ni sa yakavi, se ni sa lomaloma-ni-bogi, se ni sa tagi na toa, se ni mataka; 36de lako vakasauri mai, ka kunei kemudou ni dou sa moce ga: 37ia na ka kau sa kaya vei kemudou, kau sa kaya vei ira kecega, Dou vakatawa.
Currently Selected:
MARIKA 13: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific
